Êsai 57:5 - Nau Brah Ndu Ngơi 2023

⁵ Khân may ƀư nau văng tĭr ndrăng khân may ta meng tơm si têrêbin, Tâm dâng lĕ rngôch tơm si ndrêh, Khân may nkhĭt phung kon khân may nơm ƀư mpa ƀư brah tâm rlŭng, Tâm lĕ rkâp lŭ!

Êsai 57:5 ပူးပေါင်းရင်းမြစ်များ

I Phung Hađăch 14:23

Khân păng ndâk đŏng ăn ma khân păng nơm lĕ ntŭk prêh klơ, n'gâng mbah jêh ri rup brah Asêrah ta klơ lĕ gôl yôk prêh jêh ri tâm dâng lĕ tơm si dŭt pŭm.

II Phung Hađăch 17:10

Khân păng ndâk ma khân păng nơm lĕ n'gâng mbah ƀư ma lŭ jêh ri rup brah bu ur Asêrim ta lĕ rngôch ntŭk klơ jêh ri tâm dâng lĕ rngôch tơm si ndrêh.

II Phung Hađăch 17:7

Nau aơ tât geh yorlah phung ƀon lan Israel ƀư tih jêh ma Yêhôva Brah Ndu khân păng, jêng Nơm hŏ ngluh jêh khân păng luh bơh Êjipt jêh ri luh bơh tâm ti Pharaôn, hađăch Êjipt. Khân păng hŏ yơk mbah jêh ma lĕ brah êng,

II Phung Hađăch 23:10

Păng ƀư ƀơ̆ đŏng ntŭk Tôphet, tâm rlŭng Ben-Hinôm, gay mâu hôm geh ôh du huê dŏng ntŭk nây gay gŭch kon bu klâu păng mâu lah kon bu ur păng tâm ŭnh gay ƀư ndơ nhhơr ma brah Môlek.

II Nau Rêh Jêng 28:3

Păng su ndơ ƀâu kah tâm rlŭng Ben-Hinôm, jêh ri su kon păng nơm tâm ŭnh jêng ndơ ƀư brah, tĭng nâm nau vay ƀơ̆ ƀơch tâm phung mpôl băl bunuyh Brah Yêhôva hŏ mprơh du jêh tă bơh phung ƀon lan Israel.

Nau Ngluh Êjipt 32:6

Ôi taơ phung ƀon lan dâk ơm ôi, nhhơr lĕ ndơ ƀư brah gŭch jêh ri ndơ ƀư brah ma nau đăp mpăn. Khân păng gŭ sông sa nhêt, Jêh nây dâk pâl ntalơ̆.

Êsai 1:29

Pôri may mra bêk yor ma tơm si Khân may rŏng; Jêh ri đit prêng yor ma ntŭk n'gar trao Khân may săch jêh.

Yêrêmi 17:2

Gay kon sau khân păng kah gĭt tay ma nơng ƀư brah Jêh ri lĕ n'gâng mbah Asêrim, Êp lĕ pŭm si âk n'ha Ta klơ lĕ dor prêh.

Yêrêmi 2:20

“Bơh jŏ Gâp hŏ nkê̆ch pă mâng mbăk, Tôch lơi rse rvăk ma may, Ƀiălah may ngơi: ‘Gâp mâu mra pah kan đŏng ôh.’ N'hêl nanê̆ ngăn, klơ ăp yôk prêh, Tâm dâng ăp pŭm tơm si âk n'ha, May kŭnh bôk nâm bu bu ur văng tĭr.

Yêrêmi 3:13

‘Knŏng ŭch may dơn saơ nau tih may pô aơ: May hŏ tâm rdâng đah Yêhôva Brah Ndu; May hŏ nsong lam ntŭk tĭng brah phung bu năch tâm dâng ăp pŭm tơm si âk n'ha, Jêh ri mâu rkêng tôr ôh iăt nau Gâp.’” Brah Yêhôva lah pônây.

Yêrêmi 3:6

Tâm rô̆ hađăch Y-Jôsia chiă uănh, Brah Yêhôva lah ma gâp: “May saơ đŏng nau mâu răp jăp tâm phung Israel hŏ ƀư? Khân păng hŏ hao ăp yôk prêh, tât tâm dâng pŭm tơm si âk n'ha ƀư nau văng tir.

Yêrêmi 32:35

Khân păng hŏ ndâk jêh lĕ ntŭk prêh klơ ăn ma brah Baal tâm rlŭng Ben-Hinôm, gay nhhơr phung kon bu klâu phung kon bu ur khân păng nơm ăn ma brah Môlek. Nây jêng nau Gâp mâu geh ntĭm nti, mâu mâp lĕ mĭn ma nau nây khân păng dơi ƀư nau tâm rmot aơ tâm ban pônây gay ăn phung Yuđa ƀư tih.

