Êsai 54:11 - Nau Brah Ndu Ngơi 2023

¹¹ “Ơ phung rêh ni, nơm phŭt sial ktang rpuh đô̆, jêh ri nơm mâu geh bonh leng ôh, Aơ, gâp sŏk lŭ saphir ƀư lŭ gay ndâk ngih may, Jêh ri gâp mra dơm mbon may ma lŭ ônik.

Êsai 54:11 ပူးပေါင်းရင်းမြစ်များ

I Phung Hađăch 5:17

Hađăch ntĭnh khân păng sŏk lĕ lŭ toyh jêh ri khlay gay trah dŏng ƀư mbon ma ngih brah.

I Phung Hađăch 6:30

Bi mbon ngih brah păng mblum đŏng ma mah lĕ tâm trôm nđâp padih.

I Nau Rêh Jêng 29:2

Gâp ndrăp nkra lĕ nau ktang ăn ma ngih Brah Ndu gâp, mah prăp ma ndơ ƀư đah mah, prăk prăp ma ndơ ƀư đah prăk, kông prăp ma ndơ ƀư đah kông, loih prăp ma ndơ ƀư đah loih, tơm si prăp ma ndơ ƀư đah tơm si; rơm ndrăp âk lŭ ônik, lŭ khlay gay kach, lŭ khlay nchrat ang, lŭ khlay geh âk ntil dak, jêh ri lĕ ntil lŭ khay, jêh ri lŭ marbrơ nglang âk ngăn.

II Nau Rêh Jêng 3:6

Păng nkrơ̆ ngih brah ma lŭ khlay, bi mah dŏng mah bơh n'gor bri Parvaim.

Ndrom Samƀŭt bơh Yôp 28:16

Mâu dơi tâm rđĭl ôh rnoh khlay păng đah mah n'gor Ôphir, Đah lŭ khlay ônik mâu lah saphir.

Nau Mprơ Ơm 34:19

Bunuyh sŏng srăng geh âk nau mhĭk tât; Ƀiălah Brah Yêhôva tâm rklaih păng ƀaƀơ.

Nau Ngluh Êjipt 2:23

Jŏ jêh nây, hađăch Êjipt khĭt. Phung ƀon lan Israel vơh vơl, kuăl nter yor nau ƀư dĭk bu, nau khân păng lŭng nter tăng tât ma Brah Ndu.

Nau Ngluh Êjipt 24:10

khân păng saơ Brah Ndu Israel. Tâm dâng jâng Păng geh du ntil ndơ tâm ban ma du ndơl lŭ saphir rsang nâm bu trôk nđôch.

Nau Ngluh Êjipt 3:2

Tông mpăr Brah Yêhôva tâm mpơl ma păng tâm mpiăt ŭnh, ta nklang du ntŭk pŭm lok. Y-Môis uănh saơ ŭnh sa pŭm lok ƀiălah mâu lêk.

Nau Ngluh Êjipt 3:7

Brah Yêhôva lah: “Gâp hŏ saơ nanê̆ ngăn nau rêh ni phung ƀon lan Gâp tâm n'gor Êjipt jêh ri gâp hŏ tăng jêh nau khân păng lŭng nter yor phung kôranh uănh kan khân păng. Di ngăn, Gâp gĭt jêh nau nđêh nji khân păng.

Nau Mprơ Ueh 5:14

Ti păng nâm bu lĕ dĭng ma mah Lĭr ndop lŭ khlay. Săk jăn păng nâm bu glo ma la pler rlip, Lĭr ndop lŭ saphir.

Êsai 14:32

Moh nau mra plơ̆ lah ma phung mbơh bơh bri dak aơ? Plơ̆ lah hom pô aơ: “Brah Yêhôva rdâk jêh Siôn, Jêh ri phung o ach tâm phung ƀon lan Păng mra dơi joi ntŭk nde.”

Êsai 28:16

Yor nây, Kôranh Brah jêng Brah Yêhôva lah pô aơ: “Aơ, Gâp dơm ta Siôn du mlâm lŭ, Jêng lŭ rlong uănh, lŭ njônh ngih, lŭ khlay, Ƀư mbon nâp ktang Gay ma mbu nơm chroh mâu mra rŭng răng ôh.

Êsai 44:28

Păng jêng Nơm hŏ lah pô aơ: ‘Sirus jêng rmăk biăp Gâp, Păng mra ƀư lĕ nau Gâp ŭch;’ Jêng nơm lah ma ƀon Yêrusalem pô aơ: ‘Păng mra ndâk tay,’ Jêh ri ma ngih brah pô aơ: ‘Păng mra n'gân tay mbon.’ ”

Êsai 49:14

Ƀiălah ƀon Siôn hŏ ăp lah pô aơ: “Brah Yêhôva hŏ dun jêh gâp; Kôranh Brah gâp chuêl jêh gâp.”

