Romanos 1:3 - Emberá Chamí

^3-4 Mau bed̶ea bia ichi Warr ʉ̃rʉbena jara b̶uu. Ichi Warr Dachi Mechiu Jesucristo nau kakuad̶e Israeld̶ebena rey Davidd̶ebena need̶abʉ. Maud̶e ichi biu b̶uad̶a chokae jiradusiid̶e Dachi Akõre Jauriba unubisii mau Dachi Akõre Warr joma poyaa nii.

Romanos 1:3 ပူးပေါင်းရင်းမြစ်များ

Mateo 1:1

Nau karta Jesucristo ʉ̃rʉbena. Jesucristo dachi nabẽrarã Abrahamd̶ebena maud̶e dachi rey Israeld̶ebena David naka neesii.

Mateo 1:16

Jacob José akõre basii. José María kima basii. María Jesús nawe basii. Ara mau Jesús Dachi Akõreba Dachi Karibabarii deai jarad̶a abadau.

Mateo 1:6

Isaí Israeld̶ebena Rey David akõre basii. Rey David Salomón akõre basii maud̶e Urías wẽra Salomón nawe basii.

Mateo 12:23

Jomaurãba kãare kʉ̃risiad̶ai adua basiid̶eeba id̶isid̶au: —¿Nau Davidd̶ebena neei b̶uuwãeka?

Mateo 15:22

Maud̶e cananeobid̶a wẽra mau druad̶ebena Jesús niimaa neesii. Mau wẽraba naka jĩwa berrea kob̶eesii: —¡Mʉ Mechiu, Davidd̶ebena need̶a, mʉ kĩra chuburiáse! Mʉ kau jai kachiruaba ãrea biꞌiwãe b̶eebi b̶uu.

Mateo 26:63

Maamina Jesús chũpea b̶eesii. Maka b̶uud̶e paare mechiuba ichimaa jarasii: —Dachi Akõre chokae nii daad̶e daimaa biawãra jarase. ¿Bichi Dachi Akõreba Dachi Karibabarii deai jarad̶aka? ¿Bichi Dachi Akõre Warrka?

Mateo 27:43

Ichiba kʉ̃risia b̶uu Dachi Akõre ichi ome b̶uu. ¿Ichi Dachi Akõre Warr a jaraabaska? Maka b̶uubʉrã Dachi Akõreba ichi biawãra kʉ̃ria b̶uubʉrã, ara makʉd̶e karibai b̶uu.

Mateo 3:17

Bajãad̶ebena mimi ab̶a ũrisid̶au. Naka jarasii: «Nau chi mʉʉba kʉ̃ria inii. Mʉ ichi kakua ãrea kĩrajʉʉ b̶uu».

Mateo 9:27

Jesús mamabena wãsiid̶e dau pãriu nid̶au ome ichi kaad̶e b̶ia neesid̶au. Mau ẽbẽrarãba b̶ia kopanuuba jarasid̶au: —¡Jesús, Davidd̶ebena need̶a, dai kĩra chuburiáse!

Lucas 1:35

Mau angelba panausii: —Dachi Akõre Jauri bichimaa neeped̶a chi poyaabarii bichi baara b̶uai. Maud̶eeba ichiba dea b̶uu warr bichiba adauruu Dachi Akõreba ichi Warr ai.

Lucas 1:69

Chi ichi baita bari trajabarii Davidd̶ebena need̶a bʉisii Dachi Karibabarii poyaabarii bamera.

Juan 1:14

Chi Bed̶ea ẽbẽra kakuad̶e b̶uaped̶a dachi tãed̶e nibabachii. Ichi sõbiad̶eeba dachi ãrea aid̶asii. Ichiba dachimaa arakʉd̶e kuitaabiasii Dachi Akõre biawãra saka nii. Maud̶e daiba ichi joma mechiu nii unusid̶au, Dachi Akõre Warr maka niid̶eeba.

Juan 1:34

Mʉʉba mau unusii. Maud̶eeba mʉʉba jara b̶uu ichi biawãra Dachi Akõre Warr».

Juan 1:49

Maud̶eeba Natanaelba jarasii: —Jaradeabarii, bichi biawãra Dachi Akõre Warrbʉ. Bichi Israeld̶ebenarã Reybʉ.

Juan 10:30

Mʉ, mʉ Chacha ome arab̶au nid̶au.

