Romanos 14:17 - Emberá Chamí

¹⁷ Dachi Akõreba ichi juad̶e panuurãmaa jarakau kãare kod̶ai panuu maud̶e kãare dod̶ai panuu. Maumaarã kʉ̃ria b̶uu ãchiba ichi Jaurid̶eeba jipa wau panad̶ai, jirukaraayuwãe panad̶ai maud̶e kĩrajʉʉ panad̶ai.

Romanos 14:17 ပူးပေါင်းရင်းမြစ်များ

Mateo 3:2

Juanba naka jarabachii: «Bajãad̶e B̶uu neeruu ichid̶irã ichi juad̶e ua b̶uai baita. Maud̶eeba machiba kachirua waubadau ida b̶ud̶aped̶a ichimaa wã́sturu».

Mateo 6:33

Maud̶eeba machiba jʉrʉ́sturu Dachi Akõreba machi ichi juad̶e ua b̶uai, ichid̶irã baara. Kauwa panásturu ichiba waubi b̶uu waud̶ai. Maka machiba wãꞌãe panuu ichiba joma mau deai.

Lucas 14:15

Jesús ome akʉ panuuba mau ũrisid̶aud̶e ab̶auba jarasii: —Dachi Akõreba ichid̶irã ichi juad̶e ua b̶uu kĩrajʉʉ bara b̶uabarii ewari kobadaud̶e kooruu ẽbẽra ãrea biꞌia b̶uai.

Juan 16:33

Joma mau mʉʉba machimaa jarasii mʉʉd̶eeba jirukaraayuwãe nuread̶amera. Nau iujãad̶e ãrea biꞌiwãe nuread̶ai, maamina wapearã́sturu: nau iujãad̶ebena kachiruarã mʉʉba poyaasii.

Juan 3:3

Jesusba ichimaa jarasii: —Mʉʉba bichimaa biawãra jaraaruu: wãwa adaubarii kĩra, waya chiwid̶i b̶eewẽebʉrã, Dachi Akõre juad̶e poyaa b̶uabai ichid̶irã baara.

Juan 3:5

Jesusba panausii: —Mʉʉba bichimaa biawãra jaraaruu: baniad̶eeba maud̶e Dachi Akõre Jaurid̶eeba b̶ited̶ebena neewẽebʉrã, Dachi Akõre juad̶e poyaa b̶uabai ichid̶irã baara.

Hechos 13:52

Maamina chi Jesusd̶e ijãabadaurã Antioquiad̶e panuu ãrea kĩrajʉʉ panasid̶au maud̶e Dachi Akõre Jaurid̶eeba panasid̶au.

Hechos 9:31

Maumisa Judea druad̶e, Galilea druad̶e maud̶e Samaria druad̶e ãbarã jirukaraayuwãe duanasid̶au maud̶e ne baraakuasid̶au. Dachi Mechiu wapea panuud̶eeba nibasid̶au maud̶e Dachi Akõre Jauri poyaad̶eeba ãbarã aude baraasii.

Romanos 15:13

Joma chi bia dachiba esed̶au panuu Dachi Akõreba deai. Machiba ichid̶e ijãa panuud̶eeba mʉʉba kʉ̃ria b̶uu ichiba machi ãrea kĩrajʉʉbiai maud̶e jirukaraayuwãe duanubiai. Maka Dachi Akõre Jauri poyaad̶eeba machiba biꞌia kuitaad̶ai joma chi bia dachiba esed̶au panuu biawãra adaud̶ai.

Romanos 8:6

Ab̶auba chi nau kakuaba wau kʉ̃ria b̶uu kʉ̃risia b̶uaruubʉrã biui. Maamina chi Dachi Akõre Jauriba kʉ̃ria b̶uu kʉ̃risia b̶uaruubʉrã jirukaraayuwãe b̶uai maud̶e Dachi Akõre ome chokae b̶uai.

1 Corintios 1:30

Maawẽa Dachi Akõreba machi Jesucristo ome ãbua b̶usii. Maka Cristod̶eeba Dachi Akõreba ichi kʉ̃risia kuitaa dachimaa kuitaabiasii. Ichiba dachi jipa b̶usii, ara ichi baita biꞌia b̶usii, maud̶e kachiruad̶ebena karibasii.

1 Corintios 4:20

Dachi Akõre juad̶e ua b̶uud̶ebenarãba ichi ʉ̃rʉbena berread̶akau, maumaarã ichi poyaad̶eeba jipa waubadau.

1 Corintios 6:9

¿Machiba adua panuka chi kachirua waubadau Dachi Akõre juad̶e panad̶aabai, ichid̶irã baara? ¡Ara machi du ab̶a setaa kũruarã́sturu! Chi kakuaba barikiu kachirua waubadaurã, Dachi Akõre kuenda juaba ne kaped̶aad̶a kĩraare ʉtaa id̶i nuree, junebena ome kãi topaneebadaurã, mukĩra wẽra kĩra nuree, mukĩra ab̶aarakau mukĩra ome panabadaurã, nechiruabadaurã, chi nejarra kʉ̃riabadaurã, itua biu nibabadaurã, setad̶eeba waabena ʉ̃rʉbena kachirua jarabadaurã maud̶e waabena setaa kũruabadaurã Dachi Akõre puurud̶e panad̶aabai.

