Romanos 9:32 - Emberá Chamí

³² ¿Sakãe makaabasma? Makaabasii Cristod̶e ijãad̶ai audeara ãchiba wau panuud̶eeba ichi daad̶e jipa nuread̶ai baita jʉrʉ panasiid̶eeba. Biawãra ãchiba Cristod̶e ijãad̶aabasii moomaa drʉʉduu kĩra.

Romanos 9:32 ပူးပေါင်းရင်းမြစ်များ

Mateo 13:57

Ãchiba Jesús ijãad̶ai kʉ̃riad̶aabasii. Maud̶eeba Jesusba jarasii: —Dachi Akõre baita berreabarii ãibena druad̶e wapeadee nii abadau, maamina ara ichi druad̶ebenarãba maud̶e ichi ded̶ebenarãba wapeadee nii ad̶akau.

Lucas 2:34

Maud̶e Simeonba ãchimaa biꞌia jaraped̶a Mariamaa naka jarasii: —Dachi Akõreba nau warr deasii israeld̶ebenarã ãrea biꞌia b̶umera maud̶e ãrea biꞌiwãe b̶umera. Kuitaabiai ichi Dachi Akõred̶ebena nee b̶uu, maamina ichi ʉ̃rʉbena kachirua jarad̶ai.

Lucas 7:23

Chi mʉʉd̶e ijãai ida b̶ukau nii biꞌia b̶uai.

Romanos 10:3

Ãchiba unud̶akau saka Dachi Akõreba ẽbẽrarã ichi jipa nuree baara duanui, ichiba bed̶ea dead̶a kĩra. Maumaarã mau ida b̶ud̶aped̶a ara ãchiba wau panuuba jʉrʉ panuu Dachi Akõre puuru jipa b̶uu bad̶ai baita.

Romanos 11:11

Nau mʉʉba id̶iiruu: ¿judiorãba Cristo ida b̶usid̶aud̶eeba waa Dachi Akõre ome poyaa biꞌia nuread̶aabai panuka? ¡Makawãema! Maumaarã maka wausid̶aud̶eeba Dachi Akõreba judiowãerã karibabarii. Maka judiorãba jiwaad̶aped̶a ichi kʉ̃riad̶ai.

Romanos 4:16

Dachi Akõreba deai jarad̶a dachiba adaud̶ai ichid̶e ijãa panuud̶eeba. Dachi Akõreba ichi sõbiad̶eeba mau bari dea b̶uu. Maud̶eeba joma Abraham ẽbẽrarã, chi Moisesba b̶ʉd̶ad̶eeba panuurãba mau biawãra adaud̶ai. Maamina ãchiaburu adaud̶aabai, maumaarã judiowãerã bid̶a Abraham kĩra Dachi Akõred̶e ijãaduubʉrã adaud̶ai. Maka Abraham joma dachi, chi Dachi Akõred̶e ijãabadaurã akõrebʉ.

1 Corintios 1:23

Maamina daiba Cristo cruzd̶e biud̶a jaradea panuu. Mau bed̶ea judiorãba biꞌia ũrid̶akau. Judiowãerãba mau biꞌiwãe b̶uu kʉ̃risiabadau.

1 Pedro 2:6

Dachi Akõre bed̶ead̶e Jesucristo ʉ̃rʉbena naka b̶ʉ kub̶uu: «Ũrísturu, Sión puurud̶e mʉʉba de waui baitabena mo chi bibuara b̶uu b̶uuruu. Mau mo bia maud̶e mau chi nejarr ãrea id̶ibadau mʉʉba jʉrʉ adausii. Maud̶eeba chi ichid̶e ijãa b̶uuba bari ijãa b̶uabai».

1 Pedro 2:8

Maud̶e naka b̶ʉ kub̶uu: «Ẽbẽrarã mau moomaa drʉd̶aped̶a b̶aed̶ai». Ãchiba Dachi Akõre bed̶ea ijãad̶awẽa panuud̶eeba moomaa drʉʉduu kĩra nuree. Dachi Akõreba maarã b̶usii maka nuread̶amera.