II Kôrintô 11:13 - Nau Brah Ndu Ngơi 2023

¹³ Yorlah phung kơt nây jêng kôranh oh mon nklă, phung pah kan ndơm jan lah ƀư jêng tâm ban ma kôranh oh mon Brah Krist.

Bunong Bible Latin Script Cambodian dialect

¹³ Khân păng i nây jêng kôranh oh mon nklă, jêng mpôl mƀrôh, nklă săk khân păng nơm jan kôranh oh mon Brah Krist dơm.

Bunong

¹³ ខាន់​ពាង់​អី​នៃ​ជេង​កោរាញ​អ៝ស​ម៝ន​ងក្លាៈ ជេង​មពោល​មរោស ងក្លាៈ​ឆាក់​ខាន់​ពាង់​នើម​ជាន​កោរាញ​អ៝ស​ម៝ន​ឞ្រាស​ក្រីស  ​ទើម។

II Kôrintô 11:13 ပူးပေါင်းရင်းမြစ်များ

Yêrêmi 23:16

Brah Yêhôva ma phung tahan lah: “Lơi ta iăt ôh nau phung mbơh lor mbơh ma khân may. Khân păng srih nau kâp gân ma nau dơm dam Ngơi nau tâm saơ yor bơh khân păng nơm mĭn êng Mâu di bơh trôm mbung Brah Yêhôva lah ôh.

Yêrêmi 27:14

Lơi ta iăt ôh nau phung nơm mbơh lor lah ma khân may: ‘Khân may mâu mra pah kan ôh ma hađăch Babilôn’, yor nây nau khân păng ngơi ma khân may knŏng jêng nau mbơh lor mƀruh dơm.

Mathay 25:24

Bunuyh hŏ dơn jêh du talâng văch đŏng jêh ri lah: ‘Hơi kôranh, gâp gĭt ma may jêng du huê bunuyh dăng janh, rek tâm ntŭk may mâu mâp tăm, dônh tâm ntŭk may mâu nsrih;

Kôranh Oh Mon 15:1

Geh ƀaƀă bunuyh văch tă bơh n'gor Yuđa nti ma phung oh nâu pô aơ: “Tơlah khân may mâu koh ntâu tĭng nâm nau vay Y-Môis, khân may mâu dơi geh nau tâm rklaih ôh.”

Kôranh Oh Mon 15:24

Yor hên tăng jêh geh bar pe nuyh tâm hên, nđâp lah mâu dơn nau ntĭnh tă bơh phung hên, hŏ lah lĕ nau ƀư vĭ jêh ri ƀư rsuak nau mĭn khân may.

Kôranh Oh Mon 20:30

Tă bơh nklang phung oh nâu khân may mra dâk đŏng bunuyh nti lah âk nau tih mhĭk, gay ma ndơm phung oh mon tĭng ndô̆ khân păng.

Samƀŭt Pôl Njuăl Ăn Ma Phung Nsing Ta Ƀon Rôm 16:18

Yorlah phung pônây mâu pah kan ma Brah Krist, Kôranh Brah he ôh, ƀiălah pah kan ma ndŭl khân păng nơm; khân păng sŏk nau ngơi ueh, ngơi rnê gay ma ndơm mƀruh lĕ nuih n'hâm phung sŏng.

II Kôrintô 11:15

Yor ri, phung oh mon păng nklă jêng oh mon nau sŏng srăng, pôri mâu geh hih rhâl ôh. Nau lôch khân păng mra dơn play mhĭk tĭng nâm kan khân păng hŏ ƀư.

II Kôrintô 2:17

Yorlah, hên mâu tăch rgâl ma nau ngơi Brah Ndu nâm bu âk bunuyh êng. Ƀiălah jêng bunuyh Brah Ndu njuăl hăn, hên mbơh nkoch ma nuih n'hâm răp jăp tâm Brah Krist, tanăp Brah Ndu.

II Kôrintô 4:2

Hên dun jêh lĕ nau kan ndâp pôn jêh ri khư geh nau bêk prêng; hên mâu sŏk nau ndơm mâu lah nau nchơt nklă nau Brah Ndu ngơi ôh. Ƀiălah, hên rblang rah vah ma nau ngăn, hên ăn ma nuih n'hâm sŏng lĕ rngôch bunuyh tâm nal ma hên tanăp Brah Ndu.

Galati 1:7

Mâu geh nau mhe mhan ueh êng ôh, ƀiălah geh knŏng ƀaƀă bunuyh ƀư rsuak khân may jêh ri ŭch nsak nkhăng Nau Mhe Mhan Ueh Brah Krist.

Galati 2:4

Hên hŏ ƀư tâm ban lĕ yorlah geh ƀaƀă phung nklă jêng oh nâu, khân păng mŭt ntŭng tâm nklang hên, kâp uănh nau kon me hên geh jêh tâm Brah Yêsu Krist gay nhŭp hên ƀư dĭk.

