II Nau Rêh Jêng 30:6 - Nau Brah Ndu Ngơi 2023

⁶ Tĭng nau hađăch ntrŭnh, phung njŭn samƀŭt hađăch jêh ri phung kôranh hăn lam n'gor bri Israel jêh ri n'gor Yuđa. Samƀŭt kuăl: “Ơ phung kon sau Israel, plơ̆ sĭt hom ma Yêhôva Brah Ndu Y-Abraham, Y-Isăk jêh ri Israel, gay ma Păng plơ̆ sĭt tay ma phung hôm e klen tâm khân may, jêng phung dơi klaih jêh tă bơh phung hađăch Asiri.

II Nau Rêh Jêng 30:6 ပူးပေါင်းရင်းမြစ်များ

I Phung Hađăch 18:36

Tât jêh mông nhhơr ndơ ƀư brah rnih môi kêng mhaơ, nơm mbơh lor Y-Êli văch dăch jêh ri mbơh sơm pô aơ: “Hơi Yêhôva Brah Ndu Y-Abraham, Y-Isăk jêh ri Y-Israel. Nar aơ ăn lĕ rngôch bunuyh gĭt pô aơ tâm phung Israel May jêng Brah Ndu, gâp jêng oh mon May, jêh ri gâp tông bâr May gay ƀư lĕ rngôch nau aơ.

II Phung Hađăch 15:19

Hađăch Asiri jêng Y-Pul hăn văch rvan n'gor. Y-Mênahem ăn ma Y-Pul pe rmưn kilô prăk, gay ma păng kơl ăn nâp ƀon bri hađăch tâm ti păng.

II Phung Hađăch 15:29

Tâm rnôk rô̆ Y-Pêka, hađăch Israel chiă uănh, geh Y-Tiglat-Pilêser, hađăch Asiri, văch tât pit sŏk Ijôn, Abel-Bet-Maka, Janôa, Kêdês, Hasôr, n'gor Gilêat, n'gor Galilê, jêh ri lĕ n'gor neh Naptali. Jêh nây păng nhŭp phung ƀon lan tâm lĕ n'gor nây njŭn leo tât ta n'gor Asiri.

I Nau Rêh Jêng 29:18

Hơi Yêhôva Brah Ndu phung chô yau hên jêng Y-Abraham, Y-Isăk, jêh ri Y-Israel! Dăn ăn ma phung ƀon lan May djôt prăp mro nau ton jêh ri nau mĭn nây tâm nuih n'hâm, jêh ri ăn ma nuih n'hâm khân păng gŭ mpeh ma May.

I Nau Rêh Jêng 5:26

Pôri, Brah Ndu Israel nsônh nau mĭn Y-Pul, hađăch bri dak Asiri, jêh ri Y-Tiglat-Pilêser, hađăch bri dak Asiri, hăn tât gay nhŭp phung ndŭl mpôl Ruben, Gat, jêh ri du n'gul ndŭl mpôl Manasê, njŭn khân păng tât ma ƀon Hala, ƀon Habôr, ƀon Hara, jêh ri nkual ta dăch dak krong Gôsan, jêng ntŭk khân păng hôm gŭ tât ma nar aơ.

II Nau Rêh Jêng 28:20

Pôri, Y-Tigla-Pilêser, hađăch Asiri, di lah văch sâm rklaih păng, ƀiălah rduh lơh tay jêh ri ƀư rêh ni ma hađăch Ahas.

Êsther 3:13

Khân păng njuăl samƀŭt ma phung njŭn ma lĕ rngôch n'gor bri hađăch, ntăm gay ŭch ƀư rai, nkhĭt lơi, jêh ri ƀư roh lĕ rngôch phung Yuđa mâu gĭt bu ranh, mom ndăm, bu ur nđâp kon se, tâm du nar nây, jêng nar jât ma pe, khay jât ma bar jêng khay Adar jêh ri pit in lĕ ndô ndơ khân păng.

Êsther 8:14

Pôri phung djôt leo samƀŭt ncho seh prăl, jêng seh mpôl êng ngăn bu prăp ta ngih hađăch. Bu mbơh đŏng nau vay nây ta ƀon Susa.

Ndrom Samƀŭt bơh Yôp 9:25

Lĕ nar gâp rêh prăl rlau lơn ma du huê bunuyh ntuh bâr nau ndal; Khân păng lôch gơnh ngăn mâu dơi saơ nau ueh lăng.

Êsai 1:9

Tơlah Brah Yêhôva ma phung tahan Mâu lơi ma he du phung djê̆ hôm rêh, Pôri he he hŏ jêng nâm bu ƀon Sôdôm, Jêh ri tâm ban ma ƀon Gômôrơ jêh.

