Êsther 3:12 - Nau Brah Ndu Ngơi 2023

¹² Tâm khay nguay, nar jât ma pe, bu kuăl rgum phung kôranh nchih samƀŭt hađăch văch tât. Tĭng nâm lĕ rngôch nau Y-Haman hŏ ntĭnh jêh, bu sŏk amoh hađăch Y-Asuêrus nchih samƀŭt nau ntrŭnh ăn ma phung kôranh oh mon hađăch, phung kôranh chiă uănh ăp n'gor jêh ri phung kôranh chiă uănh ma ăp ntil mpôl bunuyh, tĭng nâm nau ngơi ma ăp ntil mpôl bunuyh. Jêh nây khân păng tâp pŏng ma rgên hađăch.

Êsther 3:12 ပူးပေါင်းရင်းမြစ်များ

I Phung Hađăch 21:8

H'Jêsêbel sŏk amoh Y-Ahap gay nchih samƀŭt jêh ri tâp pŏng hađăch, njuăl samƀŭt nây ma phung kôranh bu ranh jêh ri ma phung bu yơk dôl gŭ ndrel tâm ƀon Y-Nabôt.

Êsra 8:36

Khân păng jao samƀŭt nau ntrŭnh bơh hađăch ma phung kôranh n'gor jêh ri ma phung kôranh mât uănh hađăch gŭ mpeh đah ri dak krong. Phung nây kâp kơl phung ƀon lan jêh ri kan ngih brah Brah Ndu.

Êsther 1:22

Hađăch njuăl samƀŭt ntrŭnh nau ăn ma lĕ rngôch n'gor bri hađăch, tĭng nâm rplay samƀŭt nchih jêh ri nau ngơi tâm ăp n'gor jêh ri ăp ntil mpôl bunuyh, jêh ri lah ma ăp nơm bu klâu jêng kôranh tâm ngih vâl păng nơm jêh ri ntăm nti tĭng nâm nau ngơi me deh.

Êsther 3:11

Hađăch lah ma Y-Haman: “Gâp jao prăk nây nđâp phung ƀon lan nây ma may, tĭng nau mĭn may ŭch ƀư đah phung khân păng.”

Êsther 8:2

Hađăch doh lơi rgên ti păng hŏ ăn jêh bơh Y-Haman jêh ri ăn ma Y-Môrdêkai. H'Êsther dơm ma Y-Môrdêkai mât uănh ngih Y-Haman.

Êsther 9:27

pôri phung Yuđa njêng ma khân păng nơm, ma phung kon sau khân păng jêh ri ma lĕ rngôch phung tâm rnglăp ndrel ma khân păng jêng du nau vay: Ăp năm djôt prăp bar nar di tĭng nâm samƀŭt, tâm mông hŏ nal jêh ăp năm, mâu dơi chalơi ôh.

Daniel 3:10

May nơm hŏ ntrŭnh nau ntăm pô aơ lĕ rngôch bunuyh tăng jêh bâr uh nŭng, bâr dĭng, bâr gong rêng, dĭng vưt, gong rêng loih, gâr jê̆ jêh ri lĕ gong kreh huy, chon mon muh măt yơk mbah ruh mah;

Daniel 6:12

Khân păng văch dăn tanăp hađăch jêh ri lah ma hađăch ma nau buay ƀư: “Ơ hađăch, mâu di hĕ may nchih amoh jêh ma du nau vay buay dôl pe jât nar mbu nơm mbơh sơm ma brah mâu lah bunuyh êng padih may bu mra klŭp nơm nây tâm trôm ntu yau mŭr nây hĕ?” Hađăch plơ̆ lah: “Di yơh, tĭng nâm nau vay phung Mêdơ jêh ri phung Persi, mâu dơi tâm rgâl ôh.”

Daniel 6:15

Ƀiălah phung nây ndrel hăn tât tanăp hađăch jêh ri lah: “Ơ hađăch, ăn may gĭt tĭng nau vay phung Mêdơ jêh ri phung Persi, lĕ rngôch nau buay mâu lah nau ntrŭnh hađăch ƀư jêh mâu dơi tâm rgâl ôh.”

Daniel 6:25

Rnôk nây hađăch Darius nchih samƀŭt ma lĕ rngôch phung ƀon lan, lĕ bri dak, lĕ nau ngơi nau gŭ lam neh ntu: “Ăn nau ueh ma khân may dơi geh nau đăp mpăn âk rmeh!

Daniel 6:8

Aƀaơ aơ, ơ hađăch ƀư hom nau buay nây jêh ri nchih amoh tâm samƀŭt gay ma nau vay mâu dơi rgâl ôh tĭng nâm nau vay phung Mêdơ jêh ri phung Persi nây.”