Êsêkiêl 13:22 - Nau Brah Ndu Ngơi 2023

²² Yorlah khân may sŏk nau nchơt mƀruh ƀư rngot nuih n'hâm phung sŏng srăng nđâp lah Gâp mâu mâp ƀư rdja nuih khân păng ôh. Ƀiălah khân may ƀư ma ti phung ƀai ktang lơn gay ma khân păng mâu chalơi ôh bơh trong nau mhĭk păng gay dơi geh nau rêh.

Êsêkiêl 13:22 ပူးပေါင်းရင်းမြစ်များ

Êsai 28:15

Yorlah khân may lah jêh: “Hên hŏ ƀư jêh nau tâm rnglăp đah nau khĭt, Hên geh du nau tâm rnglăp đah ƀon phung khĭt Lah nau tât geh ƀư rai rmeh ler rgăn Mâu mra tât ma hên ôh. Yorlah hên sŏk jêh nau mƀruh jêng ntŭk hên nsing, Sŏk nau ndơm jêng ntŭk hên du krap.”

Yêrêmi 23:14

Ƀiălah nklang phung mbơh lor gŭ ta Yêrusalem, Gâp hŏ saơ jêh nau mhĭk: Khân păng ƀư tih văng tĭr, chuat hăn tâm nau mƀruh; Khân păng ƀư ntop nau dăng ktang ăn ma ti phung ƀai, Kŏ tât mâu geh bunuyh chalơi nau mhĭk khân păng. Gâp uănh lĕ rngôch khân păng nâm bu Sôdôm, Jêh ri phung ƀon lan gŭ ta Yêrusalem nâm bu Gômôrơ.”

Yêrêmi 23:17

Khân păng lah ƀaƀơ đah phung tâm rmot ma Gâp pô aơ: ‘Brah Yêhôva lah: Khân may mra geh nau đăp mpăn.’ Jêh ri lah ma phung geh nuih n'hâm dăng: ‘Mâu geh nau mhĭk mra tât ma khân may ôh.’

Yêrêmi 23:9

Ma lĕ nơm mbơh lor: Nuih n'hâm gâp lĕ nchah rai; Nting nđăng Gâp lêt rgănh; Gâp nâm bu bunuyh nhŭl ndrănh, Nâm bu bunuyh nhŭl ndrănh hâu ngăn yor ndrănh, Yor Brah Yêhôva Yor lĕ rngôch nau kloh ueh Păng.

Yêrêmi 28:16

Yor nây, Brah Yêhôva lah: ‘Aơ, Gâp mra mprơh may bơh klơ neh ntu. Năm aơ yơh may mra khĭt yorlah may hŏ ƀư nau uh ah tâm rdâng đah Brah Yêhôva.’”

Yêrêmi 29:31

“Njuăl hom samƀŭt aơ tât ma lĕ rngôch phung bu hŏ veng jêh: Brah Yêhôva lah ma Y-Sêmaya, bunuyh ƀon Nêhêlam kơt aơ: ‘Y-Sêmaya hŏ mbơh lor jêh ma khân may, ƀư ma khân may rnơm ma nau ngơi mƀruh, Gâp mâu mâp mprơh păng ôh.’

Yêrêmi 29:32

Yor nây, Brah Yêhôva lah: ‘Aơ, Gâp mra tâm rmal Y-Sêmaya, bunuyh ƀon Nêhêlam, jêh ri ndŭl deh păng. Mâu hôm geh du huê tâm Noi deh păng dơi rêh tâm nklang phung ƀon lan nây. Păng nơm ăt mâu mra saơ nau ueh Gâp mra ƀư ma phung ƀon lan Gâp, yorlah păng hŏ ngơi nau tâm rdâng đah Brah Yêhôva,’” Yêhôva lah pônây.

Yêrêmi 34:16

Ƀiălah khân may hŏ plĕch nau mĭn jêh ri ƀư mhĭk amoh Gâp. Khân may plơ̆ nhŭp tay phung dĭk, bu klâu tâm ban ma bu ur, khân may lĕ ăn kon me jêh tĭng nâm khân păng ŭch, nchâp khân păng plơ̆ tay ƀư dĭk ma khân may tâm ban saơm.

Yêrêmi 34:22

Brah Yêhôva lah: ‘Aơ, Gâp mra ntĭnh ăn ma khân păng plơ̆ tay ma ƀon aơ; khân păng mra lơh, mra pit in, jêh ri sŏk ŭnh su ƀon nây. Gâp mra ƀư lĕ rngôch ƀon n'gor Yuđa mra jêng rngot njăp, mâu geh ƀon lan gŭ ôh.’”

Yêrêmi 4:10

Gâp lah ro: “Ơ! Kôranh Brah Yêhôva! Nanê̆ May hŏ ndơm phung ƀon lan aơ jêh ri Yêrusalem jêh. May ton: ‘Khân may mra dơi geh nau đăp mpăn,’ pôri đao dôl kêng trô ko!”

Yêrêmi 6:14

Khân păng ƀư bah sôt rmanh phung ƀon lan Gâp ma nau ƀlơr, Jêh nây lah: ‘Đăp mpăn! Đăp mpăn!’ Mâu geh nau đăp mpăn ôh.

Yêrêmi 8:11

Khân păng ƀư bah sôt rmanh kon bu ur phung ƀon lan Gâp ma nau ƀlơr, Jêh nây lah: “Đăp mpăn! đăp mpăn!” Ƀiălah mâu geh nau đăp mpăn ôh.

Êsêkiêl 13:16

Khân păng jêng phung nơm mbơh lor Israel mbơh lor lah ma Yêrusalem jêh ri uănh nau tâm saơ đăp mpăn ma ƀon nây ƀiălah mâu geh nau nđăp mpăn ôh, Kôranh Brah Yêhôva lah pônây.”’

Êsêkiêl 18:21

Ƀiălah tơlah bunuyh ƀai chalơi lĕ rngôch nau tih păng hŏ ƀư jêh, djôt prăp lĕ rngôch nau vay Gâp; tơlah păng ƀư nau sŏng, nau di, păng mra rêh mâu khĭt ôh.

Êsêkiêl 18:27

Tơlah du huê bunuyh mhĭk chalơi lĕ nau mhĭk păng hŏ ƀư jêh ri păng ƀư tĭng nau sŏng nau di pôri păng mra tâm rklaih huêng păng nơm.

Êsêkiêl 9:4

jêh ri lah: “Hăn hom rgăn lam ƀon, jêng ƀon Yêrusalem, jêh ri nchih nau mbên ta ndăr kleng phung bunuyh vơl nter, nhĭm nhhiăng ma lĕ rngôch nau mhĭk hŏ ƀư tih jêh nklang ƀon aơ.”

Amôt 5:12

Yorlah Gâp gĭt nau ƀư tih khân may âk ir, Nau tih khân may mâu hôm dơi kơp; Khân may tŭn jot phung sŏng srăng, Dơn sŏk drăp bu blŏl, Jêh ri mâu koh dŏng nau di ma phung o ach tâm ntŭk mpông ƀon.