I Phung Hađăch 2:32 - Nau Brah Ndu Ngơi 2023

³² Brah Yêhôva mra ƀư ăn ma mham păng nkhŭt tay ta klơ bôk păng, yorlah păng hŏ rduh dăch bar hê bunuyh sŏng srăng jêh ri ueh lơn ma păng, nkhĭt khân păng ma đao, ƀiălah Y-Đavit, mbơ̆ gâp, mâu gĭt du ntil ndơ ôh; nây jêng Y-Apner, kon Y-Ner, kôranh chiă uănh tahan Israel, jêh ri Y-Amasa, kon Y-Jêther, kôranh chiă uănh tahan Yuđa.

I Phung Hađăch 2:32 ပူးပေါင်းရင်းမြစ်များ

Nau Ntơm 4:11

Aƀaơ aơ, may geh nau rtăp rak luh bơh neh aơ, jêng neh hŏ hă mbung rhôp mham oh may hŭk bơh ti may.

Nau Ntơm 42:22

Y-Ruben nduyh khân păng: “Mâu di hĕ gâp hŏ lah jêh ma khân may lơi ƀư nau mhĭk ôh đah ndăm jê̆ nây? Ƀiălah khân may mâu iăt ôh. Aƀaơ aơ ăn he ntrok rnon mham păng dơm.”

Nau Ntơm 9:6

Mbu moh ƀư nkhŭt mham bunuyh, Mra geh bunuyh êng ƀư nkhŭt tay mham nơm nây; Yorlah Brah Ndu njêng bunuyh Tĭng nâm rup Păng nơm.

II Samuel 1:16

Y-Đavit lah ma păng: “Ăn mham may nkhŭt tay ta klơ bôk may nơm! Yorlah trôm mbung may nơm lĕ nkoch ma nau tih may nơm, yorlah may hŏ lah pô aơ: ‘Gâp nkhĭt jêh nơm Brah Yêhôva tŏ jêh ma dak ƀâu kah.’”

II Samuel 17:25

Y-Apsalôm dơm njêng Y-Amasa jêng kôranh ma phung tahan ntrok Y-Jôap. Y-Amasa jêng du huê kon bu klâu du huê bunuyh Israel amoh Y-Itra, jêng bunuyh hŏ gŭ nsum đah H'Abigêl, kon bu ur Y-Nahas, jêh ri yuh H'Sêruya, mê̆ Y-Jôap.

II Samuel 3:29

Ăn mham nây nkhŭt tay ta klơ bôk Y-Jôap jêh ri ta klơ lĕ ngih mbơ̆ păng! Ăn ngih Y-Jôap mâu tăch yơt ôh bunuyh ji kuet ji rôi, mâu lah nau ji phŭng, mâu lah phung knŏng gĭt ƀư nau kan phung bu ur, mâu lah cha lôt khĭt ma đao, mâu lah nau ji ngot yor pưt sông sa!”

II Samuel 3:37

Pônây, tâm nar nây, lĕ rngôch phung Israel gĭt hađăch mâu tât ma nau tih nkhĭt Y-Apner, kon Y-Ner.

II Samuel 3:39

Mpeh let ma gâp, nar aơ gâp hôm huơi nđâp lah gâp jêng hađăch bu tŏ dak ƀâu kah jêh; ƀiălah phung nây, jêng phung kon H'Sêruya, hŏ ƀư jêr ir ma gâp. Dăn Brah Yêhôva mplơ̆ sĭt ma nơm ƀư mhĭk tĭng nâm nau djơh mhĭk păng!”

II Samuel 4:11

Rlau lơn ma phung janh ƀai nkhĭt lơi du huê bunuyh sŏng srăng lâng bê̆ch ta klơ sưng bê̆ch tâm ngih păng nơm! Pôri aƀaơ, mâm ƀư gâp mâu kêh mham păng tâm ti khân may, jêh ri ƀư rai khân may bơh klơ neh ntu?”

I Phung Hađăch 2:44

Hađăch ngơi tay ma Y-Simei: “May hŏ gĭt jêh ri nuih n'hâm may rah vah jêh lĕ nau djơh may hŏ ƀư ma Y-Đavit, mbơ̆ gâp. Pônây Brah Yêhôva mra ƀư ăn nau djơh may nkhŭt tay ta klơ bôk may.

