Êsai 51:6 - Nau Brah Ndu Ngơi 2023

⁶ N'gơr hom măt khân may klơ lĕ ndâr trôk, Jêh ri uănh hom ta neh; Yorlah lĕ ndâr trôk mra lêk yơh nâm bu nhhŭk ŭnh, Neh ntu mra ơm nâm bu mlâm ao, Phung ƀon lan gŭ ta nây mra khĭt tâm ban ma rhuay. Ƀiălah nau Gâp tâm rklaih mra hôm n'ho ro, Nau sŏng srăng Gâp mâu blau lôch ôh.

Êsai 51:6 ပူးပေါင်းရင်းမြစ်များ

Nau Mprơ Ơm 103:17

Ƀiălah nau ueh Brah Yêhôva hôm ƀaƀơ n'ho ro Ma phung klach yơk ma Păng, Jêh ri nau sŏng srăng Păng prăp ma sau se khân păng.

Nau Mprơ Ơm 111:3

Kan Păng bêng nau chrêk rmah jêh ri nau rnam; Nau sŏng srăng Păng hôm gŭ n'ho ro.

Êsai 13:13

Yor nây, Gâp mra ƀư ăn lĕ ndâr trôk mpât n'gơ, Rplay neh mpât n'gơ trơn bơh ntŭk păng Yor nau Brah Yêhôva ma phung tahan ji nuih, Tâm nar Păng ji nuih hâu ngăn.

Êsai 33:6

Păng mra jêng nau nâp ma nar jêh ri mông khân may, Jêng nau tâm rklaih rmeh ler, nau blau mĭn, jêh ri nau gĭt rbăng; Nau klach yơk ma Brah Yêhôva jêng jay ndơ khlay Păng ăn.

Êsai 34:4

Lĕ rngôch phung mănh mbing tâm trôk mra rai lơi, Lĕ ndâr trôk mra klôn tay tâm ban ma klôt ndrom samƀŭt; Lĕ rngôch phung mănh mbing mra rai lĕ Tâm ban ma n'ha krăk ƀâu kro tŭp rŭng, Tâm ban ma n'ha rvi kro tŭp rŭng bơh tơm rvi.

Êsai 40:26

N'gơr hom măt khân may let klơ gay uănh: Mbu nơm rhăk njêng lĕ ndơ nây? Păng yơh jêng Nơm ƀư lĕ rngôch mănh mbing tâm trôk tĭng nâm rnoh jêh ri tĭng mbŭch, Păng kuăl amoh lĕ rngôch phung nây, Mâu pưt du mănh mbing ôh, Yor nau ktang dŭt toyh Jêh ri nau brah Păng mâu blau lôch.

Êsai 45:17

Bi Israel, Brah Yêhôva mra tâm rklaih, Ma nau tâm rklaih n'ho ro; Kŏ tât n'ho ro, Khân may mâu mra bêk mâu lah uh ah ôh!

Êsai 50:9

Nanê̆, Kôranh Brah jêng Brah Yêhôva mra kơl Gâp; Mbu nơm mbơh Gâp jêng tih? Aơ, lĕ rngôch khân păng mra mŭnh sat tâm ban ma blah ao Jêh ri nchiăr mra sa khân păng.

Êsai 51:8

Yorlah nchiăr mra sa khân păng tâm ban ma sa bok ao, Rhai mra sa khân păng tâm ban ma sa rsau biăp. Ƀiălah nau sŏng Gâp mra gŭ mro mrăng, Nau Gâp tâm rklaih mra hôm e ntơm bơh rnôk aơ tât rnôk ri.”

Êsai 54:10

Nđâp tơlah yôk dơi du, Nđâp tơlah mbon mra rgâl ntŭk, Ƀiălah nau Gâp ueh mâu mra du bơh ay ôh, Jêh ri nau tâm rnglăp đăp mpăn Gâp mâu dơi rgâl ôh;” Brah Yêhôva jêng Nơm geh nau yô̆ nđach ma ay lah kơt nĕ.