Juan 10:36

¿sakãe mʉʉba ichi ʉ̃rʉbena kachirua jarasii a panuma, mʉʉba bari ichi Warr a b̶uasiid̶eeba? Dachi Akõreba mʉ ara ichi báitaburu awara b̶usii maud̶e nau iujãad̶aa bʉisii.

Juan 20:28

Maud̶e Tomasba jarasii: —¡Mʉ Mechiu! ¡Mʉ Dachi Akõre!

Juan 20:31

Maamina joma nau b̶ʉsii machiba Jesús Dachi Akõreba Dachi Karibabarii deai jarad̶a, Dachi Akõre Warr ijãad̶amera. Maka ijãaduubʉrã ichid̶eeba chokae b̶uai uru nuread̶ai.

Juan 5:25

Mʉʉba biawãra jaraaruu: chi ewari neei b̶uad̶a jãabae neesii. Id̶iid̶eeba biud̶a kĩra nureeba mʉ, Dachi Akõre Warr bed̶ea ũrid̶ai. Chi mʉʉd̶e ijãaduu chokae panad̶ai.

Juan 7:42

¿Dachi Akõre bed̶ead̶e jara b̶uuwãe ichi Davidd̶ebena neei? ¿Chi David b̶uad̶a puuru Belend̶ebena neeika?»

Hechos 2:30

Maamina David Dachi Akõre baita berreabarii basii. Maud̶eeba kuitaa b̶uasii Dachi Akõreba biawãrad̶eeba jarasii chi ichid̶ebena neeruu ab̶a ichi bari israeld̶ebenarã rey b̶ui.

Hechos 3:13

Dachi Akõre dachi nabẽraed̶ebena Abraham ome, Isaac ome maud̶e Jacob baara b̶uad̶aba ichi baita bari trajabarii Jesús chi Mechiu b̶usii. Ara mau Jesús machiba Pilatomaa jidau deasid̶au beamera. Pilatoba mau karibai kʉ̃ria b̶uasmina machiba ichi daad̶e mau kʉ̃riad̶awẽe asid̶au.

Hechos 8:36

Maka panuud̶e bania b̶uumare wãsid̶au. Maud̶e chi trajabarii mechiuba jarasii: —Ichiáse. Nama bania nub̶uu. ¿Kãareba mʉ poyaa boro eabiibai b̶uma? Mʉ ¿boro eai b̶uka?

Hechos 9:20

Maud̶e judiorã araa ãbua imibadau decha ichiba jaradea b̶eesii Jesús biawãra Dachi Akõre Warr nii.

Romanos 1:9

Dachi Akõreba kʉ̃ria b̶uu joma mʉ sõd̶eeba wau b̶uu chi bed̶ea bia ichi Warr ʉ̃rʉbena jaradea b̶uud̶eeba. Ichiba kuitaa b̶uu mʉʉba ʉtaa id̶iiruucha machi baita ʉtaa id̶ibarii.

Romanos 4:1

¿Kãare jarad̶aima dai judiorã nabẽraed̶ebena Abraham ʉ̃rʉbena?

Romanos 9:5

Ãchi nabẽraed̶ebenarã chi mechiurã nureasii. Ãchid̶ebena Cristo ẽbẽra kakuad̶e chi naweba adausii. Mau jomaurã Akõrebʉ. Ichimáburu dachiba ewaricha biꞌia berread̶ai panuu. Biꞌia b̶uu maka b̶uai.

1 Corintios 1:9

Dachi Akõreba ara ichiba jara b̶uu kĩra waubarii. Ichiba machi iusii ichi Warr Dachi Mechiu Jesucristo ome ãbua nuread̶amera.

1 Corintios 10:18

Israeld̶ebenarãba waubadau ʉ̃rʉbena kʉ̃risiásturu. Ãchiba ãnimara Dachi Akõremaa baa deaduud̶e mau kiurud̶ebena kobadau. Mau kooduud̶e unubibadau Dachi Akõred̶e ijãa panuu. (Ara mau kĩra ab̶auba Dachi Akõre kuenda juaba ne kaped̶aad̶amaa kiuru baa dead̶ad̶ebena kooruubʉrã, unubii mau juaba kaped̶aad̶ad̶e ijãa b̶uu).

Gálatas 4:4

Maamina Dachi Akõreba jarad̶a ewari neesiid̶e ichi Warr nau iujãad̶aa bʉisii. Mau Warr wẽraba adausii maud̶e Moisesba b̶ʉd̶a waui b̶uasii.

