Santiago 1:3 - Emberá Chamí

³ Machiba kuitaa panuu maka ãrea biꞌiwãe panuud̶e Dachi Akõred̶e ijãa paneeduubʉrã, biꞌia dauchia jãaduad̶ai kuitaad̶ai.

Santiago 1:3 ပူးပေါင်းရင်းမြစ်များ

Lucas 21:19

Maamina chi kaad̶earebena ewarid̶aa dauchia jãadua mʉʉd̶e ijãa panuubʉrã, Dachi Akõreba mau karibai.

Romanos 15:4

Joma Dachi Akõre bed̶ead̶e b̶ʉd̶a dachimaa jaradeai baita b̶uu. Dachi sõbiabiabarii maud̶e aid̶abarii joma dauchia jãadua panad̶amera. Maka dachiba biawãra kuitaa panuu Dachi Akõre ome ewaricha biꞌia panad̶ai.

Romanos 2:7

Chi nureerãba biꞌia wau panuu Dachi Akõreba maarã biꞌia unumera, biꞌia jaramera maud̶e ewaricha ãchi ome chokae b̶uamera. Maarã biawãra chokae panabiai.

Romanos 8:25

Maamina chi dachiba esed̶au panuu wabid̶a wãꞌãe panuud̶eeba joma dauchia jãadua panuud̶eeba kuitaa panuu biawãra adaud̶ai.

Romanos 8:28

Mau awara Dachi Akõreba kʉ̃risia b̶uad̶a kĩra chi ichi kʉ̃riabadau ichiba iukuasii. Dachiba kuitaa panuu maarã baita Dachi Akõreba ne jomad̶e biꞌia waubarii.

2 Corintios 4:17

Dai ʉ̃raud̶e ãrea biꞌiwãe paneebadamina, mauba dai aid̶a b̶uu, maad̶akare chi Dachi Akõre kĩrawãread̶e ewaricha panad̶ai baita. Mau kĩrawãrea aude bibuara b̶uai chi id̶ibae b̶aꞌãra biꞌiwãe paneebadau audeara.

Colosenses 1:11

Daiba Dachi Akõremaa ʉtaa id̶i panuu ichi poyaabarii ãrea b̶uud̶eeba machi chaarea panad̶amera. Maka machi ãrea biꞌiwãe paneeduud̶e maud̶e waabenarãba machi kachirua wauduud̶e, biꞌia dauchia jãadua panad̶ai.

2 Tesalonicenses 1:4

Mau baita daiba ẽbẽrarã Dachi Akõred̶erã panuucha machi ʉ̃rʉbena kĩrajʉʉ nebʉrʉbadau. Daiba jarabadau ẽbẽrarãba kachirua waud̶ai baita wãraa panumina machiba Cristod̶e wabid̶a ijãa panuu maud̶e ãrea biꞌiwãe panumina joma dauchia jãadua panuu.

2 Tesalonicenses 3:5

Maud̶e kʉ̃ria panuu Dachi Mechiuba kuitaabiai machi ãrea kʉ̃ria b̶uu Dachi Akõre kĩra. Maud̶e kʉ̃ria panuu ichiba karibai Cristoba jãaduad̶a kĩra jãaduad̶amera.

Hebreos 10:36

Machiba mau joma esed̶au panad̶ai panuu. Makaburu Dachi Akõreba kʉ̃ria b̶uu waud̶aped̶a ichiba deai jarad̶a joma adaud̶ai.

Hebreos 12:1

Mau ẽbẽrarã ãreaba Dachi Akõred̶e maka biawãra ijãasid̶aud̶eeba, dachia bid̶a ara mau kĩra ijãa panad̶ai panuu. Chi dachimaa ida ijãabiakau maud̶e ara dachiba kachirua waubadauba dachi b̶ʉra uru b̶uabarii ãyaa b̶ud̶aped̶a, maabae joma dauchia jãadua panuud̶eeba wã́duru chi need̶ai panuumaa bad̶ai baita.

Hebreos 6:12

Daiba kʉ̃riad̶awẽe machi koꞌoa nuread̶ai, maumaarã kʉ̃ria panuu machi waabenarã ãbarã kĩra nuread̶ai. Ãchiba Cristod̶e ijãa panuud̶eeba maud̶e joma jãadua panuud̶eeba, Dachi Akõreba deai jarad̶a joma adaud̶ai.

1 Pedro 1:7

mau biꞌiwãe panuud̶eeba unubid̶ai Jesucristod̶e biawãra ijãa panuu. Machiba ijãa panuu nee kĩra b̶uu. Nee wãsiaba dorrab̶aribibadau mau chi néeturu b̶eemera. Ara mau kĩra machi ãrea biꞌiwãe panuu jãadua panuud̶eeba unubi panuu Jesucristod̶e biawãra ijãa panuu. Mau ijãa panuu nee audeara biꞌia b̶uu nee wãꞌãebariid̶eeba. Machiba Jesucristod̶e biawãra ijãa panuu unubi panuud̶eeba, ichi unuuduud̶e Dachi Akõreba machi biꞌia unui, biꞌia jarai maud̶e chi mechiurã b̶ui.

2 Pedro 1:6

kʉ̃risia kuitaa panuud̶e jʉrʉ́sturu machi kakua kĩra jipa nuread̶ai baita; machi kakua kĩra jipa panuud̶e jʉrʉ́sturu joma jãaduad̶ai baita; joma jãadua panuud̶e jʉrʉ́sturu Dachi Akõreba kʉ̃ria b̶uu kĩra nuread̶ai baita;