Êsai 54:9

“Gâp kơp nau aơ jêng tâm ban ma rnôk dak rdŭl bŭk rô̆ Y-Nôê, Tâm ban ma Gâp hŏ sơm ton jêh dak rdŭl bŭk rô̆ Y-Nôê, Mâu mra hôm bêng ler neh ntu ôh, Gâp hŏ sơm ton jêh Gâp mâu mra ji nuih đah ay Jêh ri mâu đŏng nduyh ay ôh.

Daniel 9:24

Geh pơh jât năng pơh tâm nal jêh ma phung ƀon lan may jêh ri ma ƀon kloh ueh may gay ma ăn lôch lơi nau ƀư tih, ngroh lơi nau tih, ntrok chuai nau ƀai jêh ri djôt ăn nau sŏng srăng n'ho ro, gay ma nau tâm saơ jêh ri nau mbơh lor geh tât ngăn, jêh ri tŏ dak ƀâu kah ăn ma Ntŭk Dŭt Kloh Ueh.

Mathay 24:35

Trôk neh ntu mra rlau lôch, ƀiălah nau Gâp ngơi mâu mra rlau lôch ôh.”

Yôhan 5:24

Nanê̆ ngăn, Gâp lah nanê̆ ngăn ma khân may, mbu nơm iăt nau Gâp ngơi jêh ri chroh Nơm hŏ njuăl Gâp, păng geh nau rêh n'ho ro jêh ri mâu geh ôh nau phat dôih, ƀiălah rgăn bơh nau khĭt gay hăn lăp tâm nau rêh.”

Nau Vay Nkah Tay 4:19

Lah khân may n'gơr măt klơ trôk, jêh ri khân may saơ nar, khay, lĕ mănh mbing, lĕ rngôch phung tahan tâm trôk, lơi ăn bu đŏt rdu khân may chon mbah mâu lah yơk mbah ma khân păng, yorlah ndơ nây knŏng jêng ndơ Yêhôva Brah Ndu khân may hŏ ăn jêh ma lĕ rngôch phung ƀon lan gŭ tâm dâng neh.

II Têsalônik 2:16

Dăn Kôranh Brah he, jêng Brah Yêsu Krist nơm jêh ri Brah Ndu, Mbơ̆ he, Nơm rŏng jêh ma he, jêh ri bơh nau yô̆ ăn ma he nau bonh leng n'ho ro jêh ri nau kâp gân ueh,

ហេឞ្រើ 5:9

jêh ri nôk hŏ lôch jêh, Păng jêng tơm tâm rklaih n'ho ro ma lĕ rngôch bunuyh tông bâr ma Păng,

ហេឞ្រើ 9:12

Păng lăp jêh tâm Ntŭk Dŭt Kloh Ueh du tơ̆ rĭng jêh, mâu dŏng ma mham be nkuăng jêh ri kon ndrôk ôh, ƀiălah dŏng ma mham Păng nơm gay djôt leo tât nau tâm chuai n'ho ro ma he.

ហេឞ្រើ 9:15

Yor ma nau nây, Păng jêng Nơm tâm nklang ma nau tâm rnglăp mhe; tă bơh nĕ, phung bunuyh geh jêh nau kuăl dơi sŏk dơn drăp ndơn n'ho ro ton jêh ma khân păng nơm, yorlah Păng khĭt jêh dơi tâm chuai nau tih khân păng hŏ ƀư tih tâm dâng nau tâm rnglăp tal nguay.

Nau Tâm Mpơl 20:11

Nôk nây gâp saơ du mlâm sưng hađăch toyh jêh ri nglang ndrel ma Nơm gŭ ta sưng hađăch. Tanăp măt Păng neh ntu jêh ri trôk du lĕ, mâu hôm saơ geh ntŭk ma khân păng ôh.