Galati 4:17

Phung nây geh nau duh nđơr ma khân may mâu di yor ma geh nuih n'hâm ueh ôh, ƀiălah khân păng ŭch tâm nkhah tâm pă khân may đah hên gay khân may duh nđơr đah khân păng.

Galati 6:12

Lĕ bunuyh ŭch ƀư maak tĭng nâm nglay săk, srôih nchâp khân may dơn nau koh ntâu. Khân păng ƀư kơt nây gay ma khân păng mâu dơn nau bu ƀư mhĭk yor si tâm rkăng Brah Krist yơh.

Êphêsô 4:14

Kơt nây, he mâu mra hôm jêng kon se ôh, geh nau rpuh njach jêh ri rdu tĭng sial khôm nau nti nklă, tă bơh nau plĕch rlăm kon bunuyh jêh ri lĕ nau blau nklă khân păng ndơm mƀruh.

Philip 3:18

Yorlah gâp ngơi ƀaƀơ jêh nau nây ma khân may, aƀaơ aơ gâp nhĭm jêh ri ngơi đŏng: Geh âk bunuyh hŏ gŭ rêh tâm ban phung rlăng đah si tâm rkăng Brah Krist.

Philip 3:2

Uănh njrăng hom ma phung so, uănh njrăng hom ma phung pah kan djơh mhĭk, uănh njrăng hom ma phung dơn nau koh ntâu nklă!

Kôlôh 2:4

Gâp lah pô aơ gay lơi ăn geh bunuyh ƀư vĭ khân may ma nau ngơi ndơm.

Kôlôh 2:8

Njrăng hom, lơi ăn mbu ƀư dăk sân khân may ma nau ntĭm nti dŭt blau jêh ri ma nau ngơi nklă dơm dam tĭng nâm nau vay ơm bơh kon bunuyh, tĭng nâm huêng brah tâm neh ntu, ƀiălah mâu di tĭng nâm Brah Krist.

I Yôhan 2:18

Hơi phung kon jê̆, aơ jêng mông nglĕ dŭt! Khân may hŏ tăng jêh ma nơm tâm rdâng đah Brah Krist mra văch, jêh ri aƀaơ aơ geh âk jêh nơm tâm rdâng đah Brah Krist văch jêh. Yor nây, he gĭt aơ jêng mông lôch dŭt.

I Yôhan 4:1

Hơi phung gâp rŏng, lơi chroh ôh ma lĕ rngôch brah huêng, ƀiălah lŏng nâl uănh phung brah huêng nây, geh tât tă bơh Brah Ndu mâu lah mâu, yorlah geh âk nơm mbơh lor nklă mpơl jêh tâm neh ntu.

Yuđas 1:4

Yorlah geh ƀaƀă phung bunuyh mŭt ntŭng tâm nklang khân may, jêng phung kăl e hŏ tâm nal ma nau phat dôih, jêng phung mâu klach yơk, phung rgâl nau yô̆ Brah Ndu he jêng nau dơi ƀư tih, dun ma Nơm Chiă Uănh knŏng nguay jêh ri Kôranh Brah he jêng Brah Yêsu Krist.

Nau Tâm Mpơl 19:20

Ƀiălah bu nhŭp jêh mpô mpa dŭt janh nây jêh ri nơm mbơh lor nklă — nơm ƀư jêh lĕ nau mbên khlay tanăp mpô mpa, gay ndơm mƀruh ma phung bunuyh dơn jêh nau mbên tă bơh mpô mpa jêh ri phung bunuyh yơk mbah ma rup păng — bu nhŭp đŏng. Lĕ bar hê khân păng bu mƀăr rêh jŭr tâm nglao ŭnh mô ŭnh dôl hit.

Nau Tâm Mpơl 2:2

‘Gâp gĭt năl lĕ kan may ƀư jêh, nau jâk jêr may, nau may srôih. Gâp gĭt may mâu dơi dơn phung mhĭk, jêh ri rlong uănh jêh phung kơp êng săk khân păng nơm jêng kôranh oh mon, ƀiălah mâu di jêng kôranh oh mon, jêh ri may gĭt năl jêh khân păng jêng phung ngơi mƀruh.

Nau Tâm Mpơl 2:20

Ƀiălah geh nau Gâp nduyh may, nây jêng may ăn ma H'Jêsêbel, bu ur kơp êng săk păng nơm jêng nơm mbơh lor, ntĭm nti jêh ri ndơm phung oh mon Gâp, gay ma khân păng ƀư tih nau văng tĭr jêh ri sa ndơ ƀư brah ma rup brah.

Nau Tâm Mpơl 2:9

‘Gâp gĭt năl nau rêh ni jêh ri nau o ach may, ƀiălah may jêng ndrŏng ngăn! Gâp gĭt lĕ nau nchơt bơh phung kơp êng săk khân păng nơm jêng phung Yuđa, ƀiălah nanê̆ mâu di, ƀiălah khân păng jêng phung ngih rƀŭn Satan.