1 Corintios 8:8

Maamina chi ãnimara kiuru kooduuba dachi Dachi Akõre ome biꞌia b̶ukau. Maud̶eeba dachiba ko panuud̶eeba maebʉrã kod̶awẽa panuud̶eeba Dachi Akõre daad̶e biꞌia nuread̶aabai.

2 Corintios 5:21

Cristoba kachirua waukau basii. Maamina dachi baita Dachi Akõreba ichi kachirua waubarii kĩra unusii. Maka Cristod̶eeba chi Dachi Akõre jipa nii dachiba waabenarãmaa poyaa unubiabadau.

Gálatas 5:22

Maamina Dachi Akõre Jauriba nau deabarii: waabenarã kʉ̃ria nureabadau, kĩrajʉʉbadau, jirukaraayuwãe nureabadau, joma dauchia jãadua nureabadau, ẽbẽrarã baara biꞌia nureabadau, ẽbẽra bia nureabadau, chi jara panuu kĩra waubadau,

Filipenses 2:1

Cristod̶e kĩrajʉʉ panuud̶eeba, machi kĩrajʉʉbia b̶uu ichiba kʉ̃ria b̶uud̶eeba, Dachi Akõre Jauri machi ome b̶uud̶eeba maud̶e ichi kʉ̃riaba machi kĩra chuburia b̶uud̶eeba,

Filipenses 3:3

Maamina dachi chi biawãra mukĩra chi kakua tõoped̶aad̶abʉ. Dachiaburu Dachi Akõre Jaurid̶eeba ichimaa biꞌia berreabadau. Maud̶e Jesucristoba dachi baita waud̶a biꞌia jarabadau. Dachiba kʉ̃risiad̶akau Dachi Akõreba dachi jipa nuree unui, dachiba wau panuu kakua.

Filipenses 3:9

maud̶e ichi ome b̶uai baita. Mʉ ichi ome b̶uuwãe chi Moisesba b̶ʉd̶ad̶eeba, maumaarã maka nii Cristoba ichi Akõreba jarad̶a kĩra wausiid̶eeba, dachi kakua biusiid̶eeba. Mʉʉba Cristod̶e ijãa b̶uud̶eeba, Dachi Akõreba mʉ ichi ome uru b̶uu.

Filipenses 4:4

Dachi Mechiu Jesucristo ome panuud̶eeba ewaricha kĩrajʉʉ panásturu. Mʉʉba waya jaraaruu: ¡Kĩrajʉʉ panásturu!

Filipenses 4:7

Mauba Dachi Akõreba machi sõ maud̶e machi kʉ̃risia jirukaraayuwãe duanubiai Jesucristo ome panuud̶eeba. Mau jirukaraayuwãe panad̶ai ẽbẽrarãba ãchi du ab̶a poyaa kauwa kuitaad̶aabai.

Colosenses 1:11

Daiba Dachi Akõremaa ʉtaa id̶i panuu ichi poyaabarii ãrea b̶uud̶eeba machi chaarea panad̶amera. Maka machi ãrea biꞌiwãe paneeduud̶e maud̶e waabenarãba machi kachirua wauduud̶e, biꞌia dauchia jãadua panad̶ai.

1 Tesalonicenses 1:6

Arab̶aud̶e machiba dai panabachid̶au kĩra wau kopaneesid̶au. Maud̶e Dachi Mechiu nibad̶a kĩra wau kopaneesid̶au. Machi ãrea biꞌiwãe panumina Dachi Akõre Jauriba kĩrajʉʉbiasiid̶e chi bed̶ea bia ijãasid̶au.

1 Tesalonicenses 2:12

Daiba biꞌia jarasid̶au machi Dachi Akõreba kʉ̃ria b̶uu kĩra nibad̶amera. Ichiba machi iusii, ichi juad̶e ua b̶uai baita maud̶e ichi biad̶ebena uru panad̶amera.

Hebreos 13:9

Maamina waabenarãba barikiu ne ãyaa jaradeabadau. Maarãmaa ida setaa kũrabiarã́sturu. Machiba kooduuba maebʉrã kod̶awẽa panuuba aid̶akau. Chi maka wau panuuba biꞌia panad̶akau. Dachi Akõreba ichi sõbiad̶eeba aid̶a b̶uu machiba biꞌia sõd̶eeba ijãad̶amera.

1 Pedro 1:8

Machiba Jesucristo unud̶akamina mau kʉ̃ria panuu. Ʉ̃raud̶aa unud̶awẽa panumina ichid̶e ijãa panuu. Ichi kakua ãrea kĩrajʉʉ panuu. Maka kĩrajʉʉ panuud̶eeba mau kĩrajʉʉ saka b̶uu, poyaa kuitaa jarad̶awẽa panuu.

2 Pedro 1:1

Mʉ Simón Pedrobʉ, Jesucristo baita bari trajabariibʉ maud̶e ichiba bʉid̶abʉ. Mʉʉba nau karta b̶ʉʉruu chi Dachi Akõred̶e maud̶e Dachi Karibabarii Jesucristod̶e ijãabadaurã baita. Ichi jipa niid̶eeba, dai ome arab̶aud̶e biꞌia ijãa panuu.