Êsêkiêl 5:10 - Nau Brah Ndu Ngơi 2023

¹⁰ Yor ri, tâm nklang may, mbơ̆ mra sa puăch kon, kon mra sa puăch mbơ̆. Gâp mra ƀư ăn nau phat dôih tât ta may, jêh ri Gâp mra ƀư lĕ rngôch phung bunuyh may hôm e klen ăn păng nchah rai pru pra tĭng ăp mpeh sial.’”

Êsêkiêl 5:10 ပူးပေါင်းရင်းမြစ်များ

II Phung Hađăch 6:29

Pôri hên gâm kon bu klâu gâp jêh ri sa puăch păng. Ôi taơ, gâp geh lah ma păng: ‘Djôt leo hom kon ay văch ta aơ gay he sa puăch păng.’ Ƀiălah păng pôn lơi jêh kon bu klâu păng.”

Nêhêmi 1:8

Dăn Kôranh Brah kah gĭt tay nau May hŏ ntăm jêh ma Y-Môis, nơm oh mon May pô aơ: ‘Tơlah khân may ƀư tih, Gâp mra ƀư ma khân may nchah rai pru pra ta nklang phung mpôl bunuyh;

Nau Mprơ Ơm 44:11

May ăn hên jêng tâm ban ma biăp bu djôt hăn ƀư puăch Jêh ri ăn hên nchah rai pru pra tâm lĕ bri dak.

Êsai 49:26

Gâp mra ăn phung tŭn jot may sa nglay săk khân păng nơm, Nhŭl nhêt mham khân păng nơm tâm ban ma nhŭl ndrănh mhe. Lĕ rngôch bunuyh mra gĭt Gâp jêng Brah Yêhôva, Nơm Tâm Rklaih may, Jêng Nơm Tâm Chuai may, Nơm Geh Lĕ Nau Brah phung Yakôb!”

Êsai 9:20

Phung Manasê tâm rdâng đah phung Êphraim, phung Êphraim tâm rdâng đah phung Manasê, Jêh ri ndrel n'grŭp khân păng tâm rdâng ma phung Yuđa. Nđâp ma lĕ nau nây kđôi, nau Păng ji nuih mâu du ôh, Ƀiălah ti Păng ăt hôm yơr!

Yêrêmi 13:14

Brah Yêhôva lah: ‘Gâp mra ƀư ma bunuyh aơ tâm djrel đah bunuyh ri, mbơ̆ tâm tom đah kon. Gâp mra ti mâu djân, mâu yô̆, mâu nhhuach nôk Gâp ƀư rai khân păng.’”

Yêrêmi 19:9

Gâp mra ƀư ăn khân păng sa puăch phung kon bu klâu kon bu ur khân păng nơm. Dôl rnôk bu nchueng jŭm, geh phung rlăng jêh ri phung joi ŭch ƀư rai nau rêh njŭn ma nau rêh ni, khân păng sa puăch ndrăng băl khân păng nơm.’

Yêrêmi 44:12

Gâp mra sŏk lơi phung Yuđa hôm klen, jêng phung săch jêh ŭch hăn ta bri Êjipt, bu mra ƀư ngroh lơi khân păng ta nây; khân păng mra khĭt tâm bri Êjipt, mra khĭt ma tak đao mâu lah sa sât ji ngot. Ntơm bơh kon se jê̆ tât ma bunuyh toyh mra khĭt da dê yor tak đao mâu lah sa sât ji ngot. Khân păng jêng nau rak rtăp, jêng nau ma bu bêk prêng, jêng nau krit toyh, nau ƀơ̆ ƀơch jêh ri nau bu ƀư mhĭk.

Yêrêmi 49:32

Sŏk seh samô khân păng ƀư ndơ bu pit in, Phung biăp âk khân păng ƀư ndơ sa kah. Gâp mra srih tĭng ăp mpeh rlong sial Đơ phung poih sŏk bar đah n'geng tôr; Gâp mra ăn nau mhĭk tât tă bơh ăp ntŭk jŭm khân păng.” Brah Yêhôva lah pônây.

