II Phung Hađăch 25:3 - Nau Brah Ndu Ngơi 2023

³ Ta nar sĭn khay nây, geh nau ji ngot hâu ngăn tâm ƀon jêng knap ngăn kŏ tât mâu geh piăng let sa ma phung ƀon lan tâm n'gor bri.

II Phung Hađăch 25:3 ပူးပေါင်းရင်းမြစ်များ

II Phung Hađăch 25:2

Bu nchueng jŭm ƀon nây tât năm rơh jât ma nguay rnôk rô̆ chiă uănh hađăch Sêdêkia chiă uănh.

II Phung Hađăch 6:24

Ƀiălah jŏ djê̆ pakơi, Y-Ben-Hadat, hađăch Aram tâm rƀŭn lĕ phung tahan păng n'hoch hao nchueng ƀon Samari.

II Phung Hađăch 6:25

Yorlah ƀon lĕ bu nchueng jŏ nar jêh, pôri ta ƀon Samari tât geh nau ji ngot toyh ngăn kŏ tât du bôk seh bri bu tăch pham jât glo prăk, jêh ri du khăl jê̆ ek sĭm plŭk bu tăch prăm glo prăk.

Êsai 3:1

Aơ, Kôranh Brah jêng Brah Yêhôva ma phung tahan Mra sŏk rdu lơi bơh Yêrusalem jêh ri bri Yuđa Tu nau kâp kơl jêh ri ntŭk rnơm, Nĕ jêng lĕ tu ăn ma ƀănh jêh ri dak.

Yêrêmi 19:9

Gâp mra ƀư ăn khân păng sa puăch phung kon bu klâu kon bu ur khân păng nơm. Dôl rnôk bu nchueng jŭm, geh phung rlăng jêh ri phung joi ŭch ƀư rai nau rêh njŭn ma nau rêh ni, khân păng sa puăch ndrăng băl khân păng nơm.’

Yêrêmi 37:21

Hađăch Sêdêkia ntĭnh njŭn leo Y-Yêrêmi tâm nhuang phung tahan gak, ăp nar ăn du glo piăng let tă bơh phung ƀư piăng let, kŏ tât ƀon nây mâu hôm geh piăng let đŏng ôh. Yor nây, Y-Yêrêmi hôm gŭ tâm nhuang tahan gak.

Yêrêmi 38:2

“Brah Yêhôva lah: ‘Mbu nơm hôm gŭ tâm ƀon aơ mra khĭt ma tak đao, ma nau sa sât ji ngot, mâu lah ma nau ji tưp; ƀiălah mbu nơm luh jao săk păng nơm ma phung Kaldê mra dơi rêh; khân păng mra dơi rklaih nau rêh nâm bu geh drăp ndơ jêh ri mra rêh.’

Yêrêmi 39:2

Ta nar sĭn khay puăn năm rơh jât ma nguay rnôk rô̆ Y-Sêdêkia, ƀon toyh bu lơh rai.

Yêrêmi 52:6

Ta nar sĭn khay puăn, nau ji ngot hâu ngăn tâm ƀon kŏ tât mâu hôm geh ndơ sông sa đŏng ôh.

Êsêkiêl 14:21

Pônây Kôranh Brah Yêhôva lah: ‘Gâp sŏk puăn ntil nau tâm rmal jru rlau lơn ma nây jêng gưm đao, nau sa sât ji ngot, mpô mpa bri janh jêh ri nau ji tưp nkhĭt ăn ma ƀon Yêrusalem gay ƀư rai lơi bunuyh jêh ri mpô mpa tâm bri tâm nây.

Êsêkiêl 5:10

Yor ri, tâm nklang may, mbơ̆ mra sa puăch kon, kon mra sa puăch mbơ̆. Gâp mra ƀư ăn nau phat dôih tât ta may, jêh ri Gâp mra ƀư lĕ rngôch phung bunuyh may hôm e klen ăn păng nchah rai pru pra tĭng ăp mpeh sial.’”

Êsêkiêl 5:12

Du kô̆ tâm pe tâm phung ƀon lan may mra khĭt ma nau ji tưp, mra djoh jêh ma nau ât ji ngot ta nklang may; du kô̆ tâm pe mra khĭt ma đao gŭ jŭm may; bi du kô̆ tâm pe đŏng Gâp mra ƀư nchah rai pru pra tĭng ăp mpeh sial jêh ri Gâp tŏk đao hăn tĭng khân păng.

Êsêkiêl 7:15

Mpeh padih geh tak đao, mpeh tâm trôm geh nau ji tưp jêh ri sa sât ji ngot! Mbu moh bunuyh gŭ tâm mir mra khĭt ma gưm đao; mbu nơm gŭ tâm trôm ƀon mra khĭt nau sa sât ji ngot jêh ri nau ji tưp ran sŏk rvăn.

Kan Lêvi 26:26

Tơlah Gâp ngroh lơi ndơ sông sa ma khân may, jât nuyh bu ur mra gŭch piăng let nsum tâm du rplay năk, jêh ri nhueh piăng let gay pă kô̆; khân may mra sa ƀiălah mâu hơm ôh.

Sakari 8:19

Brah Yêhôva ma phung tahan lah: “Lĕ nau ât sông sa ta khay puăn, ta khay prăm ta khay pơh, jêh ri khay jât mra jêng nau maak răm, jêh ri lĕ nar rƀŭn bêng ma nau maak ma Yuđa. Yor nây rŏng hom ma nau nanê̆ ngăn jêh ri đăp mpăn.”