Êsai 51:21

Iăt hom nau aơ, ơ nơm rêh ni, Jêng nơm nhŭl ƀiălah mâu di ma ndrănh ôh:

Êsai 51:23

Gâp mra dơm păng tâm ti phung ƀư rêh ni may, Jêng phung lah jêh ma may pô aơ: ‘Lâng bê̆ch hom gay ma hên dơi rgăn!’ Jêh ri ndŭr kơi may jêng tâm ban ma mbon neh, Tâm ban ma trong bu rgăn.”

Êsai 54:12

Gâp mra sŏk lŭ rubi ƀư mpêr geh ngih tŭm gak may Sŏk lŭ khlay chrêk ƀư lĕ mpông pêr may; Lĕ mpêr ƀon may ma lŭ khlay êmêrôt.

Êsai 54:6

Brah Yêhôva kuăl jêh ay sĭt Tâm ban ma kuăl du huê ur bu chalơi jêh, jêh ri nuih n'hâm rngot, Jêng lah bu ur bu nđăp jêh dôl hôm druh jêh ri bu chalơi jêh.” Brah Ndu may lah:

Êsai 60:15

Ntrok bu hŏ chuêl jêh ri tâm rmot jêh ma may, Kŏ tât mâu geh nơm hăn rgăn ta ntŭk may ôh, Ri mơ Gâp mra ăn may nau yơk mro mrăng, Jêh ri jêng nau răm maak ma âk rô̆.

Yêrêmi 30:17

Brah Yêhôva lah: ‘Gâp mra ăn tay n'hâm suan ma may, Ƀư bah sôt rmanh may, Yorlah khân păng ntơ may jêng nơm bu hŏ mƀăr lơi jêh: “Nây jêng ƀon Siôn, mâu geh bunuyh meng tât!”’

Nau Nhĭm Vơl 1:21

Khân păng tăng bâr gâp nter vơl, Ƀiălah mâu geh ôh nơm bonh leng. Lĕ rngôch phung rlăng gâp maak rhơn da dê, Dôl Păng djôt leo nau mhĭk tât ma gâp. Ăn may djôt nar May hŏ mbơh jêh ƀư ăn tât! Gay ma khân păng rêh ni nâm bu gâp.

Êsêkiêl 1:26

Ta klơ đôr panăp ta klơ bôk lĕ mpa rêh geh ndơ nâm bu sưng hađăch lŭ khlay saphir, jêh ri ta sưng hađăch nây geh ndơ nâm bu rup du huê bunuyh.

Êsêkiêl 10:1

Gâp uănh jêh ri saơ đôr trôk ta klơ bôk chêrubim geh ndơ nâm bu du mlâm sưng hađăch ma lŭ chrêk saphir.

Mika 7:11

Nar ndâk tay mpêr ƀon mra tât, Jêng nar pơk huy n'har bri.

Mathay 8:24

Ƀât lât, geh phŭt sial ktang ngăn ta dak mƀŭt kŏ tât rbuh dak ler tâm trôm plŭng; ƀiălah Brah Yêsu gŭ bê̆ch.

Yôhan 16:33

Gâp lah lĕ nau aơ ma khân may, gay ma khân may geh nau đăp mpăn tâm Gâp. Khân may mra geh nau rêh ni tâm neh ntu, ƀiălah khân may nâp hom nuih n'hâm, Gâp hŏ dơi jêh đah neh ntu.”

Kôranh Oh Mon 14:22

Bar hê khân păng ƀư nâp nuih n'hâm phung oh mon, n'hao nuih khân păng djôt nâp nau chroh, jêh ri đă pô aơ: “He găn âk nau rêh ni, ri mơ dơi lăp tâm ƀon bri hađăch Brah Ndu.”

Êphêsô 2:20

bu ndâk njêng khân may klơ mbon phung kôranh oh mon jêh ri phung nơm mbơh lor jêh ri Brah Yêsu Krist yơh jêng lŭ njônh ngih.

Nau Vay Nkah Tay 31:17

Tâm nar nây, Gâp mra ji nuih ma khân păng. Gâp mra chalơi khân păng jêh ri pôn muh măt Gâp ma khân păng, bu mra kăp rvăn khân păng kđôi jêh ri âk ntil nau mhĭk, nau uh ah tât ma khân păng. Tâm nar nây, khân păng mra lah: ‘Mâu di hĕ nau mhĭk aơ tât ma gâp yorlah Brah Ndu mâu ŭch gŭ ta nklang gâp mâu?’