I Nau Rêh Jêng 13:6 - Nau Brah Ndu Ngơi 2023

⁶ Y-Đavit jêh ri lĕ rngôch phung Israel hăn hao ma Baala, nâm bu ntĭt Kiriat-Jêarim tâm n'gor Yuđa, gay tung leo Hip Nau Tâm Rnglăp Brah Ndu plơ̆ sĭt, jêng Hip tuy amoh Brah Yêhôva, Nơm hôm gŭ ta nklang phung chêrubim.

I Nau Rêh Jêng 13:6 ပူးပေါင်းရင်းမြစ်များ

I Phung Hađăch 8:16

‘Ntơm bơh nar Gâp hŏ njŭn leo phung ƀon lan Gâp jêng Israel du luh tă bơh Êjipt, Gâp mâu mâp săch ôh du rplay ƀon êng tâm lĕ rngôch ndŭl mpôl Israel gay ndâk du mlâm ngih brah ma amoh Gâp gŭ ta nây. Ƀiălah Gâp hŏ săch Y-Đavit gay păng chiă uănh phung ƀon lan Israel Gâp.’

II Phung Hađăch 19:15

Y-Hêsêkia mbơh sơm tanăp Brah Yêhôva: “Ơ Brah Yêhôva, Brah Ndu Israel! Nơm gŭ ta klơ phung chêrubim, knŏng êng du huê May jêng Brah Ndu ma lĕ rngôch ƀon bri hađăch ta neh ntu. May yơh hŏ rhăk njêng jêh trôk jêh ri neh ntu.

Nau Mprơ Ơm 80:1

Ơ Nơm mât njrăng biăp Israel, dăn rkêng tôr iăt! May jêng Nơm njŭn leo Yôsep nâm bu du phung biăp, Ơ Nơm gŭ ta klơ phung Chêrubim, dăn May sol ang.

Nau Mprơ Ơm 99:1

Brah Yêhôva chiă uănh! Lĕ mpôl băl bunuyh râm sâr hom; Păng gŭ klơ phung Chêrubim; neh ntu geh nau mpât n'gơ.

Nau Ngluh Êjipt 20:24

Ăn may ndâk ma Gâp nơng ƀư brah ma neh jêh ri ta klơ nây nhhơr ndơ ƀư brah gŭch, ndơ ƀư brah ma nau đăp mpăn, mâu lah biăp mâu lah ndrôk khân may. Ta ăp ntŭk Gâp mpơl amoh Gâp gay kah gĭt, Gâp mra văch jêh ri ăn nau ueh uĭn ma may.

Nau Ngluh Êjipt 23:21

Tanăp tông mpăr, ăn blau njrăng jêh ri tông bâr păng. Lơi ƀư ôh nau tâm rdâng đah păng, yorlah păng mâu mra yô̆ an ôh nau khân nơm tâm rdâng, yorlah amoh Gâp gŭ tâm păng.

Nau Ngluh Êjipt 25:22

Gâp mra mâp may ta nây; ntơm bơh klơ ndrŭp nau yô̆, ta nklang bar chêrubim gŭ ta klơ Hip Nau Tâm Rnglăp, Gâp mra ntĭnh ma may dĭng lĕ nau ntăm ƀư ma phung ƀon lan Israel.”

Êsai 37:16

“Ơ Brah Yêhôva ma phung tahan, Brah Ndu Israel, jêng Nơm gŭ ta klơ phung chêrubim, knŏng êng du huê May yơh jêng Brah Ndu ma lĕ rngôch ƀon bri hađăch ta neh ntu; May yơh hŏ rhăk njêng jêh trôk jêh ri neh ntu.

Nau Kơp Bunuyh 6:27

Ăn khân păng dơm amoh Gâp ta klơ phung ƀon lan Israel, tâm ban pônây Gâp mra ăn nau ueh uĭn ma Phung ƀon lan aơ.”

Nau Kơp Bunuyh 7:89

Tơlah Y-Môis lăp Ngih Bok Nau Tâm Rƀŭn gay tâm ngơi ndrel đah Brah Yêhôva, păng tăng bâr Kôranh Brah ngơi ma păng nơm tă bơh ndrŭp nau yô̆ an ta klơ Hip Nau Tâm Rnglăp, ta vah vang bar chêrubim. Jêh ri kơt nĕ păng tâm ngơi ndrel jêh đah Brah Yêhôva.

Yôsuê 15:60

Kiriat-Baal, jêng Kiriat-Jêarim, jêh ri Raba: lĕ rngôch jêng bar ƀon ndrel ma ƀon jê̆ khân păng.

Yôsuê 15:9

N'har hăn bơh n'gơn yôk tât ma dak n'hor Nêptôa, jêh ri jong tât ta lĕ ƀon tâm yôk Ephrôn; jêh ri hăn trŭnh tât ma aơ jêng Baala, jêng Kiriat-Jêarim.

Yôsuê 9:17

Yor ri, phung ƀon lan Israel dâk hăn trong, jêh ri tât ta ƀon khân păng nar tal pe. Lĕ ƀon khân păng jêng ƀon Gibêôn, ƀon Chêphira, ƀon Bêrôt, jêh ri ƀon Kiriat-Jêarim.

I Samuel 4:4

Pôri, phung ƀon lan prơh bunuyh hăn tât ta Silô. Tă bơh nây, khân păng sŏk Hip Nau Tâm Rnglăp Brah Yêhôva ma phung tahan, jêng Nơm gŭ ta nklang phung Chêrubim. Bar hê kon bu klâu Y-Êli, jêng Y-Hôphni jêh ri Y-Phinêas, hăn tĭng Hip Nau Tâm Rnglăp Brah Ndu.

I Samuel 6:21

Jêh nây khân păng prơh phung hăn mbơh ma phung Kiriat-Jêarim jêh ri lah: “Phung Philistin hŏ mplơ̆ tay jêh Hip Nau Tâm Rnglăp Brah Yêhôva, hăn trŭnh hom djôt leo păng sĭt ma khân may.”