Yêrêmi 49:36

Gâp mra ƀư sial tă bơh puăn njônh khôm tât ma bri Êlam. Gâp mra ƀư ma khân păng du chah rai pru pra ăp puăn njônh sial nây; mâu geh bri dak mâu geh phung bu mprơh tă bơh ma Êlam.

Yêrêmi 50:17

Israel jêng du mlâm biăp nhhơt jêh phung yau mŭr tĭng kăp. Ntơm saơm hađăch Asiri tĭng rvăn păng, jêh ri rlet pakơi aơ jêng Y-Nêbukatnetsar, hađăch Babilôn, gĭnh nting păng.”

Yêrêmi 9:16

Gâp mra ƀư ăn khân păng nchah rai pru pra ta nklang ndŭl mpôl bunuyh khân păng jêh ri phung chô yau khân păng mâu mâp gĭt; Gâp hôm njuăl tak đao hăn tĭng kŏ tât hŏ ƀư rai khân păng.”

Nau Nhĭm Vơl 2:20

Ơ Brah Yêhôva dăn mêt uănh! Mbu may hŏ ƀư nâm bu pô aơ? Mâm ƀư me păng sa lơi play proch khŭng păng nơm, Nây jêng phung kon păng nơm dôl ut ra u tâm ti? Mâm ƀư kôranh ƀư brah jêh ri nơm mbơh lor Geh lĕ bu nkhĭt tâm jrô kloh ueh Kôranh Brah?

Nau Nhĭm Vơl 4:10

Bar ti mê̆ bêng ma nuih n'hâm yô̆ klâng ngăn, Hôm gâm puăch kon păng nơm; Njêng khân păng jêng ndơ sông sa Tâm nôk bu jot plên phung bu ur ƀon lan gâp.

Nau Nhĭm Vơl 4:16

Brah Yêhôva hŏ ƀư chah rai khân păng, Păng mâu uănh treng khân păng đŏng ôh. Kôranh ƀư brah mâu nănh n'gơr măt, Phung bu ranh mâu geh nau bu yơk ôh.

Nau Nhĭm Vơl 4:3

Rlau ma nĕ phung so bri Hôm e ăn toh ma kon pu, Ƀiălah kon bu ur phung ƀon lan gâp janh ngăn, Nâm bu sĭm klang kŭk tâm bri rdah.

Êsêkiêl 12:14

Phung gŭ jŭm hađăch gay kơl păng jêh ri phung tahan gâp mra ƀư chah rai pru pra tĭng phŭt sial jêh ri Gâp mra tŏk đao tĭng khân păng.

Êsêkiêl 12:15

Dôl Gâp ƀư chah rai ăn khân păng nhhơt tâm phung mpôl băl bunuyh jêh ri srih khân păng tâm ăp bri dak khân păng mra gĭt Gâp jêng Brah Yêhôva.

Êsêkiêl 17:21

Lĕ rngôch phung tahan păng nchuăt du mra chôt khĭt tâm dâng đao; phung hôm e klen mra chah-rai pru pra du tĭng lĕ rngôch rlong sial. Rnôk nây, khân may mra gĭt Gâp nơm, jêng Brah Yêhôva lah jêh pônây.’

Êsêkiêl 20:23

Tâm ban lĕ Gâp hŏ yơr ti ton đah khân păng tâm bri rdah pô aơ Gâp mra ƀư ma khân păng chah rai pru pra ta nklang lĕ rngôch phung ƀon lan jêh ri mprơh du tâm âk bri dak,

Êsêkiêl 22:15

Gâp mra ƀư ma may chah rai pru pra du ta nklang ntil mpôl bunuyh êng, mprơh may lam bri dak êng, jêh ri Gâp mra ƀư rai lơi nau ƀơ̆ ƀơch tă bơh nklang may.

Êsêkiêl 36:19

Gâp hŏ ƀư nchah rai nhhơt jêh khân păng tâm phung ƀon lan jêh ri khân păng lĕ pru pra lam bri dak êng; Gâp hŏ phat dôih khân păng tĭng trong jêh ri kan khân păng pah.

Êsêkiêl 5:12

Du kô̆ tâm pe tâm phung ƀon lan may mra khĭt ma nau ji tưp, mra djoh jêh ma nau ât ji ngot ta nklang may; du kô̆ tâm pe mra khĭt ma đao gŭ jŭm may; bi du kô̆ tâm pe đŏng Gâp mra ƀư nchah rai pru pra tĭng ăp mpeh sial jêh ri Gâp tŏk đao hăn tĭng khân păng.

