Romanos 8:7 - Emberá Chamí

⁷ Ab̶auba chi nau kakuaba wau kʉ̃ria b̶uu kʉ̃risia b̶uaruubʉrã, Dachi Akõre kĩramaabʉ. Moisesba b̶ʉd̶a wau kʉ̃riakau; ne ab̶a bid̶a poyaa waukau.

Romanos 8:7 ပူးပေါင်းရင်းမြစ်များ

Mateo 12:34

¡Ẽbẽrarã dama! ¿Machi chi kachiruarãba saka ne bia berread̶aima? Ẽbẽraba ichi sõd̶e kʉ̃risia b̶uu kĩra, maka berreabarii.

Mateo 5:19

Maud̶eeba ẽbẽra ab̶aba Dachi Akõreba waubi b̶uu bed̶ead̶ebena jara b̶uu kĩra wauwẽebʉrã, b̶aꞌãra wau b̶umina; maebʉrã waabenarãmaa maka jaradearuubʉrã mau bed̶ea ũribiabayua, mau ẽbẽra waabenarã audeara kaebeu b̶uai, Bajãad̶e B̶uuba ichid̶irã ichi juad̶e ua b̶uu tãed̶e. Mau ãyaa ẽbẽra ab̶aba wauruud̶e mau bed̶ea jarad̶ad̶e jara b̶uu kĩra maud̶e waabenarãmaa jaradearuud̶e maarã bid̶a waud̶amera, mau waabenarã audeara Bajãad̶e B̶uuba ichid̶irã ichi juad̶e ua b̶uu mechiu b̶uai.

Juan 7:7

Nau iujãad̶ebenarãba machi ¿sakãe kĩramaad̶aima? Maamina mʉ kĩramaabadau, ãchiba kachirua waubadau mʉʉba arakʉd̶e jarabariid̶eeba.

Romanos 1:28

Maarãba Dachi Akõre ida b̶uped̶aad̶ad̶eeba ichiba maarã ida b̶usii kachirua kʉ̃risiad̶aped̶a maka wau panad̶amera.

Romanos 1:30

Waabenarã ʉ̃rʉbena kachirua berreabadau, Dachi Akõre kĩramaabadau maud̶e waabenarã daad̶e kachirua berreabadau. Waabenarã audeara chi bibuara nuree a kʉ̃risiabadau maud̶e maka jarabadau. Waabenarã kachirua waud̶ai baita jʉrʉbadau. Ãchi akõrerã bed̶ea ũrid̶akau.

Romanos 3:31

Jesusd̶e ijãa panuud̶eeba ¿Moisesba b̶ʉd̶a ida b̶u panuka? Makawãema, maumaarã mau Moisesba b̶ʉd̶a biꞌia b̶uu unubadau.

Romanos 5:10

Dachi wabid̶a Dachi Akõre ome chi kĩramaa nureasiid̶e ichi Warr biusiid̶eeba dachi ichi ome biꞌia b̶usii. Cristo chokae b̶uud̶eeba, maka dachi biawãra karibai.

Romanos 7:22

Biawãra mʉʉba sõd̶eeba Dachi Akõreba Moisesmaa b̶ʉbid̶a ãrea biꞌia unu b̶uu.

Romanos 8:4

Ichiba maka wausii dachiba poyaa jipa waud̶amera Moisesba b̶ʉd̶ad̶e jara b̶uu kĩra. Jãabae dachi poyaa jipa nibad̶ai nau kakuaba wau kʉ̃ria b̶uud̶e nibad̶akaud̶eeba, maumaarã Dachi Akõre Jaurid̶eeba nibabadaud̶eeba.

1 Corintios 2:14

Maamina Dachi Akõre Jauriba kuitaabi b̶uu chi Dachi Akõre Jauriwãe niiba kuitaai kʉ̃riakau, ichimaarã biꞌiwãe b̶uud̶eeba. Maud̶e poyaa kuitaakau, ab̶a Dachi Akõre Jaurid̶éburu kuitaai b̶uud̶eeba.

1 Corintios 9:21

Maud̶e chi Moisesba b̶ʉd̶a adua nuree tãed̶e b̶uud̶e mʉ ãchi kĩra b̶uabarii mʉʉd̶eeba Jesucristod̶e ijãad̶amera. Maamina mʉʉba Dachi Akõreba Moisesmaa b̶ʉbid̶a ida b̶ukau. Joma Cristoba waubi b̶uu kĩra waubarii.

Colosenses 1:21

Kachirua wau panuud̶eeba machi mau naed̶e Dachi Akõred̶ebena awara nureasii maud̶e machiba kachirua kʉ̃risia panuud̶eeba Dachi Akõre kĩramaa panasid̶au.

Colosenses 2:18

Mau baita ab̶auba machiba ne bia bajãad̶e adaud̶aabai aaduubʉrã, ijãarã́sturu. Maarã berreabadaurã setaa maka nibabadau waabenarã chi aude kaebeu nibabadau kĩra. Maarãba angelerã ãrea kʉ̃riabadau. Chi maarã daumaa unubiaped̶aad̶a ãrea jaradeabadau. Dachi juaba biꞌiwãe waui kʉ̃ria b̶uud̶eeba ẽbẽra jaradea ua b̶uabadaurã mechiurã kĩra ãyaa kʉ̃risiabadau.

2 Timoteo 3:4

Ãchi kõpaero ichi kĩramaabarii juad̶e b̶ud̶ai kachirua waumera. Ãrea kʉ̃risiaswãe barikia wau panad̶ai. Jomaurã audeara chi kuitaa ãrea nuree ad̶ai. Dachi Akõre audeara ara ãchíturu kĩrajʉʉ biꞌia kʉ̃ria nuread̶ai.

Hebreos 8:10

Maud̶e Dachi Mechiuba naka jara b̶uu: Kaad̶ebena ewarid̶e mʉʉba nau bed̶ea chiwid̶i israeld̶ebenarãmaa deai: Mʉʉba chi Moisesba b̶ʉd̶a ãchi kʉ̃risiad̶e maud̶e ãchi sõd̶e b̶ui. Mʉ ãchi Akõre bai, maud̶e ãchi mʉ ẽbẽrarã bai.

Santiago 4:4

Junebena wẽra ome kãiduu kĩra machiba Dachi Akõre ida b̶uu panuu nau iujãad̶ebenarãba waubadau kĩra waud̶ai baita. ¿Machiba wabid̶a adua panuka chi nau iujãad̶ebena kʉ̃ria b̶uu Dachi Akõre ome chi kĩramaa? Biawãra barikiuba nau iujãad̶ebena kʉ̃ria b̶uubʉrã, Dachi Akõre ome chi kĩramaa b̶eei.

2 Pedro 2:14

Ãibena wẽra ome kãi paneebadau. Ne joma kachirua wau b̶uuba kĩrased̶akau. Chi ãrea ijãawẽa nuree setaa kũruabadau. Ne joma kʉ̃riabadau. Mau kakua Dachi Akõreba ãchi nebʉra ichiai.