Êsai 14:1 - Nau Brah Ndu Ngơi 2023

¹ Ngăn yơh, Brah Yêhôva mra yô̆ nđach ma Yakôb jêh ri hôm du tơ̆ đŏng săch Israel. Păng mra ăn ma khân păng gŭ tâm bri khân păng nơm. Phung bu năch mra tâm rnglăp đah khân păng jêh ri mra gŭ ndrel đah ngih Yakôb.

Êsai 14:1 ပူးပေါင်းရင်းမြစ်များ

Êsther 8:17

Tâm ăp n'gor, tâm ăp rplay ƀon, ta ntŭk geh jêh nau ntăm jêh ri samƀŭt nau ntrŭnh bơh hađăch lĕ tât, pôri phung Yuđa răm maak jêh ri hâk răm ngăn, du nau nhêt sông toyh jêh ri sông sa tâm nau răm maak. Geh âk bunuyh tâm phung ntil mpôl bunuyh êng tâm n'gor chroh đŏng tĭng nâm phung Yuđa, yorlah khân păng klach krit ngăn ma phung Yuđa.

Nau Mprơ Ơm 102:13

May mra gơnh yô̆ nđach ma ƀon Siôn; Yorlah jêng mông May ăn nau yô̆ ma păng. Jêh ri mông tât jêh.

Nau Mprơ Ơm 102:14

Phung oh mon May rŏng ma ăp găr lŭ Siôn Jêh ri yô̆ nđach ma lĕ ndruyh neh păng đŏng.

Nau Mprơ Ơm 143:12

Tâm nuih n'hâm ueh May, dăn nkhĭt lơi lĕ phung rlăng gâp, Ƀư rai lĕ rngôch phung tŭn jot gâp Yor gâp jêng oh mon May.

Nau Mprơ Ơm 98:3

Păng kah gĭt tay nau ueh jêh ri ma nau răp jăp Păng Đah ngih phung Israel; Lĕ rngôch dŭt bri neh saơ jêh Nau yô̆ Brah Ndu tâm rklaih he.

Êsai 19:18

Tâm nar nây, tâm bri Êjipt mra geh prăm rplay ƀon toyh ngơi nau bri Kanaan jêh ri ton săk ma amoh Brah Yêhôva ma phung tahan. Tâm prăm rplay ƀon nây, geh du ƀon bu mra kuăl jêng Ƀon Ƀư Rai.

Êsai 21:1

Nau mbơh lor ma bri rdah dăch dak mƀŭt. Păng tât tă bơh bri rdah, Jêng nkual neh klach krit, Tâm ban ma sial vănh blông rdu bri Nêgep.

Êsai 27:6

Tât mông Yakôb mra hon reh, Israel geh rmlom jêh ri dang kao, Jêh ri khân păng mra play bêng klơ neh.

Êsai 41:8

Ƀiălah ơ phung Israel, khân may jêng oh mon Gâp, Ơ Yakôb, jêng nơm Gâp hŏ săch jêh, Khân may jêng noi deh Y-Abraham, mĭt jiăng Gâp.

Êsai 41:9

Gâp hŏ kuăn jêh may bơh bôl bri neh, Kuăl jêh may tă bơh bri ngai Jêh ri lah ma may pô aơ: “May jêng oh mon Gâp, Gâp hŏ săch jêh may, mâu chalơi may ôh.”

Êsai 44:1

Aƀaơ aơ ơ phung Yakôb, oh mon Gâp, Ơ Israel Gâp hŏ săch jêh, iăt hom!

Êsai 45:14

Pô aơ Brah Yêhôva lah tâm ban pônây: “Drăp ndơ bri Êjipt, ndơ tăch kao bri Kus Jêh ri phung Sabê, bunuyh juat toyh, Mra văch ma may da dê, jêh ri jêng ndơ may; Khân păng mra tĭng ndô̆ may, djôt nse rvăk, Păn tanăp may, khân păng mra vơh vơl ma may jêh ri lah: ‘Nanê̆, Brah Ndu gŭ ndrel ma khân may; Rlau ma Păng, mâu geh Nơm êng ôh, Mâu geh Brah Ndu êng ôh!’”

Êsai 47:1

Ơ bu ur druh ƀon Babilôn, Trŭnh jêh ri gŭ hom tâm ndruyh neh! Ơ kon bu ur phung Kaldê! Gŭ hom ta neh, mâu hôm gŭ ta sưng hađăch ôh! Yorlah bu mra mâu hôm rnha ma may Jêng rdơ̆ rbăn ueh lăng ôh.

Êsai 49:10

Khân păng mâu mra ji ngot ôh, mâu lĕ ji hir, N'hâm duh jêh ri nar mâu hôm ƀư rêh ni ma khân păng ôh, Yorlah Nơm yô̆ nđach ma khân păng mra njŭn khân păng, Njŭn leo khân păng văch dăch lĕ dak n'hor.

Êsai 49:13

Ơ lĕ ndâr trôk, troh nter hom! Ơ neh ntu, răm maak hom! Ơ yôk, nter troh mprơ hom! Yorlah Brah Yêhôva hŏ bonh leng jêh phung ƀon lan Păng, Jêh ri yô̆ nđach ma phung rêh ni.”

Êsai 49:15

“Dơi lĕ du huê bu ur me chuêl pu toh ma kon păng, Mâu lah mâu yô̆ ôh ma kon păng bơh ndŭl păng nơm? Nđâp tơlah păng chuêl kon păng, Ăt Gâp mâu mra chuêl may ôh.

Êsai 49:25

Ƀiălah Brah Yêhôva lah: “Nanê̆, đơ phung bunuyh tă nơm dăng bu nhŭp mra dơi rklaih, Bu mra mplơ̆ tay ndơ bơh phung janh ƀai sŏk pit; Yorlah Gâp mra tâm rdâng đah phung tâm rdâng đah may, Jêh ri Gâp yơh mra tâm rklaih phung kon may.

Êsai 49:7

Brah Yêhôva, Nơm Tâm Chuai jêh ri nơm Kloh Ueh Israel, Lah ma nơm bu rmot ngăn, Ma nơm phung ƀon lan aơ mưch rmot, jêng oh mon ma nơm geh nau dơi toyh: “Phung hađăch mra saơ jêh ri dâk; Phung kon hađăch mra păn mbah, Yorlah Brah Yêhôva jêng Nơm răp jăp, Nơm Kloh Ueh Israel, Nơm săch jêh may.”

Êsai 54:3

Yorlah ay mra ƀư dĭ mpeh pa ma jêh ri mpeh pa chiau; Phung kon sau ay mra pit in lĕ bri dak jêng ndrăp ndơn, Khân păng mra ƀư ăn lĕ ƀon toyh jêng rngol jêh plơ̆ jêng âk phung ƀon lan.

Êsai 55:7

Ăn phung ƀai chalơi hom trong păng nơm, Ăn bunuyh kue chalơi hom nau păng mĭn; Plơ̆ sĭt hom ma Brah Yêhôva, Păng mra yô̆ an, Văch hom ma Brah Ndu he, yorlah Păng mra yô̆ an rmeh ler.

Êsai 56:3

Phung bu năch plơ̆ sĭt ma Brah Yêhôva lơi dĭng ngơi pô aơ: “Nanê̆ ngăn Brah Yêhôva mra tâm nkhah gâp bơh phung ƀon lan Păng.” Bunuyh bu char mâu lĕ dơi ngơi: “Aơ, gâp jêng du tơm si kro.”

Êsai 60:10

Phung bu năch mra rdâk tay mpêr ƀon may, Phung hađăch khân păng mra pah kan ma may. Yorlah tâm nau Gâp ji nuih, Gâp hŏ dong may, Ƀiălah aơ Gâp lŏ yô̆ ma may, tĭng nau yô̆ Gâp.

Êsai 60:14

Phung kon bu klâu phung tŭn jot may Mra văch kŭnh bôk văch ma may; Lĕ rngôch phung tâm rmot ma may Mra chon mon tanăp jâng may. Khân păng mra rnha may jêng Ƀon Brah Yêhôva. Jêng Ƀon Siôn ma Nơm Kloh Ueh Israel.

Êsai 66:20

Brah Yêhôva lah: “Phung bu năch mra njŭn lĕ rngôch phung oh nâu khân may plơ̆ sĭt bơh lĕ rngôch bri dak. Khân păng rdeng khân may klơ seh, ndeh, tâm ưn, ncho seh bri jêh ri seh samô, hăn ta yôk kloh ueh Gâp jêng Yêrusalem, gay nhhơr khân păng tâm ban ma du mpa nhhơr ma Brah Yêhôva; tâm ban đŏng phung Israel djôt leo mpa nhhơr tâm ndơ dŏng kloh rsang lăp ma ngih Brah Yêhôva.”

Yêrêmi 16:15

Ƀiălah mra lah: ‘Tĭng nâm bu Brah Yêhôva gŭ rêh mro mrăng, jêng Nơm hŏ njŭn leo kon sau phung ƀon lan Israel plơ̆ sĭt tă bơh mpeh pa lơ jêh ri tă bơh lĕ rngôch bri dak khân păng bu hŏ mprơh tât.’ Yorlah Gâp mra njŭn tay khân păng plơ̆ sĭt ma bri Gâp hŏ ăn jêh ma phung chô yau khân păng.”

Yêrêmi 29:14

Brah Yêhôva lah: “Gâp mra ăn khân may dơi mâp Gâp jêh ri gâp mra njŭn leo khân may bơh ntŭk ƀư dĭk. Gâp mra rgum tay khân may bơh lĕ rngôch bri dak jêh ri bơh lĕ rngôch ntŭk Gâp hŏ mprơh khân may. Gâp mra njŭn khân may sĭt tă bơh ntŭk Gâp hŏ nhŭp veng leo jêh khân may.”

Yêrêmi 30:8

Brah Yêhôva ma phung tahan lah: ‘Tâm nar nây, Gâp mra nkê̆ch lơi mâng mbăk bơh trô ko may, Tôch lơi rse kât ma may, Phung bu năch mâu mra đă may pah kan đŏng ôh.

Yêrêmi 31:4

Ơ bu ur druh phung Israel! Gâp mra ndâk may jêh ri may mra ndâk tay, May mra nkrơ̆ tay ma gâr jê̆, Jêh ri hăn pâl ntalơ̆ ta nklang phung ƀư nau răm maak.

Yêrêmi 50:33

Brah Yêhôva ma phung tahan lah: “Phung kon sau Israel jêh ri phung kon sau Yuđa bu tŭn jot da dê; đơ phung nhŭp leo khân păng nkân khân păng ăn rjăp da dê, mâu ŭch mƀơk khân păng ôh.

Yêrêmi 51:51

Hên bêk prêng yorlah tăng nau bu nduyh; Nau prêng nkŭm ta muh măt hên Yorlah phung bu năch hŏ lăp jêh Tâm ntŭk kloh ueh ngih Brah Yêhôva.

Êsêkiêl 16:60

Nđâp tơlah pônây, ăt Gâp mra kah gĭt tay nau tâm rnglăp Gâp nơm ƀư jêh đah ay tâm rnôk ay hôm druh mom, jêh ri Gâp mra ƀư nau tâm rnglăp đah ay du nau tâm rnglăp n'ho ro.

Êsêkiêl 47:22

Ăn khân may mra nchroh gay tâm pă drăp ndơn ăn ma khân may nơm jêh ri phung bu năch gŭ ta nklang khân may jêh ri deh kon sau ta nklang khân may. Khân may uănh khân păng nâm bu phung ƀon lan deh jêh ri văch ma toyh tâm bri Israel; khân may ăt dơi tâm pă drăp ndơn ta nklang phung mpôl băl Israel.

Sakari 1:17

Mbơh hom du tơ̆ tay đŏng pô aơ Brah Yêhôva ma phung tahan lah: ‘Lĕ rngôch ƀon toyh Gâp mra ăn âk bêng ma drăp ndơ, Brah Yêhôva mra bonh leng yôk Siôn jêh ri săch tay đŏng ƀon Yêrusalem.’”

Malachi 1:11

Yor ntơm bơh nar luh tât nar nhâp, tâm amoh Gâp jêng dŭt toyh ta nklang tâm lĕ rngôch bri dak. Gŭ lam ntŭk, bu mra nhhơr ndơ ƀâu kah jêh ri nhhơr ndơ ƀư brah kloh ma amoh Gâp, yor amoh Gâp jêng dŭt toyh ta nklang lĕ rngôch bri dak.” Brah Yêhôva ma phung tahan lah pônây.

Luka 1:54

Păng hŏ kơl jêh Israel, oh mon Păng, Jêh ri kah gĭt tay nau Păng yô̆ nđach.

Luka 2:32

Jêng nau ang sol trong ma phung bu năch, Jêh ri jêng nau chrêk rmah phung Israel, jêng phung ƀon lan May.”