Êsai 6:13

Nđâp tơlah du kô̆ tâm jât hôm e tâm khân păng Bu mra ƀư rai lơi; Ƀiălah, nâm bu kăl jêh tơm n'ho, tơm guyh hôm om knŏng yôk ngâl, Ndŭl mpôl kloh ueh jêng yôk ngâl păng.”

Yêrêmi 29:1

Aơ jêng nau ngơi tâm samƀŭt nơm mbơh lor Y-Yêrêmi njuăl tă bơh Yêrusalem ăn ma phung bu ranh hôm klen tâm phung ƀư bu nă, ăn ma phung kôranh ƀư brah, ma phung nơm mbơh lor, jêh ri ma lĕ rngôch phung ƀon lan, hađăch Y-Nêbukatnetsar hŏ nhŭp tă bơh Yêrusalem leo ma bri Babilôn.

Yêrêmi 3:14

Brah Yêhôva Lah: “Hơi phung kon mâu răp jăp, plơ̆ sĭt hom! Yorlah Gâp jêng kôranh ma phung khân may. Gâp mra sŏk tă bơh phung khân may ăp ƀon du huê, ăp ndŭl mpôl bar hê, Jêh ri djôt tât ma Siôn.

Yêrêmi 4:1

Brah Yêhôva lah: “Hơi phung Israel, tơlah may plơ̆ sĭt, Tơlah khân may plơ̆ sĭt ma Gâp, Tơlah may mƀăr lơi lĕ rngôch nau ƀơ̆ ƀơch du bơh măt Gâp, Jêh ri mâu mpât n'gơ đŏng ôh,

Yêrêmi 51:31

Tahan gak rmlak aơ tâm mâp ma rmlak ri, Lĕ nơm ntuh bâr aơ tât ma nơm ntuh bâr êng, Mbơh nau ăn ma hađăch Babilôn pô aơ Ƀon hađăch nây rai lĕ rngôch jêh.

Nau Nhĭm Vơl 3:40

Ăn he sek uănh tay hom trong he nơm, Jêh ri plơ̆ sĭt ma Brah Yêhôva.

Nau Nhĭm Vơl 5:21

Ơ Brah Yêhôva, njêng tay hom hên gay ma hên dơi plơ̆ sĭt tay! Dăn ƀư mhe tay nar khay hên nâm bu kăl e!

Êsêkiêl 33:11

Lah hom ma khân păng pô aơ: ‘Kôranh Brah Yêhôva lah: Tĭng nâm Gâp gŭ rêh mro mrăng, Gâp mâu maak ôh ma nau khĭt nơm mhĭk, ƀiălah maak yor nau păng chalơi trong păng jêh ri dơi rêh. Khân may chalơi hom, chalơi trong djơh mhĭk khân may! Mâm ƀư khân may ŭch khĭt, hơi ngih Israel?’

Ndrom Samƀŭt bơh Ôsê 14:1

Hơi Israel, plơ̆ sĭt hom ma Yêhôva Brah Ndu may, Yorlah nau tih may nơm ƀư ăn may chêh prah.

Ndrom Samƀŭt bơh Ôsê 6:1

“Văch hom, ăn he plơ̆ sĭt ma Brah Yêhôva Yorlah Păng hŏ sa hêk jêh he, ƀiălah Păng mra ƀư bah; Păng hŏ dong sôt he, ƀiălah mra put sôt.

Sakari 1:3

Pôri, may lah hom ma khân păng pô aơ Brah Yêhôva ma phung tahan lah: ‘Plơ̆ hom ndrel ma Gâp.’ Brah Yêhôva ma phung tahan lah: ‘Jêh nây mơ Gâp mra plơ̆ sĭt ndrel ma khân may.’ Kơt ri Brah Yêhôva ma phung tahan lah.

Sakari 1:4

Lơi ta ƀư nâm bu phung chô yau khân may, phung nơm mbơh lor kăl e hŏ kuăl jêh khân păng, Brah Yêhôva ma phung tahan lah: ‘Chalơi hom trong mhĭk jêh ri nau djơh janh khân may ƀư.’ Ƀiălah khân păng mâu iăt ôh, mâu lĕ ŭch gŭ mĭn ma Gâp. Pôri Brah Yêhôva lah.

Yakơ 4:8

Văch dăch hom ma Brah Ndu ri mơ Păng mra văch dăch ma khân may. Hơi phung tih, rao kloh hom ti khân may; hơi phung geh bar nuih n'hâm, ƀư kloh hom nuih n'hâm khân may;