Êsêkiêl 30:9 - Nau Brah Ndu Ngơi 2023

⁹ Tâm nar nây, lĕ rngôch phung mbơh Gâp mprơh hăn ma kumpăn mra ƀư ăn ma phung Êthiôpi dôl geh nau đăp mpăn mra klach ngăn. Phung ƀon lan mra rngot tâm nar geh nau mhĭk tât Êjipt, yorlah aơ, nar nây tât ngăn!

Êsêkiêl 30:9 ပူးပေါင်းရင်းမြစ်များ

Êsai 19:17

Rnôk nây, bri Yuđa mra jêng du nau klach krit ma bri Êjipt. Ăp tơ̆ bu nkah ma Yuđa lĕ rngôch bu klach da dê, yorlah nau dăp dơm Brah Yêhôva ma phung tahan ŭch ƀư nau tâm rmal ma Êjipt.

Êsai 20:3

Brah Yêhôva lah tay: “Tâm ban ma oh mon Gâp jêng Y-Êsai hŏ hăn săk hưl jêh ri jâng dơm tâm pe năm jêng du nau tâm mbên jêh ri nau mbơh ma bri Êjipt jêh ri ma bri Kus,

Êsai 20:5

Rnôk nây, mbu uănh bri Kus jêng nau kâp gân, jêh ri uănh Êjipt jêng nau hưn ma păng mra klach krit jêh ri bêk prêng.

Êsai 23:5

Tơlah nau mhe mhan nây tăng tât ta bri Êjipt, Lah tăng nau mhe mhan ma ƀon Tyre bu mra rngot ngăn.

Êsai 47:8

Aƀaơ aơ iăt hom nau aơ, ơ nơm rêh ma nau ueh, Nơm gŭ ma nau đăp rmên, Tâm nuih n'hâm ay nơm lah êng: “Knŏng gâp yơh, rlau ma gâp mâu geh nơm êng ôh; Gâp mâu mra jêng ndrô sai ôh, Mâu lĕ gĭt mâp roh phung kon gâp ôh.”

Yêrêmi 49:21

Nau nteh rlâm tŭp khân păng ƀư neh ntu mra n'găr, nau nter khân păng tât ta Dak Mƀŭt Chăng.

Yêrêmi 49:31

Brah Yêhôva lah: “Dâk hom, rduh lơh du phung ndŭl mpôl mâu geh nau mĭn rvê ôh, Dôl gŭ đăp mpăn, Mpông mâu geh nchăng, mâng rnăng mâu nđăng Jêng du ntŭk gŭ êng.

Êsêkiêl 24:14

Gâp, Brah Yêhôva, hŏ lah jêh nau nây mra geh tât. Gâp mra ƀư, Gâp mâu mra plơ̆ rŭch ôh, mâu yô̆ ôh, mâu tâm rgâl nau mĭn ôh. Bu mra phat dôih may tĭng nâm trong jêh ri kan may pah,’ Kôranh Brah Yêhôva lah pônây.”

Êsêkiêl 26:16

Lĕ rngôch phung kôranh tâm nkual dak mƀŭt mra trŭnh tă bơh sưng hađăch khân păng nơm da dê, doh lơi ao jâr jêh ri doh lơi ao cheh chiăk. Khân păng geh nau klach nchueng jŭm jêh ri gŭ rvel ta neh. Khân păng râm nsâr ƀaƀơ, jêh ri klach ngăn yor may.

Êsêkiêl 27:35

Lĕ rngôch phung ƀon lan gŭ tâm lĕ gôl dak mƀŭt Hih rhâl da dê yor may; Lĕ hađăch khân păng klach ngăn, Muh măt rgâl yor nau rvê.

Êsêkiêl 33:33

Yorlah, pônây, tơlah nau mhĭk aơ geh tât, jêh ri aơ, păng dôl tât, nôk nây khân păng gĭt geh du huê nơm mbơh lor gŭ jêh ta nklang khân păng.”

Êsêkiêl 38:11

May mra lah: ‘Gâp mra hăn tât lơh bri dak geh ƀon mâu geh mpêr ôh, gâp mra hăn tât ndrel phung ƀon lan gŭ mpăn, đăp rmên, nây jêng lĕ rngôch phung gŭ tâm ntŭk mâu geh mpêr ôh, mâu geh ôh rnăng mpông jêh ri mâu geh mpông.

Êsêkiêl 39:6

‘Rnôk aơ, Gâp mra njuăl ŭnh tŭp ma bri Magôk jêh ri ma phung gŭ nau mpăn tâm lĕ gôl dak mƀŭt jêh ri khân păng mra gĭt Gâp jêng Brah Yêhôva.

Amôt 4:2

Kôranh Brah Yêhôva hŏ dŏng nau kloh ueh Păng sơm ton pô aơ: “Mông nar mra tât ma khân may, Bu mra djôt nglĕ nklĕ nhŭp khân may, Dŏng nglĕ ndar gay nhŭp phung hôm gŭ rêh klen tâm phung khân may.

Habakuk 2:3

Yorlah nau tâm saơ hôm e kâp rnôk tât geh nau tâm di; Păng văch gơnh hăn tât ntŭk nglĕ dŭt, mâu mƀruh ôh. Tơlah păng băt tât, ăn gŭ kâp ƀât; N'hêl nanê̆ păng mra tât, mâu mbrĕ mbrơi ôh.

Sôphôni 2:12

“Bi khân may, hơi phung ƀon lan Kus! Khân may mra khĭt ma đao Gâp.”

Sôphôni 2:15

Ƀon toyh aơ răm maak hŏ gŭ jêh ma nau mpăn lah êng pô aơ: “Gâp aơ, padih gâp mâu hôm geh bunuyh êng ôh!” Ƀiălah aƀaơ păng lĕ jêng rngol jêh, Ƀư ntŭk ma phung mpô mpa bri bê̆ch kuen! Ăp bunuyh hăn rgăn gơm mưch rvêh ti nsŭch da dê!

I Têsalônik 5:2

yorlah khân may nơm gĭt rah vah pô aơ nar Kôranh Brah mra tât nâm bu bunuyh ntŭng dôl măng.

Phung Kôranh Phat Dôih 18:7

Pônây, prăm nuyh bu klâu nây dâk hăn tât ta ƀon toyh Lais, saơ phung ƀon lan gŭ ta nây hăn tĭng nâm nau vay phung Sidôn, gŭ rêh đăp mpăn, mâu rŭng răng ôh jêh ri mâu geh njrăng. Mâu geh nơm nduyh ma kôranh chiă uănh tâm ƀon toyh nây. Khân păng gŭ ngai đah phung Sidôn, jêh ri mâu geh tâm rnglăp đah bu ôh.