Êsêkiêl 5:2

Tơlah lĕ lôch jêh lĕ nar nchueng ƀon, ăn may su lơi tâm ŭnh du kô̆ tâm pe sŏk nây ta nklang ƀon, jêh nây sŏk du kô̆ tâm pe êng ăn may dŏng đao lơh păng ta jŭm ƀon. Jêh ri nglĕ dŭt nây dŏng du kô̆ tâm pe ăn may ntô̆ tâm sial yorlah Gâp nơm ro mra tŏk đao tĭng pakơi.

Êsêkiêl 6:8

Ƀiălah, Gâp mra om phung ƀaƀă, yorlah mra geh phung ƀaƀă hŏ klaih tă bơh chông đao dôl khân may du pru pra tâm lĕ bri dak.

Daniel 9:7

Ơ Kôranh Brah, nau sŏng srăng jêng ndơ May bi ma nau bêk jêng ma hên, nâm bu nar aơ, jêng ma phung Yuđa, phung gŭ tâm ƀon Yêrusalem, lĕ rngôch phung Israel, phung gŭ dăch tâm ban lĕ nâm bu phung gŭ ngai, tâm lĕ rngôch bri dak May nsot jêh khân păng văch yor nau djơh mhĭk khân păng hŏ ƀư jêh đah May.

Kan Lêvi 26:29

Khân may mra sa puăch kon bu klâu kon bu ur khân may nơm;

Kan Lêvi 26:33

Gâp mra nkhah khân may lam phung ndŭl mpôl bunuyh jêh ri tŏk đao gưm tĭng lơh khân may. Neh khân may mra jêng ntŭk rngol, ƀon toyh khân may mra jêng rngot rklăk.

Amôt 9:9

“Yorlah aơ, Gâp mra ntĭnh jêh ri mra ƀư nchah rai ngih Israel ta nklang lĕ rngôch mpôl băl bunuyh Nâm bu nsiăng ba ƀlê tâm dông Ƀiălah mâu geh du găr jê̆ mra tŭp ôh ta neh.

Sakari 2:6

Brah Yêhôva lah: “Hơi, hơi! Du hom tă bơh bri mpeh pa lơ, yorlah Gâp hŏ srih khân may pru pra nâm bu puăn njônh sial tâm trôk.” Brah Yêhôva lah.

Sakari 7:14

Gâp ƀư ăn pru pra khân păng nâm bu sial vănh blông ta nklang lĕ rngôch ntil mpôl bunuyh khân păng mâu mâp gĭt năl ôh. Pôri bri neh pakơi khân păng kŏ tât jêng rngol mâu hôm geh ôh bunuyh brô̆ nsong. Khân păng hŏ ƀư ăn bri dak ueh maak jêng rngot.’”

Luka 21:24

Bu mra nkhĭt khân păng ma đao bu njŭn khân păng jêng bu nă tâm lĕ rngôch mpôl băl, jêh ri phung bu năch mra jot ƀon Yêrusalem tâm dâng jâng khân păng, tât rnôk phung bu năch mra ƀư lĕ.

Nau Vay Nkah Tay 28:64

Brah Yêhôva mra ăn khân may chah rai ta nklang lĕ rngôch phung ƀon lan, ntơm bơh dŭt bri neh đah aơ ma dŭt bri neh đah ri. Ta nây, khân may mra pah kan ma phung brah êng ƀư ma si, ƀư ma lŭ, lĕ khân may nđâp phung chô yau khân may mâu hŏ mâp gĭt ôh.

Nau Vay Nkah Tay 32:26

Gâp ŭch mĭn jêh: ‘Gâp mra nchah rai khân păng ăp ntŭk, Jut ƀhiau nau ndray ma khân păng bơh phung bunuyh.’

Nau Vay Nkah Tay 4:27

Brah Yêhôva mra tâm nkhah khân may ta nklang phung ndŭl mpôl bunuyh, knŏng hôm e djê̆ dơm tâm ăp bri dak, ntŭk Brah Yêhôva mra nsot khân may tât.