Romanos 9:30 - Emberá Chamí

³⁰ ¿Mauba kãare jara b̶uma? Judiowãerãba jʉrʉd̶aka basii chi Dachi Akõre puurud̶ebena jipa nureerã baara panad̶ai baita. Maamina maka paneesid̶au, Cristod̶e ijãasid̶aud̶eeba.

Romanos 9:30 ပူးပေါင်းရင်းမြစ်များ

Romanos 10:10

Biawãra chi mauba sõd̶eeba ijãaruubʉrã, chi Dachi Akõre daad̶e jipa nuree baara b̶uai. Iiba Jesús jomaurã Mechiu aaruubʉrã Dachi Akõreba karibai.

Romanos 10:20

Maud̶e Isaiasba Dachi Akõred̶eeba wapeawẽa naka jarasii: «Chi mʉ jʉrʉd̶awẽa panad̶aba mʉ unusid̶au. Chi mʉ ʉ̃rʉbena id̶id̶awẽa panad̶arãmaa mʉ ʉ̃rʉbena kuitaabiasii».

Romanos 10:6

Maamina chi Cristod̶e ijãa b̶uu Dachi Akõre daad̶e jipa nuree baarabena bai baita naka jara b̶uu: «Bichi sõd̶eeba jararã́se: “¿Kai bajãad̶aa wãi b̶uma?” (Cristo nau iujãad̶aa neebii baita).

Romanos 3:5

Mʉ berrearuu ẽbẽrarã berreabadau kĩra. Chi nureerãba jarabadau kachirua wau panuud̶eeba Dachi Akõre jipa nii arakʉd̶e unubiabadau abadau. Maud̶e Dachi Akõreba kastikaaruubʉrã, ichi jipa niiwãe abadau. ¿Chi maka jara panuurãmaa kãare jarad̶aima? ¿Jãarãba jarad̶aika Dachi Akõre jipa niiwãe dai kastikaid̶eeba?

Romanos 4:11

Abrahamba Dachi Akõred̶e ijãasiid̶eeba, mukĩra chi kakua tõowẽa b̶uasmina Dachi Akõreba ichi nebʉraswãe nii asii. Mau kuitaabiai baita Abrahamba mawãare mukĩra chi kakua tõosii. Mukĩra chi kakua tõowẽa nureerãba Dachi Akõred̶e ijãaduubʉrã, Abraham ãchi akõrebʉ, Dachi Akõreba nebʉraswãe nuree a jara b̶uud̶eeba, ichi kĩra ijãasid̶aud̶eeba.

Romanos 4:13

Dachi Akõreba Abrahammaa maud̶e ichid̶ebena imid̶ai bad̶a ẽbẽrarãmaa nau iujãa deai asii. Maamina maka jaraabasii Abrahamba Moisesba b̶ʉd̶a uru b̶uasiid̶eeba. Maumaarã maka jarasii Abraham nebʉraswãe nii asiid̶eeba. Maka nebʉraswãe nuree asii Abrahamba ichid̶e ijãasiid̶eeba.

Romanos 4:22

Maka ijãasiid̶eeba Dachi Akõreba mau nebʉraswãe nii asii.

Romanos 4:9

Maka ¿ab̶aburu mukĩra chi kakua tõoped̶aad̶a nuree ãrea biꞌia panad̶aika? ¿Mukĩra kakua tõoped̶aad̶awẽa nuree sid̶a ãrea biꞌia panad̶aiwãeka? Daiba jarasid̶au Abrahamba Dachi Akõred̶e ijãasiid̶eeba Dachi Akõreba ichi nebʉraswãe nii asii.

Romanos 5:1

Dachi Mechiu Jesucristod̶e ijãa panuud̶eeba Dachi Akõreba dachi chi ichid̶irã jipa nuree baara duanubarii. Maud̶eeba Cristod̶eeba Dachi Akõre ome sõbia panuu.

Romanos 9:14

¿Mau ʉ̃rʉbena saka kʉ̃risia panuma? ¿Dachi Akõreba jipa waukau kʉ̃risia panuka? ¡Makawãema!

Romanos 9:31

Maumaarã israeld̶ebenarãba Dachi Akõre puuru jipa b̶uu bad̶ai jʉrʉ panasii, chi ley waubachid̶aud̶eeba. Maamina poyaa maka waud̶aabasii.

Gálatas 2:16

Maamina dachiba kuitaa panuu Dachi Akõreba ab̶a bid̶a b̶uwẽe chi jipa nuree baara, mau Moisesba b̶ʉd̶a wau b̶uud̶eeba. Maumaarã Jesucristoba mau Moisesba b̶ʉd̶a kĩra joma wausiid̶eeba, Dachi Akõreba dachi b̶ubarii chi jipa nuree baara. Maud̶eeba dachia bid̶a Jesucristod̶e ijãasid̶au maud̶e Jesucristod̶e ijãa b̶u kakua maka chi ichid̶irã jipa nuree baara duanubarii, ichiba mau b̶ʉd̶a kĩra joma waud̶a kakua. Biawãra Moisesba b̶ʉd̶a wau panuud̶eeba Dachi Akõreba dachi b̶ukau chi jipa nuree baara.

Gálatas 3:24

Biawãra Moisesba b̶ʉd̶aba dachi nu ua b̶uasii ab̶a Cristod̶e ijãaduud̶aa. Cristo neesiid̶e ichid̶e ijãa panuu kakua Dachi Akõreba dachi chi jipa nuree baara duanubarii.

Gálatas 3:8

Nabẽraed̶e Dachi Akõre bed̶ead̶e b̶ʉ kub̶uu judiowãerãba Dachi Akõred̶e ijãaped̶aad̶a basirã ichiba ãchi ichid̶irã jipa nureerã baara b̶ui basii. Maud̶eeba nabẽraed̶e Dachi Akõreba Abrahammaa chi bed̶ea bia berreasii. Ichiba naka jarasii: «Bichi kakua mʉʉba nau iujãad̶e duanuu puuru joma karibai».

Gálatas 5:5

Maamina dachiba Cristod̶e ijãa panuud̶eeba Dachi Akõre Jaurid̶eeba biawãra kuitaa panuu Dachi Akõreba dachi chi jipa nureerã baara b̶ui.

Efesios 2:12

Kĩrabásturu naed̶e machi Cristowãe nureasii maud̶e israeld̶ebenarãwãe basii. Dachi Akõre ãchi ome bed̶ea deasiid̶e ichiba machimaa ab̶a bid̶a deai bad̶a jaraabasii. Mau awara machi saka biꞌia nuread̶aiswãe panasid̶au maud̶e nau druad̶e Dachi Akõreswãe nureasii.

Filipenses 3:9

maud̶e ichi ome b̶uai baita. Mʉ ichi ome b̶uuwãe chi Moisesba b̶ʉd̶ad̶eeba, maumaarã maka nii Cristoba ichi Akõreba jarad̶a kĩra wausiid̶eeba, dachi kakua biusiid̶eeba. Mʉʉba Cristod̶e ijãa b̶uud̶eeba, Dachi Akõreba mʉ ichi ome uru b̶uu.

1 Timoteo 6:11

Maamina bichiba Cristod̶e ijãa niid̶eeba joma maud̶ebena ãyaa wãse. Jipa nibase. Dachi Akõre baara wãse. Sõd̶eeba biawãra Cristod̶e ijãa b̶uase. Jomaurã kʉ̃ria b̶uase. Joma jãaduase. Jaradea ua b̶uabarimina, jomaurã ome sõbiad̶eeba b̶uase.

Hebreos 11:7

Dachi Akõreba Noemaa jarasii chi wabid̶a unukau neei ʉ̃rʉbena. Noeba mau ijãasiid̶eeba, Dachi Akõre wapea b̶uasiid̶eeba jãba mechiu wausii ichi ded̶ebenarã karibai baita. Maka nau iujãad̶ebenarãmaa kachiruad̶e duanuu unubiasii. Ichiba ijãasiid̶eeba Dachi Akõreba ichi jipa nii unusii.

1 Pedro 4:3

Naed̶e machiba kachirua wau nureasii Dachi Akõred̶e ijãad̶akaurãba waubadau kĩra. ¡Ara basma! ¡Waa maka waurã́sturu! Waabenarã daad̶e ãrea kĩra nejasia waubachid̶au, nau kakuaba kachirua wau kʉ̃ria b̶uu waubachid̶au, itua biu nibabachid̶au, kĩrajʉʉ ewari waubadaud̶e ãrea kachirua waubachid̶au, waabenarã baara itua ãrea dobachid̶au maud̶e Dachi Akõre kuenda juaba ne kaped̶aad̶amaa ʉtaa id̶ibachid̶au. Mau Dachi Akõreba kʉ̃riakau.