Santiago 4:1 - Emberá Chamí

¹ ¿Machi sakãe chĩobadama maud̶e oa kachirua berreabadama? Machiba kachirua wau kʉ̃ria panuu machi sõd̶e chĩo b̶uu maka waud̶amera.

Santiago 4:1 ပူးပေါင်းရင်းမြစ်များ

Mateo 15:19

Ẽbẽra sõd̶ebena nakʉ kʉ̃risia kachirua awara wãbarii: mia beayu; ab̶a miakãid̶a junebena ome kãi nub̶eeyu; waabenarã ome ne kachirua wauyu; chiruayu; setaa jarayu; ab̶au ʉ̃rʉbena miadaa berreayu; makʉ kʉ̃risia.

Juan 8:44

Machi akõre chi jʉbawãe niibʉ. Maud̶eeba ichiba kʉ̃ria b̶uu machiba waud̶ai kʉ̃ria panuu. Mau arab̶aed̶eed̶e mia beabariibʉ. Biawãrad̶eeba b̶uakau, chi biawãra ichid̶e wãꞌãed̶eeba. Setaa jaraaruud̶e, ara ichi kĩra setaa jarabarii, setaa jarabariid̶eeba maud̶e seta akõred̶eeba.

Romanos 7:23

Maamina june kʉ̃risia sid̶a mʉ sõd̶e b̶uu. Mauba mʉ jʉ̃a uru b̶uu kĩra mʉʉmaa kachirua waubibarii. Chi mʉʉba biꞌia wau kʉ̃ria b̶uu mau kʉ̃risiaba ida waubi kʉ̃riakau, ne bia waui kʉ̃risia ome chĩo b̶uu kĩra.

Romanos 7:5

Dachi nau kakuaba wau kʉ̃ria b̶uud̶eeba nibasid̶aud̶e Moisesba b̶ʉd̶ad̶e jara b̶uu kakua kachirua aude wau kʉ̃riasid̶au. Maud̶e kachirua waud̶ai panuu kakua biud̶ai panasid̶au.

Romanos 8:7

Ab̶auba chi nau kakuaba wau kʉ̃ria b̶uu kʉ̃risia b̶uaruubʉrã, Dachi Akõre kĩramaabʉ. Moisesba b̶ʉd̶a wau kʉ̃riakau; ne ab̶a bid̶a poyaa waukau.

Gálatas 5:17

Nau kakuaba kachirua wau kʉ̃ria b̶uu Dachi Akõre Jauriba kʉ̃riakau. Maud̶e Dachi Akõre Jauriba waubii kʉ̃ria b̶uu nau kakuaba kʉ̃riakau. Mau ãbua biꞌia panad̶akaud̶eeba machiba wau kʉ̃ria panuu poyaa waud̶aabai.

Colosenses 3:5

Maud̶eeba joma nau iujãad̶ebena kʉ̃risia machi sõd̶e b̶uu ida b̶ústuru. Dachi kakuaba barikiu kachirua waurã́sturu, mia kĩra nejasia waurã́sturu, ne mia pera waurã́sturu, kʉ̃risia kachirua kʉ̃risiarã́sturu, maud̶e ne kaebea ãrea uru panad̶ai kʉ̃ria panarã́sturu. Chi ne kaebea ãrea kʉ̃ria b̶uu, Dachi Akõre kuenda juaba ne kaped̶aad̶ad̶e ijãa b̶uu kĩra nii.

2 Timoteo 2:23

Oa kachirua berrearã́se chi arakʉd̶e kʉ̃risiad̶akau nuree ome, kuitaa b̶uud̶eeba mauba dachi oa kachirua berreabiabarii.

Tito 3:3

Biawãra naed̶e dachia bid̶a kʉ̃risia biꞌiwãe panasid̶au, Dachi Akõred̶e ijãad̶aabai panasid̶au, biꞌiwãe kʉ̃risia panasid̶au. Dachiba kachirua wau kʉ̃ria nuree maud̶e kĩrajʉʉ wau kʉ̃ria nuree, chibari baita bari trajabarii kĩra joma waubachid̶au. Barikia kachiruad̶e nibabachid̶au, waabenarãba uru panuu kakua sõd̶e kachirua panabachid̶au, waabenarãba dachi kĩramaabachid̶au, maud̶e dachiba waabenarã kĩramaabachid̶au.

Tito 3:9

Maamina barikia bed̶ea biawãe b̶uu kakau oa kachirua berrearã́se. Maud̶e Moisesba b̶ʉd̶a ʉ̃rʉbena oa kachirua berrearã́se. Maud̶e dachi nabẽraed̶ebenarã trʉ̃ jaradeabadau ida b̶use. Joma mau biꞌiwãe b̶uu maud̶e ab̶a bid̶a karibakau.

Santiago 1:14

Maumaarã kachirua waui kʉ̃risia b̶eebarii ara dachiba maka wau kʉ̃ria panuud̶eeba.

Santiago 4:3

Maud̶e machiba Dachi Akõremaa ʉtaa id̶iiduud̶e ne poyaa adaud̶akau kʉ̃risia kachiruad̶eeba ʉtaa id̶ibadaud̶eeba. Machiba ʉtaa id̶ibadau, ara machiaburu kʉ̃ria panuu kĩra waud̶ai baita.

1 Pedro 1:14

Warr ũribaba nii kĩra panásturu. Nau kakuaba kachirua wau kʉ̃ria b̶uu waa waurã́sturu Dachi Akõred̶e ijãad̶awẽa panasiid̶e waubachid̶au kĩra.

1 Pedro 2:11

Mʉ ãbarã, nau iujãad̶e machi ãibena druad̶ebenarãb̶u. Maud̶eeba mʉʉba machimaa chi chuburia id̶iiruu nau kakuaba kachirua wau kʉ̃ria b̶uu ida b̶ud̶amera. Mau ara dachi ome chĩo b̶uu.

2 Pedro 2:18

Ãchiba mipitaa berreaduuba jaradeabadau. Maamina mauba aid̶akau. Ãchiba jaradeabadau nau kakuaba kachirua wau kʉ̃ria b̶uu waud̶ai panuu. Maka chi ara ea kachiruad̶ebena wãped̶aad̶a nuree ãchiba setaa kũruabadau waya kachirua waud̶amera.

2 Pedro 3:3

Nau ãrea kuitásturu: kaad̶ebena ewarid̶e Dachi Akõre atua jarabadaurã baraai. Ãchi kakuaba kachirua wau kʉ̃ria b̶uu wau panad̶ai.