I Phung Hađăch 2:5

May hŏ gĭt đŏng ma lĕ nau Y-Jôap, kon bu klâu H'Sêruya, hŏ ƀư jêh ma gâp, nau păng hŏ ƀư đah bar hê kôranh chiă uănh tahan Israel jêng Y-Apner kon bu klâu Y-Ner, jêh ri Y-Amasa, kon Y-Jêther. Păng hŏ nkhĭt bar hê kôranh nây, ƀư nkhŭt mham khân păng tâm rnôk đăp mpăn nâm bu tâm rnôk nau tâm lơh, jêh ri hŏ ƀư mham nây krêp ta rse vân bŭt păng jêh ri ta ntâu jot păng ta jâng.

I Phung Hađăch 8:32

pôri dăn ma May klơ trôk rkêng tôr iăt, ƀư an jêh ri phat dôih phung oh mon May, tâm rmal nơm geh nau tih, ƀư ăn păng tuy nau tih păng nơm, jêh ri dăn May Kơp nau sŏng srăng ma nơm Kơp nau sŏng srăng ma nau nkhôm tĭng nâm nau sŏng srăng păng.

II Nau Rêh Jêng 21:13

ƀiălah may hŏ hăn tĭng trong phung hađăch Israel, ƀư ăn phung Yuđa jêh ri phung gŭ tâm ƀon Yêrusalem yơk mbah rup brah nâm bu ngih Y-Ahap hŏ ƀư. Rlau lơn ma nĕ, may hŏ nkhĭt jêh phung oh nâu may bơh ngih mbơ̆ may, jêng phung ueh lơn ma may.

II Nau Rêh Jêng 21:14

Aơ, Brah Yêhôva mra nkhŭt nau mhĭk toyh ma phung ƀon lan may, ma phung kon may, ma phung ur may, jêh ri ma lĕ rngôch drăp ndơ may geh.

Êsther 1:19

Yor ri, tơlah hađăch maak nuih n'hâm, ăn hađăch njuăl samƀŭt ntrŭnh nau ăn ma bu nchih tâm ndrom samƀŭt nau vay n'gor bri Persi jêh ri Mêdơ gay lơi ăn bu rgâl ôh, ma H'Vasti mâu mra dơi văch đŏng tanăp hađăch Asuêrus ôh. Ăn hađăch jao nau păng jêng hađăch bu ur ma nơm êng ueh lơn ma păng.

Nau Mprơ Ơm 7:16

Nau tih mhĭk păng mra nkhŭt ta klơ bôk păng. Jêh ri nau rêh ni mra tŭp ta klơ ndăr kleng păng nơm.

Nau Mprơ Ơm 7:17

Gâp mra nsĭt lah ma Brah Yêhôva ma nau sŏng srăng Păng, Gâp mra mprơ tâm rnê ma amoh Brah Yêhôva jêng Nơm Dŭt Prêh.

Êsêkiêl 17:19

Yor nây, Kôranh Brah Yêhôva lah: ‘Tĭng nâm Gâp gŭ rêh mro mrăng, păng hŏ tâm rmot jêh nau ton Gâp, chalơi nau Gâp tâm rnglăp yor nây Gâp mra nkhŭt lĕ rngôch ta klơ bôk păng.

Nau Kơp Bunuyh 32:23

Ƀiălah, tơlah khân may mâu mra ƀư pônây ôh, nanê̆ khân may hŏ ƀư tih đah Brah Yêhôva jêh ri ăn khân may gĭt ngăn nau tih nây mra nkhŭt tay ma khân may.

Phung Kôranh Phat Dôih 9:24

Nau aơ dơi tât gay plơng har nau tih nkhĭt bunuyh yor păng hŏ ƀư tih jêh đah pơh jât nuyh kon bu klâu Y-Jêrubaal, jêh ri ƀư ăn mham khân păng tŏ ta klơ Y-Abimêlek, jêng bunuyh hŏ nkhĭt oh nâu khân păng, jêh ri tŏ mham ndrel ta klơ phung kôranh chiă uănh ƀon toyh Sichem yorlah hŏ kơl păng tâm nkhĭt ndrăng oh nâu khân păng nơm.

Phung Kôranh Phat Dôih 9:57

Brah Ndu tâm ban đŏng mplơ̆ plơng ma phung ƀon lan ƀon toyh Sichem yor lĕ rngôch nau djơh khân păng ƀư jêh. Nau mhĭk ăn tât klơ bôk khân păng di nâm nau rak rtăp Y-Jôtham, kon bu klâu Y-Jêrubaal.

I Samuel 15:28

Y-Samuel lah ma păng: “Nar aơ Brah Yêhôva lĕ nkhêk jêh ƀon bri hađăch Israel tă bơh may kơt nĕ, gay ăn ma du huê bunuyh chiau meng may, jêng nơm ueh lơn ma may.