Êsai 31:2 - Nau Brah Ndu Ngơi 2023

² Ƀiălah Brah Yêhôva yơh jêng Nơm Blau Mĭn! Nơm ƀư ăn nau rêh ni tât, Nơm mâu rgâl ôh nau Păng hŏ ngơi jêh, Păng mra dâk tâm rdâng đah ngih phung mhĭk, Jêh ri tâm rdâng đah phung kơl phung ƀư nau kue.

Êsai 31:2 ပူးပေါင်းရင်းမြစ်များ

Ndrom Samƀŭt bơh Yôp 12:13

Ƀiălah nau blau mĭn jêh ri nau brah jêng ndơ Brah Ndu; Păng bêng nau blau nchră jêh ri nau gĭt rbăng.

Ndrom Samƀŭt bơh Yôp 12:16

Nau dăng n'hâm jêh ri nau blau mĭn jêng ndơ Păng; Nơm ndơm bu nđâp ma bunuyh bu ndơm gŭ tâm ti Păng da dê.

Ndrom Samƀŭt bơh Yôp 5:13

Păng nhŭp phung blau plĕch tâm nau plĕch rlăm păng, Jêh ri nhŭp rdâng ro nau ŭch mĭn phung ƀlăch ƀlêr.

Êsai 1:4

Rêh ni yơh ma bri dak ƀư nau tih, Phung ƀon lan ƀư nau tih jâk jêr Noi deh ƀư mhĭk, Phung kon gŭ ƀư nau ƀơ̆ ƀơch! Khân păng chalơi jêh Brah Yêhôva, Mưch rmot ma Nơm Kloh Ueh Israel, Plơ̆ jêng bu êng jêh ri nkhah du.

Êsai 14:20

May mâu mra dơi tâp ndrel ma phung hađăch tâm môch, Yorlah may hŏ ƀư rai jêh bri may Jêh ri nkhĭt jêh phung ƀon lan. Noi deh phung mhĭk Mra mro mrăng mâu dơi nkah tât ôh.

Êsai 21:17

Phung tahan janh ktang pănh na tâm phung Kêdar hôm e djê̆ dơm. Yorlah Yêhôva Brah Ndu ma phung Israel lah jêh nau nây.”

Êsai 22:14

Brah Yêhôva ma phung tahan Nơm yơh hŏ mpơl nau ngơi aơ ma tôr gâp: “Nanê̆ ngăn nau tih aơ bu mâu mra yô̆ an kŏ tât khân may khĭt.” Kôranh Brah jêng Brah Yêhôva ma phung tahan lah jêh.

Êsai 28:21

Yorlah Brah Yêhôva mra dâk tâm ban ma Păng ƀư jêh ta yôk Pêrasim, Păng mra ji nuih tâm ban ma tâm rlŭng Gibêôn Gay ma ƀư nau kan Păng, jêng nau kan hih rhâl; Gay ƀư nau Păng pah kan, jêng nau pah kan khlay ngăn ngên.

Êsai 28:29

Nau nây tât đŏng tă bơh Brah Yêhôva ma phung tahan, Nau Păng dăp ƀư khlay ngăn, Nau blau mĭn Păng dŭt ueh ngăn ngên!

Êsai 30:3

Yor nây, nau Pharaôn n'gang mra plơ̆ jêng nau bêk prêng ma khân may, Nau nde tâm dâng gui bri Êjipt mra ƀư bêk ma khân may.

Êsai 30:7

Yorlah nau bri Êjipt kơl knŏng jêng dơm dam, mâu khlay ôh Yor nây Gâp rnha păng “H'Rahap gŭ rklăk mâu mpât.”

Êsai 31:3

Phung Êjipt knŏng jêng bunuyh dơm, mâu di jêng Brah Ndu ôh; Seh ndơ tâm lơh khân păng knŏng jêng nglay săk, mâu di jêng huêng brah ôh. Tơlah Brah Yêhôva yơr ti Păng, Nơm kơl mra ndĭt ndĭu, nơm geh nau kơl mra prah jŭr, Lĕ rngôch khân păng mra rai yot ndrel n'grŭp.

Êsai 32:6

Yorlah bunuyh rluk mra ngơi lĕ nau rluk, Nuih n'hâm khân păng mĭn ƀư nau mhĭk Gay ŭch ƀư nau ƀơ̆ ƀơch, Ngơi nau mhĭk đah Brah Yêhôva; Ƀư ma bunuyh ji ngot gŭ ndŭl hŏng, Jêh ri nơm ji hir mâu dơi nhêt dak.

Êsai 45:7

Gâp jêng Nơm njêng nau ang jêh ri nau ngo, Ƀư nau đăp mpăn jêh ri njêng nau tât; Gâp nơm yơh, Brah Yêhôva, jêng Nơm ƀư lĕ rngôch nau aơ.

Êsai 9:17

Yorlah nau ƀai sa tâm ban ma ŭnh, Păng sa rtau lok jêh ri pih pŭm, Păng sa lĕ tơm si ta krŏng mbâl, Ƀư ma ŭnh nhhŭk dŭk dŭk mpăr leo klơ.

Yêrêmi 10:12

Brah Yêhôva yơh hŏ rhăk njêng jêh neh ntu ma nau brah Păng, Ndâk njêng neh ntu bơh nau blau mĭn Păng, Lăk huy lĕ ndâr trôk bơh nau gĭt rbăng Păng.