1 Tesalonicenses 1:10

Ãchiba jara panuu saka machiba Dachi Akõre Warr Jesús bajãad̶ebena neei esed̶au panuu. Ara mau Jesús Dachi Akõreba biud̶ad̶ebena chokae jiradubisii. Mauba Dachi Akõreba dachi kastikai bad̶a karibasii.

1 Timoteo 2:5

Dachi Akõre ab̶aburu nii. Maud̶e chi ẽbẽrarã Dachi Akõre ome nebʉrad̶e panad̶a mau biꞌia nibabiabarii ab̶aburu nii. Mau ẽbẽra Jesucristobʉ.

1 Timoteo 3:16

Biawãra Dachi Akõreba mau bed̶ea kuitaabiad̶a ãrea biꞌia b̶uu: Cristo nau kakuad̶e neesii. Dachi Akõre Jauriba kuitaabiasii ichi jipa nii. Angelerãba ichi unusid̶au. Ãbarãba ichi ʉ̃rʉbena drua awarabenarãmaa jaradeasid̶au. Ãreaba nau iujãad̶e ichid̶e ijãasid̶au. Dachi Akõreba ichi bajãa bia b̶uud̶aa waya adoesii.

2 Timoteo 2:8

Jesucristo kĩrabase. Ichi Davidd̶ebena need̶abʉ. Ichi biu b̶uad̶a Dachi Akõreba chokae jiradubisii. Mau bed̶ea bia ichi ʉ̃rʉbena mʉʉba jaradea b̶uu.

1 Juan 1:3

Daiba unuped̶aad̶a maud̶e ũriped̶aad̶a machimaa jara panuu machi sid̶a dai ome ãbuacha Dachi Bajãad̶ebena Akõre ome maud̶e ichi Warr Jesucristo ome biꞌia panad̶amera.

1 Juan 3:23

Mau waubi b̶uu bed̶ea naubʉ: ichi Warr Jesucristod̶e ijãad̶ai maud̶e chiya kʉ̃ria nuread̶ai ichiba dachimaa jarad̶a kĩra.

1 Juan 3:8

Maamina chi kachirua wau b̶uu jʉbawãe niid̶ebʉ, arab̶aed̶eed̶e jʉbawãe nii kachirua wau b̶uabariid̶eeba. Dachi Akõre Warr nau iujãad̶aa neesii jʉbawãe niiba wau b̶uu poyaai baita.

1 Juan 4:15

Barikiuba Jesús biawãra Dachi Akõre Warr aaruubʉrã, Dachi Akõre ichi ome b̶uu maud̶e ichi Dachi Akõre ome b̶uu.

1 Juan 5:1

Jesús Dachi Akõreba Dachi Karibabarii deai jarad̶a ab̶auba ijãaruubʉrã, mau ẽbẽra Dachi Akõre warrbʉ. Dachi Bajãad̶ebena Akõre kʉ̃ria b̶uuba ichi warrarã sid̶a kʉ̃ria b̶uu.

1 Juan 5:20

Kuitaa panuu Dachi Akõre Warr neesii maud̶e kʉ̃risia kuitaa dachimaa deasii Dachi Akõre biawãra unud̶amera. Ichi Warr Jesucristo ome panuud̶eeba dachi biawãra Dachi Akõre ome panuu. Mau biawãra Dachi Akõrebʉ. Mauba ẽbẽrarãmaa ichi ome ewaricha chokae nuread̶ai deabarii.

1 Juan 5:5

¿Kaiba nau iujãad̶ebena kachirua poyaa ida b̶uima? Ab̶auba Jesús biawãra Dachi Akõre Warr ijãad̶e b̶uubʉrã, mau ẽbẽraba mau poyaa ida b̶ui.

2 Juan 1:7

Chi nuree setaa kũruabadaurã nau iujãad̶e ãrea nibabadau. Maarãba ijãad̶akau Jesucristo nau kakuad̶e dachi kĩra neesii. Chi maka b̶uu waabenarã setaa kũruabarii maud̶e Cristo kĩramaabʉ.

Apocalipsis 2:18

»Chi Tiatira puurud̶ebena ijãabadaurã nubarii ángel baita kartad̶e naka b̶ʉse: »Dachi Akõre Warr dau tʉbʉ aokooruu kĩra b̶uu, maud̶e jʉ̃rʉ bronce tʉbʉd̶e kub̶ud̶akare urua kub̶uu kĩra b̶uu. Ichiba naka jara b̶uu: