Êsêkiêl 28:2 - Nau Brah Ndu Ngơi 2023

² “Hơi kon bunuyh, lah hom ma hađăch Tyre pô aơ: Kôranh Brah Yêhôva lah: ‘Yorlah nuih n'hâm may sưr ngăn, May lah pô aơ: “Gâp jêng du huê brah, Gâp gŭ ta sưng hađăch lĕ brah, Ta nklang dak mƀŭt.” Ƀiălah may knŏng jêng bunuyh mâu di jêng brah ôh, Nđâp tơlah n'hao êng nuih n'hâm may nơm Tâm ban ma nuih n'hâm brah kloh ueh.

Êsêkiêl 28:2 ပူးပေါင်းရင်းမြစ်များ

Nau Ntơm 3:5

Yorlah Brah Ndu gĭt lah khân may sa play nây pôri măt mra lin, jêh ri khân may mra jêng nâm bu Brah Ndu, gĭt nau ueh jêh ri nau mhĭk.”

II Nau Rêh Jêng 26:16

Ƀiălah tơlah Y-Usia hŏ geh jêng jêh, păng geh nuih n'hâm sưr ƀư ăn ma păng nơm roh rai. Păng ƀư tih đah Yêhôva Brah Ndu păng, yorlah păng hŏ lăp tâm ngih Brah Yêhôva gŭch ndơ ƀâu kah ta Nơng ƀư brah gŭch ndơ ƀâu kah.

Nau Mprơ Ơm 9:20

Ơ Brah Yêhôva; ƀư ăn khân păng klach krit. Ăn phung ƀon lan gĭt khân păng jêng knŏng bunuyh nglay săk. (Sêla)

Nau Hôr 16:18

Nau sưr hăn lor, nau rai lôch groi pakơi, Jêh ri nau n'hao êng nơm hăn lor tâm nau tŭp.

Nau Hôr 18:12

Nuih n'hâm sưr hăn lor ma nau rai lôch, Ƀiălah nau dêh rhêt hăn panăp ma nau yơk.

Êsai 2:12

Yorlah Brah Yêhôva ma phung tahan hŏ tâm nal jêh du nar Tâm rdâng đah phung sưr, ma phung rnam, jêh ri ma phung n'hao êng khân păng nơm; Bu mra n'glưh lơi khân păng.

Êsai 23:8

Mbu nơm lĕ dăp nal jêh nau nây tâm rdâng ma Tyre, Jêng ƀon hŏ ndô đon hađăch? Phung tăch rgâl păng jêng phung lư rnam, Phung tăch rgâl păng jêng phung bu yơk tâm neh ntu.

Êsai 31:3

Phung Êjipt knŏng jêng bunuyh dơm, mâu di jêng Brah Ndu ôh; Seh ndơ tâm lơh khân păng knŏng jêng nglay săk, mâu di jêng huêng brah ôh. Tơlah Brah Yêhôva yơr ti Păng, Nơm kơl mra ndĭt ndĭu, nơm geh nau kơl mra prah jŭr, Lĕ rngôch khân păng mra rai yot ndrel n'grŭp.

Êsai 47:8

Aƀaơ aơ iăt hom nau aơ, ơ nơm rêh ma nau ueh, Nơm gŭ ma nau đăp rmên, Tâm nuih n'hâm ay nơm lah êng: “Knŏng gâp yơh, rlau ma gâp mâu geh nơm êng ôh; Gâp mâu mra jêng ndrô sai ôh, Mâu lĕ gĭt mâp roh phung kon gâp ôh.”

Êsêkiêl 16:49

Aơ jêng nau djơh mhĭk oh bu ur ay jêng ƀon Sôdôm: Păng jêh ri phung kon bu ur păng geh nau sưr, ndơ sông sa rlau keh, jêh ri kơr ƀlao, ƀiălah păng mâu kơl ôh phung o ach jêh ri phung mâu geh ndô ndơ.

Êsêkiêl 26:17

Khân păng mra mprơ ma may nau mprơ rngot ma may pô aơ: ‘Mâm dĭng bu ƀư rai may, roh tă bơh dak mƀŭt? Hơi ƀon toyh geh nau lư n'găr, Jêh ri nâp ngăn gŭ ta nklang dak mƀŭt Jêng ntŭk may hăn gŭ tâm dak mƀŭt. May ndrel ma phung gŭ tâm may Ƀư ăn ma lĕ rngôch bunuyh klach krit ngăn.

Êsêkiêl 28:1

Geh nau Brah Yêhôva lah ma gâp:

Êsêkiêl 28:17

Nuih n'hâm may sưr rlau yor nau ueh may, Jêh ri yor nau chrêk rmah may ƀư ăn djơh nau blau mĭn may nơm. Gâp nklơ̆ may tâm neh, Dơm may panăp măt phung hađăch, Ƀư nau pâl ăn khân păng uănh.

Êsêkiêl 28:9

Tanăp phung nkhĭt may, May dơi janh lah pô aơ lĕ “gâp jêng brah”? Dôl may gŭ tâm ti phung ƀư rmanh may Pôri may jêng bunuyh đŏng mâu di hĕ jêng brah.

Êsêkiêl 29:3

Ngơi hom: Kôranh Brah Yêhôva lah: ‘Hơi Pharaôn, hađăch Êjipt, Aơ, Gâp tâm rdâng đah may, May jêng mpa djơh toyh juat Rvel ta nklang lĕ dak krong. May lah pô aơ: “Dak krong Nil jêng ndơ Gâp nơm Gâp nơm yơh hŏ njêng jêh păng.”

