I Nau Rêh Jêng 22:16 - Nau Brah Ndu Ngơi 2023

¹⁶ phung blau ma mah, prăk, kông, jêh ri loih jêng âk ir mâu dơi kơp ôh. Dâk pah kan hom! Brah Yêhôva mra gŭ n'hanh may.”

I Nau Rêh Jêng 22:16 ပူးပေါင်းရင်းမြစ်များ

I Phung Hađăch 2:2

“Gâp lĕ dăch dâk hăn trong lĕ rngôch bunuyh klơ neh ntu hăn. Pônây, Ăn may jêng ktang jêh ri mpơl may nơm jêng du huê bunuyh kôranh!

I Phung Hađăch 7:47

Y-Salômôn mâu njing ôh lĕ rngôch ndơ dŏng nây, yorlah khân păng lĕ âk ir, rnoh kông mâu đŏng gĭt năl.

I Nau Rêh Jêng 22:11

Aơ kon bu klâu gâp, aƀaơ, dăn Brah Yêhôva gŭ n'hanh may jêh ri kơl may geh nau dơi tâm kan ndâk ngih brah ma Yêhôva Brah Ndu may, tĭng nâm nau Păng ngơi jêh ma may.

I Nau Rêh Jêng 22:14

Aơ, gâp hŏ anh jêh hŏt rgănh âk ngăn gay ndrăp nkra ma ngih brah Brah Yêhôva pe rmưn tân mah, pe rmưn tân prăk; bi kông jêh ri ro loih mâu hôm dơi njing ôh, yorlah geh âk ir. Gâp tâm ban đŏng ndrăp nkra jêh tơm si jêh ri lŭ, ƀiălah may ntop đŏng ma ndơ aơ.

I Nau Rêh Jêng 22:15

Rlau lơn ma nĕ, may geh âk ngăn bunuyh pah kan, phung châm trah lŭ, phung ndâk lŭ, phung trah si, ăp ntil phung blau pah lĕ rngôch nau kan;

I Nau Rêh Jêng 22:3

Tâm ban đŏng Y-Đavit lĕ ndrăp âk ngăn loih prăp ƀư kđĭn, lăk-lê mpông; bi kông âk ngăn, kŏ tât bu mâu dơi njing.

I Nau Rêh Jêng 28:10

Aƀaơ aơ, njrăng hom, yorlah Brah Yêhôva săch jêh may ăn may ndâk du mlâm ngih brah prăp ma ntŭk kloh ueh Păng. Dăng ktang hom, jêh ri ƀư nau nây!”

I Nau Rêh Jêng 29:2

Gâp ndrăp nkra lĕ nau ktang ăn ma ngih Brah Ndu gâp, mah prăp ma ndơ ƀư đah mah, prăk prăp ma ndơ ƀư đah prăk, kông prăp ma ndơ ƀư đah kông, loih prăp ma ndơ ƀư đah loih, tơm si prăp ma ndơ ƀư đah tơm si; rơm ndrăp âk lŭ ônik, lŭ khlay gay kach, lŭ khlay nchrat ang, lŭ khlay geh âk ntil dak, jêh ri lĕ ntil lŭ khay, jêh ri lŭ marbrơ nglang âk ngăn.

II Nau Rêh Jêng 1:1

Y-Salômôn, kon bu klâu Y-Đavit, djôt nâp nau chiă uănh tâm ƀon bri hađăch păng, yorlah Yêhôva Brah Ndu păng gŭ ndrel ma păng jêh ri ăn păng dơi jêng toyh ngăn ngên.

II Nau Rêh Jêng 20:17

Tâm nau lơh nây, khân may mâu mra tâm lơh ôh. Gŭ nâp hom tâm ntŭk jêh ri dâk nsrâng gay kâp uănh nau tâm rklaih Brah Yêhôva, Nơm gŭ ndrel ma khân may. Ơ phung Yuđa jêh ri phung gŭ ta Yêrusalem! Lơi klach ôh, lơi krit ôh! Ôi taơ hăn luh tâm mâp hom đah khân păng, yorlah Brah Yêhôva gŭ ndrel ma khân may.’”

I Kôrintô 15:58

Pôri, hơi phung oh nâu gâp rŏng ngăn ngên, gŭ nâp hom, lơi mpât n'gơ, ƀư hom âk rmeh nau kan ma Kôranh Brah, dôl khân may gĭt kan khân may pah mâu mra jêng dơm dam ôh tâm Kôranh Brah.

Êphêsô 5:14

Yor nây, geh nau lah pô aơ: “Hơi nơm dôl bê̆ch, kah rngăl hom, Dâk hom may tă bơh nklang phung bunuyh khĭt, Ri mơ Brah Krist mra nchrat ang may.”

Philip 4:13

Gâp dơi ƀư lĕ ntil ndơ yor ma Brah Krist ăn n'hâm suan ma gâp.

Yôsuê 1:2

“Y-Môis, oh mon Gâp khĭt jêh. Aƀaơ may jêh ri lĕ rngôch ƀon lan aơ dâk hăn rgăn kơh ri dak krong Yurdan, gay lăp tâm bri Gâp dăch ăn ma phung ƀon lan Israel.

Yôsuê 1:5

Du bông nau rêh may mâu mra geh ôh nơm dơi tâm rdâng đah may. Gâp mra gŭ ndrel ma may tâm ban Gâp hŏ gŭ ndrel jêh ma Y-Môis; Gâp mâu mra ƀah ngai đah may ôh, mâu chalơi may.

Yôsuê 1:9

Mâu di Gâp hŏ ntĭnh jêh ma may? Janh ktang hom, nănh! Lơi râm sâr, lơi klach ôh! Yorlah Yêhôva Brah Ndu may gŭ ndrel ma may tâm ăp ntŭk may hăn.”

Yôsuê 7:10

Nôk nây, Brah Yêhôva lah ma Y-Yôsuê: “Dâk hăn hom! Mâm ƀư may păn muh măt ta neh tâm ban pônây?

Phung Kôranh Phat Dôih 4:14

H'Dêbôra lah ma Y-Barak: “Dâk hom! Yorlah aơ jêng nar Brah Yêhôva jao jêh Y-Sisêra tâm ti may. Mâu di hĕ Brah Yêhôva hăn panăp may?” Pônây Y-Barak hăn trŭnh tă bơh yôk Tabor ndrel ma jât rbăn bunuyh tĭng ndô̆ păng.

I Samuel 17:37

Y-Đavit lah tay: “Brah Yêhôva rklaih jêh gâp tă bơh nheh yau mŭr jêh ri nheh kau, Păng tâm ban đŏng mra tâm rklaih gâp tă bơh ti phung Philistin aơ.” Y-Sôl lah ma Y-Đavit: “Hăn hom, ăn Brah Yêhôva gŭ ndrel ma may!”

I Samuel 20:13

bi tơlah mbơ̆ gâp sŏl ko ƀư mhĭk ma may, gâp mra ăn may gĭt lor, ăn may du, jêh ri may mra hăn đăp mpăn. Tơlah mâu, dăn ma Brah Yêhôva rmal jâk jêr ma Y-Jônathan! Dăn ma Brah Yêhôva gŭ ndrel ma may, nâm bu Păng hŏ gŭ ndrel ma mbơ̆ gâp!