Êsra 10:8 - Nau Brah Ndu Ngơi 2023

⁸ Tâm pe nar, tơlah mbu mâu văch ôh tĭng nâm nau ntrŭnh bơh phung kôranh jêh ri phung bu ranh ntăm; bu mra sŏk drăp ndơ păng, jêh ri păng nơm bu nsot lơi bơh tâm phung âk ndrel ma phung bu nă mhe plơ̆ sĭt tâm n'gor.

Êsra 10:8 ပူးပေါင်းရင်းမြစ်များ

Êsra 10:7

Bu hăn mbơh lam n'gor Yuđa jêh ri Yêrusalem, kuăl lĕ rngôch phung tă bơh nau ƀư bu nă plơ̆ sĭt gay ma tâm rƀŭn ta Yêrusalem.

Êsra 10:9

Tâm pe nar, phung Yuđa jêh ri phung Benjamin tâm rƀŭn tay ta ƀon Yêrusalem tâm nar bar jât, khay sĭn. Lĕ rngôch phung ƀon lan gŭ ta ntŭk nkual toyh panăp ngih Brah Ndu, klach râm sâr ma nau nây jêh ri yor mih toyh ngăn.

Êsra 7:26

Tơlah geh bunuyh mâu ŭch tông ôh nau vay Brah Ndu may jêh ri nau vay hađăch, ăn khân may phat dôih ro ma păng, mâu lah ma nau khĭt, mâu lah ma nau ƀư dĭk, mâu lah sŏk lĕ rngôch drăp ndơ păng mâu lah krŭng.”

Nêhêmi 13:28

Du huê tâm phung kon bu klâu Y-Jôada, sau kôranh ƀư brah toyh lơn Y-Êliasip, hŏ nđăp kon druh Y-Sanbalat, phung Hôrôn, yor nau nây gâp mprơh păng du tă bơh gâp.

Nêhêmi 13:3

Tơlah phung ƀon lan hŏ tăng jêh nau vay nây, phung ƀon lan tâm nkhah lĕ phung bu năch bơh phung Israel.

Kan Lêvi 27:28

Padih nĕ, tâm lĕ rngôch ndơ nhhơr lah geh du huê bunuyh hŏ nhhơr jêh ma Brah Yêhôva, gĭt lah bunuyh mâu lah mpô mpa, mâu lah neh rnăk vâl păng, bu mâu dơi vay tăch mâu lah tâm chuai tay ôh. Lĕ rngôch mpa hŏ nhhơr jêng dŭt kloh da dê ma Brah Yêhôva.

Mathay 18:17

Tơlah păng dun, mâu ŭch dơn nau khân păng, mbơh nau nây ma Phung Ngih Brah Ndu; jêh ri tơlah păng dun mâu ŭch dơn, nau Phung Ngih Brah Ndu, may mra kơp păng nâm bu bunuyh padih mâu lah nơm riu pi.

Yôhan 16:2

Khân păng mra nsot lơi khân may luh bơh ngih rƀŭn; jêh ri mra tât mông rnôk mbu nơm ƀư nkhĭt khân may mra mĭn păng pah kan ma Brah Ndu.

Yôhan 9:22

Mê̆ mbơ̆ păng lah pônây yor klach ma phung Yuđa, yor phung Yuđa hŏ tâm lăp nau tơlah mbu nơm mbơh Brah Yêsu jêng Brah Krist, bu mprơh lơi păng luh bơh ngih rƀŭn.

Yôhan 9:34

Khân păng plơ̆ lah: “Bu deh ma may tâm nau tih, may ŭch nti hên đŏng hĕ?” Jêh nây khân păng mprơh păng luh padih.

I Kôrintô 5:13

Brah Ndu mra phat dôih ma phung padih. “Ngluh lơi hom phung bunuyh djơh mhĭk luh bơh khân may.”

Yôsuê 6:19

Lĕ rngôch prăk, mah, jêh ri lĕ glah ma kông, ma loih jêng ndơ prăp kloh ueh ma Brah Yêhôva; lĕ ndơ nây mra nglăp tâm jay prăp Brah Yêhôva.”

Phung Kôranh Phat Dôih 21:5

Phung ƀon lan Israel ôp: “Mbu tâm lĕ rngôch băl mpôl Israel mâu hăn ôh ma nau tâm rƀŭn tanăp Brah Yêhôva?” Yorlah khân păng ƀư jêh nau ton pô aơ: “Mbu moh mâu tâm mpơl măt ôh tanăp Brah Yêhôva ta Mispa bu mra nkhĭt păng!”

I Samuel 11:7

Păng sŏk bar mlâm ndrôk, koh âk glo, prơh phung mbơh djôt leo hăn lam n'gor bri Israel jêh ri mbơh pô aơ: “Mbu mâu tĭng ôh Y-Sôl jêh ri Y-Samuel hăn tâm lơh, ndrôk păng bu mra ƀư tâm ban pônây.” Brah Yêhôva ƀư ăn phung ƀon lan klach krit, jêh ri khân păng hăn tâm lơh, lĕ rngôch phung nâm du huê bunuyh.