Êsai 19:18 - Nau Brah Ndu Ngơi 2023

¹⁸ Tâm nar nây, tâm bri Êjipt mra geh prăm rplay ƀon toyh ngơi nau bri Kanaan jêh ri ton săk ma amoh Brah Yêhôva ma phung tahan. Tâm prăm rplay ƀon nây, geh du ƀon bu mra kuăl jêng Ƀon Ƀư Rai.

Êsai 19:18 ပူးပေါင်းရင်းမြစ်များ

Nau Ntơm 11:1

Rnôk nây lĕ rngôch jŭm bri văr neh ntu geh du ntil nau ngơi jêh ri dŏng nsum du rplay ngơi.

Nêhêmi 10:29

tâm rnglăp ndrel phung oh nâu jêh ri phung ndrŏng khân păng gay sơm ton hăn tĭng tâm nau vay Brah Ndu hŏ ăn jêh ma Y-Môis, oh mon Păng, jêh ri djôt prăp, ƀư tĭng kơt lĕ rngôch nau vay ntăm, nau vay ƀư jêh ri nau vay dăp bơh Brah Yêhôva jêng Kôranh Brah hên.

Nau Mprơ Ơm 68:31

Ndơ nhhơr ma hađăch mra djôt tă bơh Êjipt, Phung Êthiôpi mra gơnh yơr ti mpeh ma Brah Ndu.

Êsai 11:11

Tâm nar nây, Kôranh Brah mra yơr ti du tơ̆ đŏng gay chuai phung ƀon lan hôm e klen Păng, jêng phung ƀon lan hôm e tă bơh bri Asiri, Êjipt, Pathrôs, Kus, Êlam, Sinar, Hamat jêh ri bơh lĕ gôl dak mƀŭt.

Êsai 14:1

Ngăn yơh, Brah Yêhôva mra yô̆ nđach ma Yakôb jêh ri hôm du tơ̆ đŏng săch Israel. Păng mra ăn ma khân păng gŭ tâm bri khân păng nơm. Phung bu năch mra tâm rnglăp đah khân păng jêh ri mra gŭ ndrel đah ngih Yakôb.

Êsai 19:19

Tâm nar nây, mra geh du nơng ƀư brah prăp ma Brah Yêhôva ta nklang bri Êjipt, jêh ri du meh n'gâng prăp ma Brah Yêhôva ta n'har neh păng.

Êsai 19:21

Brah Yêhôva mra ƀư ma phung Êjipt gĭt năl Păng; jêh ri tâm nar nây, phung Êjipt mra gĭt năl Brah Yêhôva. Khân păng mra nhhơr mpa ƀư brah jêh ri ndơ ƀư brah gay yơk mbah ma Păng; khân păng mra ton ma Brah Yêhôva jêh ri ƀư nanê̆ ngăn nau nây.

Êsai 2:11

Muh măt kon bunuyh sưr rlau bu mra n'glưh lơi, Nau sưr rlau kon bunuyh mra chŭn; Tâm nar nây, Knŏng du huê Brah Yêhôva dơm geh nau yơk prêh.

Êsai 27:13

Tâm nar nây, bu mra uh nŭng toyh. Nôk nây, phung nhhơt jêh tâm bri Asiri jêh ri phung bu nsot jêh ta bri Êjipt mra văch yơk mbah ma Brah Yêhôva ta yôk kloh ueh ta ƀon Yêrusalem.

Êsai 65:16

Yor nây, mbu ta klơ neh ntu mbơh sơm nau ueh lăng ma păng nơm Mra sŏk amoh Brah Ndu nanê̆ ngăn ma nau mbơh sơm; Jêh ri mbu ta klơ neh tâm ton Mra sŏk amoh Brah Ndu nanê̆ ngăn ma nau tâm ton. Yorlah nau rêh ni kăl e chuêl jêh, Jêh ri mâu hôm mpơl tanăp măt Gâp.”

Yêrêmi 12:16

Tơlah khân păng gơih nti trong ƀon lan Gâp, ton tâm amoh Gâp pô aơ: ‘Ngăn yơh Brah Yêhôva gŭ rêh mro mrăng!’ — nâm bu phung khân păng hŏ nti ăn ma ƀon lan Gâp ton tanăp brah Baal — pôri nôk nây khân păng mra dơi nâp ta nklang phung ƀon lan Gâp.

Sôphôni 3:9

Rnôk nây, Gâp mra rgâl phung ƀon lan, Ƀư kloh trôm mbung, Gay lĕ rngôch kuăl amoh Brah Yêhôva da dê, Du ai pah kan ma Păng ndrel n'grŭp.

Sakari 2:11

Tâm nar nây, âk bri dak mra tâm rnglăp đah Brah Yêhôva, jêh ri mra jêng phung ƀon lan Gâp; Gâp mra gŭ ta nklang khân may.” Nôk nây, khân may mra gĭt Brah Yêhôva ma phung tahan hŏ njuăl jêh gâp hăn văch n'hanh khân may.

Nau Vay Nkah Tay 10:20

Ăn khân may klach yơk ma Yêhôva Brah Ndu khân may, pah kan ma Păng, gŭ êp Păng jêh ri khân may mra ton ma amoh Păng.