Êsêkiêl 29:9

N'gor bri Êjipt mra jêng rngol, nsoih dơm jêh ri khân păng mra gĭt Gâp jêng Brah Yêhôva.’ Yorlah Pharaôn geh lah jêh pô aơ: ‘Dak krong Nil jêng ndơ gâp, gâp hŏ njêng jêh păng.’

Êsêkiêl 31:10

Yor nây, Kôranh Brah Yêhôva lah: ‘Yorlah păng toyh prêh, chiông păng prêh kŏ ban tŭk jêh ri nuih n'hâm păng sưr rlau yor nau păng toyh prêh nây,

Daniel 11:12

Tơlah tâm lơh dơi jêh đah phung tahan nây, hađăch mpeh pa dâng geh nuih n'hâm sưr. Păng mra nkhĭt âk rbăn, âk rmưn phung rlăng ƀiălah păng mâu dơi ôh.

Daniel 11:36

Hađăch mpeh pa lơ mra ƀư tĭng nâm păng ŭch, păng mra n'hao êng păng nơm, yơk păng nơm ta klơ lơn ma lĕ rngôch brah. Păng mra ngơi nau sưr tâm rdâng đah Brah Ndu ma lĕ rngôch brah. Păng mra dơi kŏ tât lôch nau ji nuih, yorlah moh nau Brah Ndu lĕ nal pôri mra dơi ƀư ngăn.

Daniel 11:37

Hađăch nây mâu mra chrê ôh ma phung brah phung chô yau păng mâu lah brah phung bu ur rŏng. Păng mâu mra uănh lĕ brah jêng khlay ôh; yorlah n'hao êng păng nơm klơ lơn ma lĕ rngôch.

Habakuk 2:4

Uănh hom, phung sưr rlau Mâu geh ôh nuih n'hâm sŏng; Ƀiălah bunuyh sŏng srăng mra gŭ rêh yor nau chroh păng nơm.

Sôphôni 2:15

Ƀon toyh aơ răm maak hŏ gŭ jêh ma nau mpăn lah êng pô aơ: “Gâp aơ, padih gâp mâu hôm geh bunuyh êng ôh!” Ƀiălah aƀaơ păng lĕ jêng rngol jêh, Ƀư ntŭk ma phung mpô mpa bri bê̆ch kuen! Ăp bunuyh hăn rgăn gơm mưch rvêh ti nsŭch da dê!

Sakari 9:2

Nau ngơi nây hŏ lah đŏng ma ƀon Hamat, dăch n'har bri đah ƀon Damas, Jêh ri lah ma ƀon Tyre, ƀon Sidôn, jêng ƀon geh nau blau mĭn ngăn.

Luka 14:9

Nơm kôranh nau song sa lah đah may: ‘Ăn hom ntŭk ma bunuyh aơ gŭ,’ nôk nây may mra prêng yorlah mra hăn gŭ ta ntŭk nglĕ dŭt.

Nau Vay Nkah Tay 8:14

nôk nây nuih n'hâm khân may sưr rlau, chuêl hêng Yêhôva Brah Ndu jêng Nơm hŏ njŭn leo khân may luh bơh n'gor Êjipt, jêng bơh vâl dĭk bu.

II Têsalônik 2:4

nâm bu ntĭt nơm tâm rdâng, n'hao êng păng nơm ta klơ ma lĕ rngôch nau bu rnha jêng brah mâu lah ma ndơ bu yơk mbah, kŏ tât păng gŭ tâm ngih Brah Ndu, kơp êng păng nơm jêng Brah Ndu.

I Timôthê 3:6

Du huê mhe chroh mâu dơi jan kôranh chiă uănh, klach lah bêng ma nau sưr ƀư ma păng tŭp tâm nau phat dôih prăp ma phung brah mhĭk.

I Pêtrôs 5:5

Tâm ban lĕ, phung druh ndăm tông hom ma phung kôranh bu ranh. Lĕ rngôch bunuyh nsoh hom nau dêh rhêt gay ƀư ueh ndrăng khân may; yorlah Brah Ndu tâm rdâng đah phung sưr, ƀiălah ăn nau yô̆ ma phung dêh rhêt.

Nau Tâm Mpơl 17:3

Huêng Brah ntrŭt ntrôl tâm gâp, jêh ri tông mpăr njŭn leo gâp mŭt tâm bri rdah. Ta nây, gâp saơ du huê bu ur gŭ ta klơ du mlâm mpô mpa dŭt janh chăng rhưch geh pơh mlâm bôk, jât mlâm nke, jêh ri ta săk păng djôt bêng ma lĕ amoh nau sưr rlau.

Nau Tâm Mpơl 18:7

Păng tâm rnê êng ma păng nơm jêh ri gŭ rêh dŭt ndrŏng dŭt maak, Ri mơ ƀư hom ma păng dơn nau rêh ni jêh ri nau klâng ndrê kơt nây đŏng. Yorlah păng lah tâm nuih n'hâm pô aơ: ‘Gâp gŭ jêh tâm ban ma hađăch bu ur! Gâp mâu di jêng bu ur ndrô, Gâp mâu mra geh nau klâng rvê ôh.’