Colosenses 3:16 - Emberá Chamí

¹⁶ Bed̶ea Cristo ʉ̃rʉbena machi sõd̶e uru panásturu. Joma Dachi Akõre kuitaad̶eeba chiya jaradeásturu maud̶e chiya aid̶ásturu biꞌia ijãad̶ai baita. Dachi Akõre bed̶ead̶e b̶ʉ kub̶uu karísturu, ãbarãba karibadau maud̶e Dachi Akõre Jauriba karibi b̶uu sid̶a Dachi Akõremaa karísturu. Sõd̶eeba ichíturu kid̶ibai jara panuud̶eeba karísturu.

Colosenses 3:16 ပူးပေါင်းရင်းမြစ်များ

Mateo 26:30

Maabae Dachi Akõre bed̶ea ʉ̃rʉbena karid̶aped̶a Olivo ead̶aa wãsid̶au.

Lucas 2:51

Maabae Jesús ãchi baara Nazaretd̶aa wãsii. Ãchiba jaraaduu ichiba joma waubachii. Joma Jerusalend̶e makad̶a chi naweba ãrea biꞌia kʉ̃risia b̶uabachii.

Juan 15:7

»Machi mʉ baara nureebʉrã, mʉ bed̶ea ijãa paneeduubʉrã, id̶ísturu joma machiba kʉ̃riaduu. Mau mʉʉba deai.

Romanos 10:17

Biawãra ẽbẽrarãba Cristo ʉ̃rʉbena naa ũrid̶ai panuu, poyaa ijãad̶ai baita.

Romanos 15:14

Ãbarã, mʉʉba kuitaa b̶uu machiba biꞌia biawãra wau panuu maud̶e ãrea kuitaa panuud̶eeba poyaa chiya jaradead̶ai.

1 Corintios 14:15

Makarã ¿sakaima? Mʉ jauriba Dachi Akõremaa ʉtaa id̶ii maamina mʉʉba chi mau kuitaa b̶uu bed̶ead̶e bid̶a ʉtaa id̶ii. Mʉ jauriba Dachi Akõremaa biꞌia karii, maamina chi mʉʉba kuitaa b̶uu bed̶ead̶e bid̶a karii.

1 Corintios 14:26

Maud̶eeba ãbarã, ¿saka arakʉd̶e waud̶aima? Machi araa ãbua imiiduud̶e ab̶auba Dachi Akõre bed̶ead̶ebena kari karii b̶uu, ab̶auba Dachi Akõre bed̶ea jaradeai b̶uu, ab̶auba Dachi Akõreba unubid̶a jarai b̶uu, ab̶auba dachiba ũrid̶akau bed̶ead̶e berreai b̶uu maud̶e ab̶auba mau berread̶a kuitaa jarai b̶uu. Maamina joma mau waud̶ai panuu ãbarãba biꞌia ijãad̶amera.

Efesios 1:17

Mʉʉba Dachi Mechiu Jesucristo Akõremaa, chi Akõre biꞌia niimaa ʉtaa id̶ibarii ichi Jaurid̶eeba machimaa biꞌia kʉ̃risiabiamera maud̶e ichi ʉ̃rʉbena kuitaabiamera. Maka machiba ichi aude kuitaad̶ai.

Efesios 5:17

Kʉ̃risiaswãe nuree kĩra nurearã́sturu, maumaarã ãrea kuitásturu kãare Dachi Mechiuba waubi b̶uu.

Efesios 5:19

Dachi Akõre bed̶ead̶e b̶ʉ kub̶uu karibadau, ãbarãba karibadau maud̶e Dachi Akõre Jauriba karibi b̶uu chiya karibad̶ai baita ãbua karísturu. Dachi Mechiumaa sõd̶eeba karísturu biꞌia berread̶ai baita.

Efesios 5:26

Ichiba maka wausii dachi Dachi Akõre baita biꞌia b̶ui baita. Ichi bed̶eaba dachi kachirua jeraasii baniaba jeraad̶a kĩra.

Colosenses 1:28

Joma kʉ̃risia kuitaad̶ebena daiba Cristo ʉ̃rʉbena jomaurãmaa jaradea panuu jipa nibad̶amera. Maka daiba ẽbẽrarã joma Cristod̶eeba jomad̶e jipa panuu Dachi Akõremaa unubiad̶ai.

Colosenses 1:9

Maka ũrisid̶aud̶eed̶ebena daiba machi baita ewaricha Dachi Akõremaa ʉtaa id̶i panuu ichiba waubi kʉ̃ria b̶uu machimaa joma kuitaabiamera. Mau awara ʉtaa id̶i panuu ichiba maarãmaa kʉ̃risia kuitaa maud̶e kauwa ũri ichi Jaurid̶eeba joma deamera.

Colosenses 4:6

Bed̶ea biad̶eeba berreásturu jomaurãba biꞌia ũrid̶amera. Maka Cristo ʉ̃rʉbena id̶iiduud̶e machiba kuitaa panad̶ai saka panaud̶ai panuu.

