Êsai 49:7 - Nau Brah Ndu Ngơi 2023

⁷ Brah Yêhôva, Nơm Tâm Chuai jêh ri nơm Kloh Ueh Israel, Lah ma nơm bu rmot ngăn, Ma nơm phung ƀon lan aơ mưch rmot, jêng oh mon ma nơm geh nau dơi toyh: “Phung hađăch mra saơ jêh ri dâk; Phung kon hađăch mra păn mbah, Yorlah Brah Yêhôva jêng Nơm răp jăp, Nơm Kloh Ueh Israel, Nơm săch jêh may.”

Êsai 49:7 ပူးပေါင်းရင်းမြစ်များ

Nau Ntơm 27:29

Ăn lĕ bunuyh ƀon lan pah kan ma may, Lĕ bri dak chon mon ta may! Chiă uănh hom ma phung oh nâu may, Phung kon bu klâu mê̆ may chon mon ma may da dê! Mbu nơm rtăp rak kon mra dơn nau bu rtăp rak tay, Mbu nơm dăn nau ueh uĭn ma may mra geh nau ueh uĭn tay.”

Nau Mprơ Ơm 47:9

Hađăch phung ƀon lan khân păng tâm rƀŭn ndrel Ƀư phung ƀon lan ma Brah Ndu Abraham Yorlah lĕ khêl neh ntu jêng ndơ Brah Ndu da dê; Păng geh nau yơk dŭt prêh.

Nau Mprơ Ơm 68:31

Ndơ nhhơr ma hađăch mra djôt tă bơh Êjipt, Phung Êthiôpi mra gơnh yơr ti mpeh ma Brah Ndu.

Nau Mprơ Ơm 69:19

May gĭt nau prêng gâp, Nau bêk prêng jêh ri nau ƀơ̆ gâp; Lĕ phung rlăng ma gâp gŭ tanăp măt May da dê.

Êsai 14:1

Ngăn yơh, Brah Yêhôva mra yô̆ nđach ma Yakôb jêh ri hôm du tơ̆ đŏng săch Israel. Păng mra ăn ma khân păng gŭ tâm bri khân păng nơm. Phung bu năch mra tâm rnglăp đah khân păng jêh ri mra gŭ ndrel đah ngih Yakôb.

Êsai 19:21

Brah Yêhôva mra ƀư ma phung Êjipt gĭt năl Păng; jêh ri tâm nar nây, phung Êjipt mra gĭt năl Brah Yêhôva. Khân păng mra nhhơr mpa ƀư brah jêh ri ndơ ƀư brah gay yơk mbah ma Păng; khân păng mra ton ma Brah Yêhôva jêh ri ƀư nanê̆ ngăn nau nây.

Êsai 19:23

Tâm nar nây, mra geh du trong toyh bơh bri Êjipt tât ta bri Asiri; phung Asiri mra hăn ta bri Êjipt, jêh ri phung Êjipt hăn ta bri Asiri. Phung Êjipt ndrel phung Asiri mra hăn yơk mbah Brah Yêhôva.

Êsai 27:13

Tâm nar nây, bu mra uh nŭng toyh. Nôk nây, phung nhhơt jêh tâm bri Asiri jêh ri phung bu nsot jêh ta bri Êjipt mra văch yơk mbah ma Brah Yêhôva ta yôk kloh ueh ta ƀon Yêrusalem.

Êsai 42:1

Aơ jêng oh mon Gâp, Nơm Gâp kâp kơl, Jêng Nơm Gâp hŏ săch jêh, jêh ri tâm Păng huêng Gâp geh nau maak. Gâp hŏ dơm jêh Brah Huêng Gâp ta klơ Păng, Jêh ri Păng mra mpơl nau sŏng ma lĕ bri dak.

Êsai 48:17

Brah Yêhôva, Nơm Tâm Chuai may, Jêng Nơm Kloh Ueh Israel lah pônây: “Gâp jêng Yêhôva Brah Ndu may, Jêng Nơm sâm nti may gay may dơi geh nau khlay, Jêh ri njŭn may tâm trong may mra hăn.

