I Nau Rêh Jêng 11:10 - Nau Brah Ndu Ngơi 2023

¹⁰ Aơ jêng phung kôranh ma phung tahan janh ktang Y-Đavit; phung kơl jêh păng tâm ƀon bri hađăch păng, jêh ri ndrel ma lĕ rngôch phung Israel gay njêng Y-Đavit jêng hađăch di nâm nau Brah Yêhôva ngơi jêh ma phung Israel.

I Nau Rêh Jêng 11:10 ပူးပေါင်းရင်းမြစ်များ

II Samuel 3:21

Y-Apner lah ma Y-Đavit: “Gâp mra tâm rƀŭn đŏng lĕ rngôch phung Israel văch tât ma hađăch, jêng kôranh gâp, gay ăn khân păng dơi ƀư nau tâm rnglăp đah hađăch, jêh ri hađăch mra ƀư hađăch chiă uănh lĕ n'gor Israel, di nâm nuih n'hâm hađăch ŭch.” Y-Đavit ăn Y-Apner sĭt, jêh ri păng hăn ma nau đăp mpăn.

I Nau Rêh Jêng 11:3

Pôri, lĕ rngôch phung bu ranh Israel văch ma hađăch ta Hêbron. Y-Đavit ƀư nau tâm rnglăp ma khân păng ta Hêbron tanăp Brah Yêhôva; jêh nây khân păng tŏ dak ƀâu kah ma Y-Đavit jêng hađăch chiă uănh phung Israel, tĭng nâm nau Brah Yêhôva ngơi jêh đah Y-Samuel.

I Nau Rêh Jêng 12:21

Phung nây kơl jêh Y-Đavit tâm rdâng đah phung văch pit in, yorlah lĕ rngôch khân păng jêng phung tahan janh ktang, jêh ri jêng phung kôranh chiă uănh tahan.

I Nau Rêh Jêng 12:23

Aơ rnoh mpôl phung tahan văch ma Y-Đavit tâm ƀon Hêbron, gay jao ƀon bri hađăch Sôl ma Y-Đavit, di tĭng nâm nau Brah Yêhôva hŏ ntăm jêh.

I Nau Rêh Jêng 12:24

Ma phung kon sau Yuđa, geh prao rbăn pham rhiăng nuyh djôt khêl jêh ri tak, ndrăp jêh tâm lơh.

I Nau Rêh Jêng 12:38

Lĕ rngôch phung aơ jêng phung tahan blau jêh nau tâm lơh. Khân păng hăn hao ma Hêbron tĭng nâm mpôl, du nuih n'hâm ŭch njêng Y-Đavit ƀư hađăch chiă uănh lĕ rngôch phung Israel. Lĕ rngôch phung Israel knŏng geh du nuih n'hâm du nau mĭn gay njêng Y-Đavit hađăch.

I Nau Rêh Jêng 12:39

Khân păng gŭ ta nây ndrel ma Y-Đavit tâm pe nar jêh ri sông sa nhêt, yorlah phung oh nâu khân păng hŏ ăn jêh ndơ sông sa ma khân păng.

I Nau Rêh Jêng 27:1

Aơ jêng samƀŭt nchih amoh phung ƀon lan Israel, phung kôranh ma noi deh, kôranh ma du rbăn nuyh jêh ri du rhiăng nuyh jêh nây phung kôranh pah kan ma hađăch lĕ rngôch ntil tâm phung kan tahan; tĭng nâm mpôl lăp jêh ri luh ăp khay lĕ du năm, ăp mpôl geh bar rmưn puăn rbăn nuyh.

I Nau Rêh Jêng 28:1

Y-Đavit kuăl rgum lĕ rngôch phung kôranh toyh phung Israel văch ta ƀon Yêrusalem geh phung kôranh ndŭl mpôl, phung kôranh mpôl pah kan ma hađăch, kôranh chiă uănh toyh ma du rbăn nuyh tahan jêh ri di rhiăng nuyh tahan, phung kôranh mât uănh drăp ndơn jêh ri mpô mpa hađăch rong, phung kon bu klâu hađăch, ndrel ma phung kôranh bu char jêh ri phung tahan janh ktang.

I Samuel 16:1

Brah Yêhôva lah ma Y-Samuel: “May nhĭm nhhiăng yor nau Y-Sôl kŏ tât ndah nâm jŏ? Gâp hŏ chalơi jêh păng, mâu hôm ăn păng jêng hađăch phung Israel đŏng ôh. Troch hom dak ƀâu kah ăn bêng nke jêh ri hăn trong. Gâp mra prơh may hăn tâm mâp đah Y-Yêsê, du huê bunuyh ƀon Ƀêtlêhem, yorlah Gâp hŏ săch du huê hađăch tâm phung kon bu klâu păng.”