Yêrêmi 50:38

Ăn prăng phang ta klơ n'hor dak krong, Ƀư ma khân păng suăt kro! Yorlah bri nây bêng ma rup trah, Khân păng rluk yor rup brah.

Yêrêmi 51:7

Ƀon Babilôn jêng du mlâm kachok mah tâm ti Brah Yêhôva, Ƀư ăn lĕ rngôch bri neh nhŭl ndrănh; Lĕ rngôch bri dak hŏ nhêt jêh ndrănh păng. Yor nây yơh dĭng jêng brŭt rluk.

Yêrêmi 7:31

Khân păng hŏ ndâk lĕ ntŭk prêh klơ Tôphet tâm rlŭng Ben-Hinôm, gay su phung kon bu klâu kon bu ur păng tâm ŭnh; nây jêng nau Gâp mâu ntĭm nti ôh ăt mâu prot mĭn tât.”

Êsêkiêl 16:20

‘Ay sŏk phung kon bu klâu, phung kon bu ur ay deh ăn ma Gâp jêh djôt nhhơr ƀư mpa ƀư brah ăn ma khân păng gay ma khân păng sa rvăn lơi. Lĕ nau văng tĭr nây jêng ntil nau jê̆ lĕ?

Êsêkiêl 20:26

Gâp hŏ ƀư jêh ăn khân păng jêng ƀơ̆ jêh yor ndơ ƀư brah dôl khân păng nhhơr lĕ rngôch kon bôk rah tâm ŭnh, gay yor nây, Gâp ƀư ăn ma khân păng jêng rngol ŭch ma khân păng gĭt pô aơ Gâp jêng Brah Yêhôva.

Êsêkiêl 20:28

Dôl Gâp hŏ leo jêh khân păng lăp neh Gâp ton ăn jêh ma khân păng, rnôk nây khân păng saơ jêh lĕ yôk prêh, lĕ rngôch tơm si dŭt pŭm jêh ri nhhơr ndơ ƀư brah ma khân păng nơm ta nây. Khân păng hŏ mpơl ta nây ndơ ƀư brah gay nsônh Gâp ji nuih; khân păng su ndơ n'hôl geh ƀâu kah jêh ri ƀư ndơ nhhơr nhêt ta nây.

Êsêkiêl 20:31

Tơlah nhhơr ndơ jêh ri nhhơr kon khân may gŭch ma ŭnh, khân may ƀư ƀơ̆ ma lĕ rngôch rup brah khân may kŏ tât ma nar aơ. Hơi ngih Israel, di lĕ Gâp ăn khân may ôp mro hĕ? Brah Yêhôva lah: Tĭng nâm Gâp gŭ rêh mro mrăng, Gâp mâu ăn khân may ôp ma Gâp ôh!

Êsêkiêl 6:13

Tơlah phung bu nkhĭt khân păng lâng khĭt ta nklang phung rup brah gŭ jŭm nơng ƀư brah, ta klơ yôk prêh, ta klơ lĕ rngôch n'gơn yôk, tâm dâng ăp tơm si ndrêh jêh ri tơm n'ho pŭm, ăp ntŭk khân păng nhhơr ndơ ƀâu kah ma lĕ rngôch rup brah khân păng, nôk nây khân may mra gĭt Gâp jêng Yêhôva.

Kan Lêvi 18:21

Lơi djôt kon khân may nhhơr ma brah Môlek, yorlah ƀư kơt nây jêng ngơi sưr ma amoh Brah Ndu may nơm. Gâp jêng Brah Yêhôva.

Nau Kơp Bunuyh 25:6

Dôl nây, du huê tâm phung ƀon lan Israel djôt leo du huê bu ur Madian tât ta nklang oh nâu păng nơm, tanăp măt Y-Môis jêh ri tanăp măt lĕ rngôch phung ƀon lan Israel tâm rƀŭn, dôl lĕ rngôch phung ƀon lan Israel tâm rƀŭn nhhiăng nhĭm ta mpông Ngih Bok Nau Tâm Rƀŭn.

Nau Vay Nkah Tay 12:2

Ăn khân may ƀư rai lơi lĕ rngôch ntŭk phung ndŭl mpôl khân may mra mprơh, ntŭk khân păng hŏ pah kan jêh ma phung brah khân păng, mâu lah ta klơ yôk prêh, ta klơ gôl mâu lah tâm dâng ăp tơm si ndrêh.

Nau Tâm Mpơl 18:3

Yorlah lĕ ntil mpôl bunuyh nhêt ndrănh pâl rlưn rlau keh păng mâu jan tĭng nau vay, Phung hađăch ta neh ntu ƀư tih văng tĭr đah păng jêh, Phung tăch rgâl ta neh ntu jêng ndrŏng yor tă bơh nau păng gŭ rêh dŭt mpŭng.”