Êsai 48:7

Aƀaơ aơ, bu rhăk lĕ nau kan mhe nây, mâu mâp geh ôh tâm rnôk kăl e; Lor ma nar aơ, khân may mâu mâp tăng nau aơ ôh. Klach lah may lah: ‘Aơ, gâp gĭt jêh nau nây!’

Êsai 49:1

Ơ lĕ gôl dak mƀŭt, iăt hom gâp! Ơ phung ƀon lan gŭ ngai, rkêng hom tôr: Brah Yêhôva kuăl jêh gâp bơh ndŭl me, Păng nkah amoh gâp dôl gâp hôm tâm ndŭl me.

Êsai 49:23

Phung hađăch mra jêng mbơ̆ rong siăm may, Phung hađăch bu ur mra jêng me sâm pu may. Khân păng mra kŭnh măt nđĭl ta neh tanăp may, Ler ndruyh neh ta jâng may. Jêh nây may mra gĭt Gâp jêng Brah Yêhôva; Jêh ri phung kâp gân Gâp mâu mra bêk ôh.

Êsai 49:26

Gâp mra ăn phung tŭn jot may sa nglay săk khân păng nơm, Nhŭl nhêt mham khân păng nơm tâm ban ma nhŭl ndrănh mhe. Lĕ rngôch bunuyh mra gĭt Gâp jêng Brah Yêhôva, Nơm Tâm Rklaih may, Jêng Nơm Tâm Chuai may, Nơm Geh Lĕ Nau Brah phung Yakôb!”

Êsai 50:6

Gâp jao jêh ndŭr kơi Gâp ăn bu dong, Jêh ri jao trô bom Gâp ma phung păk têp kang Gâp; Gâp mâu mâp pôn măt Ma nau bu ƀư bêk mâu lah bu soh dak diu ta măt.

Êsai 52:15

Đŏng kơt nây, May mra ƀư kloh phung ndŭl mpôl bunuyh; Phung hađăch mra mêm mbung yor May. Yorlah khân păng mra saơ nau bu mâu mâp nkoch bri ma khân păng ôh, Jêh ri mra gĭt rbăng nau khân păng mâu mâp tăng ôh.

Êsai 53:3

Păng jêng Nơm bu tâm rmot jêh ri dun jêh, Lĕ mâp găn nau rêh ni, gĭt năl nau ji. Bu tâm rmot ma Păng tâm ban ma bunuyh bu nkŭm muh măt mâu ŭch uănh; He đŏng mâu uănh khlay ma Păng.

Êsai 60:10

Phung bu năch mra rdâk tay mpêr ƀon may, Phung hađăch khân păng mra pah kan ma may. Yorlah tâm nau Gâp ji nuih, Gâp hŏ dong may, Ƀiălah aơ Gâp lŏ yô̆ ma may, tĭng nau yô̆ Gâp.

Êsai 60:16

May mra nhêt dak toh lĕ rngôch bri dak, Pu toh phung hađăch. May mra gĭt Gâp yơh, Brah Yêhôva, jêng Nơm Tâm Rklaih may, Jêh ri Nơm Tâm Chuai may jêng Nơm Geh Lĕ Nau Brah phung Yakôb.

Êsai 60:3

Lĕ bri dak mra văch ma nau ang may, Lĕ phung hađăch mra n'gĭl nau ang ơm ôi chrêk lơp may.

Êsai 66:23

Brah Yêhôva lah: “Bơh ăp khay mhe aơ tât ma khay mhe êng, Bơh ăp nar saƀat aơ tât ma saƀat ri Lĕ rngôch nglay săk mra văch gay yơk mbah tanăp Gâp.

Sakari 11:8

Knŏng tâm du khay, Gâp hŏ mprơh jêh pe nuyh rmăk biăp, yorlah Gâp mâu hôm dơi nsrôih đah khân păng đŏng ôh, jêh ri khân păng tâm rmot ma Gâp tâm ban lĕ.

Mathay 20:28

Nđâp ma Kon Bunuyh văch jêh mâu di gay bu pah kan, ƀiălah gay pah kan, jêh ri nhhơr nau rêh Păng nơm jêng rnoh chuai ma âk bunuyh.”