Yêrêmi 10:7

Ơ Hađăch ma lĕ bri dak! Mbu moh mâu klach yơk May? May dơi khư ma nau yơk mbah. Yorlah ta nklang phung bunuyh blau mĭn tâm lĕ bri dak, Tâm lam ƀon bri hađăch khân păng, Mâu geh nơm dơi tâm rđĭl đah May.

Yêrêmi 36:32

Y-Yêrêmi sŏk đŏng du ndrom samƀŭt ntâu êng ăn ma kôranh nchih samƀŭt Y-Baruk, kon bu klâu Y-Nêria. Păng nchih tay tĭng lĕ rngôch nau bơh mbung Y-Yêrêmi hŏ geh nchih jêh nau ngơi tâm ndrom samƀŭt ntâu Y-Jêhôjakim, hađăch Yuđa, hŏ su jêh tâm ŭnh. Păng kơi ntop âk nau ngơi ƀoi nĕ.

Êsêkiêl 29:6

Rnôk nây, lĕ rngôch phung gŭ tâm n'gor Êjipt mra gĭt Gâp jêng Brah Yêhôva, yorlah may hŏ jêng mâng jra đah rpho ăn ma ngih Israel.

Amôt 3:6

Lah bu uh nŭng tâm ƀon toyh Pôri phung ƀon lan mâu hĕ klach? Geh lĕ nau mhĭk tât ma du rplay ƀon Tơlah Brah Yêhôva mâu ƀư nau nây?

Sôphôni 3:8

Yor nây, Brah Yêhôva lah: “Gŭ kâp hom Gâp, Kŏ tât nar Gâp mra dâk mbơh ăn jêng nanê̆; Yorlah Gâp hŏ mĭn jêh tâm rgum lĕ mpôl băl bunuyh Jêh ri plơ̆ rgum tay lĕ bri hađăch, Gay nkhŭt ta khân păng nau ji nuih, Nây jêng lĕ rngôch nau Gâp ji nuih hâu ngăn, Yorlah lĕ rngôch bri dak mra rai lôch. Ma ŭnh nau Gâp ntôn.

Sakari 1:6

Ƀiălah, lĕ nau Gâp ngơi jêh ri nau vay Gâp ƀư hŏ ntĭm jêh ma phung oh mon Gâp jêng phung nơm mbơh lor, mâu di bơh lĕ nau nây ban jêh ma phung chô yau khân may? Yor rĭ dĭng khân păng rmal nau tih jêh ri lah: ‘Lĕ rngôch nau Brah Yêhôva ma phung tahan hŏ ton mĭn jêh ma hên tĭng trong jêh ri kan pah bơh hên ƀư, pôri Păng hŏ nkra jêh ma hên di kơt nây.’”

Nau Kơp Bunuyh 10:35

Tơlah Hip Nau Tâm Rnglăp trơn, Y-Môis lah pô aơ: “Ơ Brah Yêhôva, dăn dâk hăn gay ƀư ma phung rlăng May chah rai pru pra, Jêh ri ƀư ma phung tâm rmot ma May nchuăt du panăp May!”

Nau Kơp Bunuyh 23:19

Brah Ndu mâu jêng du huê bunuyh ôh dĭng păng ngơi mƀruh, Mâu đŏng jêng du huê kon bunuyh kŏ tât păng rgâl nau păng mĭn. Moh nau Păng hŏ ntăm jêh, mâu hĕ Păng mra ƀư ăn tât nau nây? Moh nau Păng hŏ ton, mâu hĕ Păng mra ƀư ăn tât nau nây?

Mathay 24:35

Trôk neh ntu mra rlau lôch, ƀiălah nau Gâp ngơi mâu mra rlau lôch ôh.”

Samƀŭt Pôl Njuăl Ăn Ma Phung Nsing Ta Ƀon Rôm 16:27

jêh ri tâm Brah Yêsu Krist, knŏng êng Brah Ndu jêng Nơm blau mĭn, geh nau chrêk rmah n'ho ro mâu blau lôch! Amen.

Yôsuê 23:15

Tơlah tâm lĕ nau ueh Yêhôva Brah Ndu khân may hŏ lah jêh tât di ngăn jêh ma khân may, pônây lĕ Brah Yêhôva mra djôt lĕ nau mhĭk tât ma khân may đŏng, kŏ tât Păng ƀư rai lơi khân may bơh bri ueh aơ Yêhôva Brah Ndu khân may hŏ ăn jêh ma khân may.

Yuđas 1:25

jêng Brah Ndu knŏng nguay, Nơm Tâm Rklaih he, ma Brah Yêsu Krist, Kôranh Brah he, geh nau tâm rnê, nau rnam, nau ktang jêh ri nau dơi ntơm bơh lĕ rngôch rnôk lor, aƀaơ aơ jêh ri ma tât n'ho ro! Amen.

I Samuel 2:3

Găp hơi, lơi hôm ngơi lĕ rngôch nau sưr! Lơi dĭng ăn ôh lĕ nau ngơi ƀlăch ƀlêr luh du tă bơh bâr mbung khân may! Yorlah Brah Yêhôva jêng Brah Ndu gĭt lĕ rngôch, Păng veh njing lĕ rngôch kan bu ƀư.