Êsai 34:2 - Nau Brah Ndu Ngơi 2023

² Yorlah Brah Yêhôva ji nuih tâm rdâng đah lĕ bri dak, Păng nkhŭt nau ji nuih ma lĕ rngôch phung tahan khân păng; Păng ƀư rai khân păng, Jao khân păng ăn bu nkhĭt.

Êsai 34:2 ပူးပေါင်းရင်းမြစ်များ

Nau Mprơ Ơm 2:5

Nôk nĕ tâm nau ji nuih, Păng mra nduyh khân păng, Tâm nôk ji nuih, Kôranh Brah ƀư khân păng klach krit.

Nau Ngluh Êjipt 8:14

Bu bun phung kĭt jêng âk mbŭch, lam n'gor n'hôl ƀâu ôm.

Êsai 10:5

Rêh ni ngăn ma Asiri, mâng rpăt nau Gâp ji nuih! Mâng jra tâm ti păng jêng nau Gâp ji nuih!

Êsai 13:5

Brah Yêhôva jêh ri ndơ tâm lơh nau Păng ji nuih, Văch bơh âk bri ngai, bơh dŭt trôk, Gay ƀư rai lĕ neh ntu.

Êsai 13:6

Nhĭm nhhiăng hom, yorlah nar Brah Yêhôva dăch jêh! Nar nây mra tât tâm ban ma nau ƀư rai bơh Nơm Geh Lĕ Nau Brah.

Êsai 26:20

Ơ phung ƀon lan Gâp, lăp hom tâm jrô, Jêh ri nchăng lơi mpông. Nde krap hom ƀât lât, Kŏ tât nau ji nuih hŏ rlau jêh.

Êsai 30:25

Tâm nar geh nau tâm nkhĭt toyh, lĕ pôih rlâm rai jêh, ri mơ ta klơ lĕ rngôch yôk prêh jêh ri dor yôk mra geh lĕ dak n'hor hoch.

Êsai 61:2

Gay mbơh năm Brah Yêhôva yô̆, Jêh ri nar Brah Ndu he plơng bôk, Gay ma bonh leng lĕ rngôch phung rngot klâng;

Êsai 63:6

Tâm nau ji nuih, Gâp jot plên phung ndŭl mpôl bunuyh; Gâp ăn khân păng nhŭl yorlah nau Gâp ji nuih, Jêh ri Gâp ƀư pling jêh mham khân păng ta neh.”

Êsai 65:12

Gâp mra tâm nal khân may ma đao, Lĕ rngôch khân may mra chon mon dơn nau bu nkhĭt; Yorlah Gâp hŏ kuăl ƀiălah khân may mâu plơ̆ lah ôh, Gâp ngơi jêh ƀiălah khân may mâu iăt. Khân may ƀư jêh nau mhĭk tâm dâng măt Gâp, Jêh ri hŏ săch jêh nau mâu ƀư maak ma Gâp.”

Êsai 66:14

“Khân may mra saơ nau nây, jêh ri nuih n'hâm khân may mra răm maak; Nting khân may mra bĭk rơ̆ tâm ban gơ̆ nse. Bu mra gĭt ti Brah Yêhôva gŭ ndrel ma phung oh mon Păng, Jêh ri Păng mra ji nuih ma phung rlăng đah Păng.

Êsai 66:16

Yorlah Brah Yêhôva mra dŏng ŭnh jêh ri đao Gay phat dôih lĕ rngôch nglay săk; Jêh ri phung Brah Yêhôva nkhĭt mra jêng âk.

Yêrêmi 25:31

Nau ngrông ngloh mra tât nglĕ dŭt rplay neh; Yorlah Brah Yêhôva tâm rdâng đah lĕ rngôch bri dak, Phat dôih lĕ rngôch nglay săk, Jao phung mhĭk ăn ma đao,’ Brah Yêhôva lah pônây.

Yêrêmi 25:32

Brah Yêhôva ma phung tahan lah: ‘Aơ, nau mhĭk mra lam ntŭk Bơh bri dak aơ rlet ma bri dak êng, Du rơh sial phŭt hâu ngăn văch tât Tă bơh ntŭk ngai ngăn ta neh ntu.’

Yêrêmi 25:33

Tâm nar nây, săk phung khĭt Brah Yêhôva nkhĭt khĭt mra bêng lam măt neh. Mâu geh bunuyh nhĭm vơl mâu lah rgum gay tâp brôi, mâu lah rgum tay gay ma tâp brôi; khân păng jêng buh ta klơ măt neh!

Êsêkiêl 36:5

Yor ri, aơ jêng nau Kôranh Brah Yêhôva lah: ‘N'hêl nanê̆ ngăn tâm nau ntôn duh nuih, Gâp mbơh nau tâm rdâng ma phung ƀon lan hôm e klen bơh lĕ bri dak jêh ri ma lĕ rngôch phung Êđôm, jêng phung bêng ma nuih n'hâm răm maak jêh ri mưch rmot ngăn, mĭn sŏk bri Gâp ƀư drăp ndơn ăn ma khân păng nơm gay ma khân păng sŏk pit in ndrêch gơ̆.’

Sôphôni 3:8

Yor nây, Brah Yêhôva lah: “Gŭ kâp hom Gâp, Kŏ tât nar Gâp mra dâk mbơh ăn jêng nanê̆; Yorlah Gâp hŏ mĭn jêh tâm rgum lĕ mpôl băl bunuyh Jêh ri plơ̆ rgum tay lĕ bri hađăch, Gay nkhŭt ta khân păng nau ji nuih, Nây jêng lĕ rngôch nau Gâp ji nuih hâu ngăn, Yorlah lĕ rngôch bri dak mra rai lôch. Ma ŭnh nau Gâp ntôn.

Sakari 14:3

Nôk nây, Brah Yêhôva mra hăn tâm lơh đah lĕ rngôch bri dak nây, nâm bu Păng hŏ lơh jêh tâm rnôk tâm lơh.

Samƀŭt Pôl Njuăl Ăn Ma Phung Nsing Ta Ƀon Rôm 1:18

Nau Brah Ndu ji nuih mpơl jêh tă bơh klơ trôk gay ma tâm rdâng đah lĕ ntil mâu ƀư tĭng nau vay jêh ri ma phung djơh mhĭk dŏng nau djơh mhĭk tŭn jot nau ngăn.

Yôsuê 11:20

Yorlah Brah Yêhôva ƀư ma phung hađăch nây dăng nuih n'hâm tâm rdâng đah phung Israel, gay ma khân păng mra rai lĕ, mâu dơi geh nau yô̆ nđach ôh, di nâm Brah Yêhôva ntăm jêh ma Y-Môis.

Nau Tâm Mpơl 20:15

Mbu nơm mâu geh amoh bu nchih jêh tâm ndrom samƀŭt nau rêh, bu mra klŭp păng tâm nglao ŭnh.

Nau Tâm Mpơl 20:9

Khân păng hăn bra pru pra lam neh ntu, nchueng jŭm ntŭk phung kloh ueh gŭ jêh ri ƀon bu rŏng ngăn ngên. Ƀiălah ŭnh tă bơh trôk jŭr jêh ri su rai khân păng.