Mathay 26:67

Jêh nây Khân păng soh dak diu ta muh măt Brah Yêsu, lơh Păng. Ƀaƀă nơm tap Păng,

Luka 22:27

Yorlah tâm nơm gŭ ta sưng sông ndrel ma bunuyh pah kan, mbu nơm jêng toyh lơn? Di lĕ nơm gŭ ta sưng sông? Ƀiălah Gâp gŭ ta nklang khân may tâm ban ma bunuyh pah kan.

Luka 23:18

Khân păng du ai nau nter dŭt hâu: “Nkhĭt lơi hom bunuyh aơ jêh ri mƀơk Y-Barabas ma hên!”

Luka 23:23

Ƀiălah phung nây lơ hô nter ktang rlau lơn, dăn pâng kđĭn Brah Yêsu ta si tâm rkăng; jêh ri nau khân păng nter ngrông hŏ dơi.

Luka 23:35

Phung ƀon lan gŭ uănh ta nây, bi phung kôranh chiă uănh gơm mưch ma Brah Yêsu pô aơ: “Păng tâm rklaih bunuyh êng. Tơlah nanê̆ ngăn păng jêng Brah Krist, Nơm Brah Ndu săch jêh, ăn hom păng tâm rklaih păng nơm.”

Yôhan 18:40

Khân păng nter ma bâr huy: “Lơi mƀơk ma păng, mƀơk hom ma Y-Barabas!” Y-Barabas jêng du huê bunuyh ntŭng.

Yôhan 19:15

Khân păng lŭng nter: “Ngroh lơi Păng, ngroh lơi Păng! Pâng păng ma kđĭn ta si tâm rkăng!” Pilat lah: “Gâp mra pâng hađăch khân may ta si tâm rkăng lah?” Phung kôranh ƀư brah toyh plơ̆ lah: “Hên mâu hôm geh hađăch êng ôh, knŏng Sêsar.”

Yôhan 19:6

Ƀiălah dôl phung kôranh ƀư brah toyh jêh ri phung kôranh saơ Brah Yêsu, khân păng nter huy: “Pâng păng ma kđĭn ta si tâm rkăng! Pâng păng ma kđĭn ta si tâm rkăng!” Pilat đă ma khân păng: “Khân may sŏk djôt păng ma khân may nơm jêh ri pâng kđĭn, yor gâp mâu ôh saơ păng geh nau tih.”

I Kôrintô 1:9

Brah Ndu jêng Nơm răp jăp; Nơm hŏ kuăl jêh khân may ma nau tâm rnglăp ndrel đah Kon Păng jêng Brah Yêsu Krist, Kôranh Brah he.

Nau Vay Nkah Tay 7:9

Yor ri, ăn khân may gĭt năl Yêhôva Brah Ndu khân may jêng Brah Ndu, Brah Ndu răp jăp, Nơm djôt prăp nau tâm rnglăp jêh ri nau ueh tât âk rbăn rô̆ nuyh ma lĕ phung rŏng ma Păng jêh ri djôt prăp nau vay Păng ntăm.

I Pêtrôs 2:4

Văch dăch hom ta Păng jêng lŭ rêh, kon bunuyh mƀăr lơi jêh, ƀiălah Brah Ndu săch jêh ri jêng geh nau khlay ngăn.

Nau Tâm Mpơl 11:15

Tông mpăr rơh pơh uh nŭng, geh bâr dŭt nteh ngăn tă bơh ta klơ trôk lah pô aơ: “Ƀon bri hađăch neh ntu jêng ndơ Kôranh Brah he, Jêh ri Brah Krist Păng. Păng mra chiă uănh n'ho ro.”

Nau Tâm Mpơl 3:7

“Nchih hom ma phung tông mpăr Phung Ngih Brah Ndu ta ƀon Philađelphi: Aơ jêng nau ngơi tă bơh Nơm Kloh Ueh jêh ri Nanê̆ Ngăn, jêng Nơm geh keh khuă Y-Đavit, jêng Nơm pơk mâu hôm geh bunuyh dơi nchăng, Nơm nchăng mâu hôm geh bunuyh dơi pơk: