Êsai 35:2 - Nau Brah Ndu Ngơi 2023

² Păng mra geh kao âk jêh ri hâk maak, Răm maak ma nau mprơ. Bu mra ăn ma păng nau chrêk rmah bri Liban, Nđâp ma nau ueh yôk Karmel jêh ri bri Sarôn. Khân păng mra saơ nau chrêk rmah Brah Yêhôva Jêh ri nau chrêk rmah Brah Ndu he.

Êsai 35:2 ပူးပေါင်းရင်းမြစ်များ

I Nau Rêh Jêng 16:33

Rnôk nây, lĕ rngôch tơm si tâm bri mra mprơ ma hâk răm tanăp Brah Yêhôva, Yorlah Păng hăn tât gay phat dôih neh ntu.

I Nau Rêh Jêng 27:29

Y-Sitrai, bunuyh Sarôn, djôt kan chiă uănh ndrôk phung rong tâm neh lâng Sarôn; bi Y-Saphat, kon Y-Adlai, djôt kan chiă uănh ndrôk tâm rlŭng.

I Nau Rêh Jêng 5:16

Khân păng gŭ ta n'gor Gilêat, tâm n'gor Basan, jêh ri lĕ ƀon jê̆ jê̆ păng, jêh ri tâm lĕ rngôch ndrêch gơ̆ ta Sarôn tât ta dŭt n'har păng.

Nau Mprơ Ơm 50:2

Bơh Siôn ueh reh rah vah ngăn, Brah Ndu nchrat ang jêh.

Nau Mprơ Ơm 72:16

Ăn ba mra rmeh ler tâm neh ntu Jêh ri ta klơ lĕ n'gơn yôk; Ăn kao play păng tâm ban ma tơm si Liban, Bi phung gŭ tâm ƀon toyh mra ndrŏng Nâm bu gơ̆ tâm neh.

Nau Mprơ Ơm 72:19

Khư mprơ tâm rnê amoh chrêk rmah Păng tât n'ho ro! Ăn lam neh ntu dơi bêng ma nau chrêk rmah Păng! Amen! Amen!

Nau Mprơ Ơm 89:12

Mpeh pa lơ, mpeh pa dâng rhăk njêng ăt tă bơh May; Tabor jêh ri yôk Hermôn hâk răm tâm amoh May.

Nau Mprơ Ơm 97:6

Lĕ ndâr trôk mbơh nau sŏng srăng Păng, Lĕ rngôch phung ƀon lan uănh nau chrêk rmah Păng.

Nau Ngluh Êjipt 16:7

jêh ri ôi taơ, khân may mra saơ nau chrêk ma lơp Brah Yêhôva, yorlah Păng hŏ tăng jêh nau khân may nduyh Păng. Bi hên mbu nơm jêng, dĭng khân may nduyh ma hên?”

Nau Mprơ Ueh 2:1

Gâp jêng kao rôs tâm lôk mir Sarôn, Jêng n'gĭng kao si ueh tâm rlŭng jru.

Nau Mprơ Ueh 7:5

Bôk ay n'gơr prêh nâm bu yôk Karmel, Sŏk ay mƀơk jong krăk nsrêk, Ƀư ăn ma hađăch ŭch uănh rŏng ngăn.

Êsai 25:9

Tâm nar nây, bu mra lah: “Ri, aơ jêng Brah Ndu he; He kâp gân Păng, jêh ri Păng hŏ tâm rklaih he jêh. Aơ yơh jêng Brah Yêhôva he kâp gân, Ăn he hâk răm jêh ri maak yor nau Păng tâm rklaih!”

Êsai 27:6

Tât mông Yakôb mra hon reh, Israel geh rmlom jêh ri dang kao, Jêh ri khân păng mra play bêng klơ neh.

Êsai 32:15

Kŏ tât Brah tă bơh klơ nkhŭt ăn ma he, Bri rdah plăch jêng đang tơm sa play, Bu uănh ta đang tơm sa play tâm ban ma bri krŏng.

Êsai 33:9

Bri neh nhĭm jêh ri huănh hươi; Liban bêk jêh ri klêu; Sarôn jêng tâm ban ma ndrêch rdah; Basan jêh ri yôk Karmel nhop kro.

Êsai 35:10

Phung Brah Yêhôva tâm chuai jêh mra plơ̆ sĭt, Khân păng mra văch ta Siôn tâm nau troh nter răm rhơn; Nau hâk răm n'ho ro mra gŭ ta klơ bôk khân păng. Khân păng mra bêng nau maak, Jêh ri nau rngot lŭng nter mra roh lĕ.

Êsai 40:5

Aƀaơ, nau chrêk rmah Brah Yêhôva mra tâm mpơl, Jêh ri lĕ rngôch bunuyh mra saơ da dê nau nây, Yorlah Brah Yêhôva hŏ ngơi jêh nau nây.”

Êsai 40:9

Mbu nơm mbơh nau mhe mhan ueh ma ƀon Siôn, Hao hom ta klơ yôk prêh! Mbu nơm mbơh nau mhe mhan ueh ma Yêrusalem Nter troh hom ma nau ktang! Nter troh hom may, lơi klach ôh! Lah hom ma lĕ rngôch ƀon bri Yuđa pô aơ: “Aơ jêng Brah Ndu khân may!”

Êsai 41:19

Gâp mra dơm tâm bri rdah tơm si sêdar, Tơm si akasi, tơm si mirtơ, jêh ri tơm ôlive; Gâp mra tăm tâm ndrêch rdah tơm si chiprơ, Tơm si n'ho, jêh ri ndrel ma tơm si buis.

Êsai 49:13

Ơ lĕ ndâr trôk, troh nter hom! Ơ neh ntu, răm maak hom! Ơ yôk, nter troh mprơ hom! Yorlah Brah Yêhôva hŏ bonh leng jêh phung ƀon lan Păng, Jêh ri yô̆ nđach ma phung rêh ni.”

Êsai 6:3

Phung sêraphim troh ndrel jêh ri lah: “Kloh ueh, kloh ueh, kloh ueh yơh Brah Yêhôva ma phung tahan! Lam bri neh bêng ma nau chrêk rmah Păng.”

Êsai 60:13

Tơm si chiprơ, tơm si n'ho jêh ri tơm si buis jêng nau chrêk rmah bri Liban, Ăt mra njŭn ma may, Ŭch ƀư ueh ngih brah kloh ueh Gâp; Gâp mra ăn chrêk rmah ntŭk Gâp chrong jâng.

Êsai 60:19

May mâu hôm mra nsing nar Sol ang nôk nar, Jêh ri mâu hôm ŭch đă khay Sol ang nôk măng; Yorlah Brah Yêhôva mra jêng nau ang n'ho ro ma may, Brah Ndu may mra jêng nau chrêk rmah may.

Êsai 60:21

Lĕ rngôch phung ƀon lan may mra jêng sŏng srăng da dê, Jêh ri khân păng mra dơn bri nây n'ho ro. Khân păng jêng nkeh nse Gâp tăm jêh, Jêng kan ti Gâp ƀư jêh, gay ma Gâp geh nau chrêk rmah.

Êsai 61:3

Gay ăn rvang kao ma phung rngot klâng ta Siôn, Ntrok ma ndruyh ŭnh buh, Ăn dak ngi nau răm ntrok nau klâng ndrê, Ăn bok ao nau tâm rnê ntrok nau huêng rngot rvê. Bu mra rnha khân păng tơm si nau sŏng srăng, Jêng tơm si Brah Yêhôva tăm jêh, gay ƀư ăn chrêk rmah ma Păng.

Êsai 66:10

Ơ lĕ rngôch phung rŏng ma Yêrusalem! Hâk maak hom ma păng, maak hom yor păng. Ơ lĕ rngôch phung rngot klâng ma Yêrusalem! Maak ndrel hom ma păng.

Êsai 66:14

“Khân may mra saơ nau nây, jêh ri nuih n'hâm khân may mra răm maak; Nting khân may mra bĭk rơ̆ tâm ban gơ̆ nse. Bu mra gĭt ti Brah Yêhôva gŭ ndrel ma phung oh mon Păng, Jêh ri Păng mra ji nuih ma phung rlăng đah Păng.

Ndrom Samƀŭt bơh Ôsê 14:5

Gâp mra jêng nâm bu dak ngom ma phung Israel; Păng mra luh kao nâm bu kao si ueh Jêh ri hon reh nâm bu krŏng bri Liban.

Habakuk 2:14

Yorlah gĭt năl nau chrêk rmah Brah Yêhôva Mra bêng ler lam neh ntu Nâm bu dak nkŭm bêng dak mƀŭt.

Sakari 10:7

Phung Êphraim mra jêng nâm bu phung geh nau janh, Nuih n'hâm khân păng hâk răm nâm bu nôk nhŭl ndrănh; Phung kon khân păng mra saơ nau nây jêh ri răm maak, Nuih n'hâm khân păng mra maak tâm Brah Yêhôva.

Yôhan 12:41

Y-Êsai lah nau aơ, yorlah hŏ saơ nau chrêk rmah Brah Yêsu jêh ri lah ma Păng.

Yôhan 17:24

Ơ Mbơ̆, Kon ŭch lĕ rngôch phung Mbơ̆ hŏ ăn jêh ma Kon gŭ ndrel ma Kon ta ntŭk Kon gŭ, pônây khân păng dơi n'gơr uănh nau chrêk rmah Mbơ̆ ăn jêh ma Kon, yorlah Mbơ̆ hŏ rŏng jêh ma Kon êlor nau rhăk njêng neh ntu.

Kôranh Oh Mon 9:35

Lĕ rngôch phung ta Liđa jêh ri Sarôn saơ pônây, plơ̆ sĭt ma Kôranh Brah da dê.

Samƀŭt Pôl Njuăl Ăn Ma Phung Nsing Ta Ƀon Rôm 10:15

Tơlah mâu geh bunuyh bu njuăl nsong, mâm ƀư geh bunuyh hăn mbơh nkoch? Tĭng nâm nau nchih jêh: “Ueh lăng âk ngăn mpang jâng phung hăn mbơh nkoch Nau Mhe Mhan Ueh!”

Samƀŭt Pôl Njuăl Ăn Ma Phung Nsing Ta Ƀon Rôm 15:10

jêh ri geh nau nchih: “Hơi phung bu năch, maak hom ndrel ma phung ƀon lan Kôranh Brah”

II Kôrintô 3:18

Lĕ rngôch muh măt he mâu nkŭm da dê gay n'gơr uănh nau chrêk rmah Kôranh Brah, dơi tâm rgâl plơ̆ jêng tâm ban ma rup Păng, tă bơh nau chrêk rmah tât ta nau chrêk rmah; yorlah nau aơ luh bơh Kôranh Brah jêng Brah Huêng Ueh.

II Kôrintô 4:6

Yorlah Brah Ndu jêng Nơm lah pô aơ: “Ăn nau ang sol bơh nau ngo,” hŏ sol ang jêh tâm nuih n'hâm hên, ăn nau ang gay ma gĭt rbăng nau chrêk rmah Brah Ndu ta muh măt Brah Yêsu Krist.

Yôsuê 19:26

Alamêlek, Amat, jêh ri Misal. Mpeh nhâp nar tâm mâp đah Karmel jêh ri n'hor dak Sihôr-Lipnat,

Nau Tâm Mpơl 21:23

Ƀon nây mâu hôm ŭch geh nar ôh, mâu lah khay sol ang, yorlah nau chrêk rmah Brah Ndu sol ang ƀon nây, jêh ri Kon Biăp jêng kađen ma ƀon.