1 Tesalonicenses 1:8

Maarãburu Dachi Mechiu ʉ̃rʉbena bed̶ea machid̶ebena ũriped̶aad̶awãe basii; maumaarã druacha ẽbẽrarãba kuitaasid̶au machiba Dachi Akõred̶e ijãa panuu. Maud̶eeba ¿daiba machi ʉ̃rʉbena kãare maucha jarad̶aima?

1 Tesalonicenses 4:18

Mau bed̶eaba machi chiya kĩrajʉ́sturu.

2 Tesalonicenses 3:15

Maamina mau machi kĩramaa kĩra uru panarã́sturu, maumaarã machi ãba baerã jarásturu jipa waumera.

1 Timoteo 6:17

Nau druad̶e barau nureerãmaa jarase waabenarã audeara mechiu nuree kʉ̃risiarãad̶amera. Ãchiba ne uru panuu ãrea b̶uakaud̶eeba jarase mau baita biꞌia panad̶ai kʉ̃risiarãad̶amera. Dachi Akõréturu kʉ̃risiad̶ai panuu. Ichiaburu dachimaa ne joma wãꞌãekaraa deabarii jirukaraayuwãe nuread̶amera.

2 Timoteo 3:15

Warraed̶e Dachi Akõre Bed̶ea kuitaasii. Mau Bed̶eaba bichimaa kuitaabi b̶uu ab̶auba Cristod̶e ijãaruubʉrã Dachi Akõreba mau karibai.

Tito 3:6

Dachi Karibabarii Jesucristod̶eeba, Dachi Akõreba ichi Jauri dachimaa ãrea deasii bania ãrea easii kĩra dachi kakua ʉ̃rʉ.

Santiago 1:5

Machid̶ebena ab̶aba kʉ̃risia kuitaawẽa niibʉrã, Dachi Akõremaa ʉtaa id̶ii b̶uu. Maabae Dachi Akõreba deai. Ichimaa ʉtaa id̶iiduubʉrã iadaawẽa sõbiad̶eeba jomaurãmaa deabarii.

Santiago 3:17

Maamina chi Dachi Akõreba dea b̶uu kʉ̃risia kuitaa uru nureerãba ne jomad̶e jipa waubadau, jomaurã ome jirukaraayuwãe nuread̶ai baita jʉrʉbadau, jomaurã ome biꞌia panabadau, ab̶auba jara b̶uu ũrid̶ai baita panabadau, waabenarã kĩra chuburiabadau maud̶e ne joma biꞌia waubadau. Ab̶a waabenarã audeara biꞌia waud̶akau. Ichiba jara b̶uu kĩra biawãra waubarii.

Santiago 5:13

Machid̶ebena ab̶a ãrea biꞌiwãe b̶uubʉrã, Dachi Akõremaa ʉtaa id̶i b̶uu. Ab̶a kĩrajʉʉ b̶uubʉrã, karid̶eeba Dachi Akõremaa biꞌia berreai b̶uu.

1 Juan 2:14

Akõrerã, mʉʉba nau karta machi baita b̶ʉ b̶uu chi arab̶aed̶eed̶e nibad̶a wabid̶a nii, mau unubadaud̶eeba. Kũudrãarã, mʉʉba nau karta machi baita b̶ʉ b̶uu ãrea ijãa panuud̶eeba, Dachi Akõre bed̶ea machi sõd̶e b̶uud̶eeba, maud̶e jʉbawãe nii poyaasid̶aud̶eeba.

1 Juan 2:24

Maud̶eeba machiba ijãasid̶aud̶eed̶ebena chi Cristo ʉ̃rʉbena ũri panuu machi sõd̶e nu uru panásturu. Maka machi Dachi Bajãad̶ebena Akõre ome maud̶e ichi Warr ome ãbua panad̶ai.

1 Juan 2:27

Maamina machiba Dachi Akõre Jauri Cristoba dead̶a uru panuu. Maud̶eeba jʉrʉd̶aabai panuu waabenarãmaa machi jaradeabiayua. Dachi Akõre Jauriba machimaa ne joma jaradea b̶uu. Ichiba jaradea b̶uu setawãe, maumaarã biawãrabʉ. Maud̶eeba Cristo ome ãbua panásturu Dachi Akõre Jauriba machimaa jaradead̶a kĩra.

2 Juan 1:2

Maka kʉ̃ria panuu, chi biawãra bed̶ea dachi sõd̶e b̶uud̶eeba. Maud̶e dachi sõd̶e ewaricha b̶uai.

Apocalipsis 14:3

Maud̶e chi Dachi Akõre chi rey ãkau daad̶e kari wid̶i karimaa panasid̶au, chi kimare chokae nuree daad̶e, maud̶e 24 chõrarã mechiurã daad̶e. Ab̶au bid̶a poyaa kuitaabasii mau kari karii baita. Bari chi 144.000 Dachi Akõreba nau iujãad̶ebena karibakuad̶áburu karid̶ai kuitaa panasii.

Apocalipsis 15:3

Chi arpa chaamaa panuud̶e Moisés chi Dachi Akõre baita bari trajabarii kari, maud̶e chi Oeja Kaebe Nii kari karimaa panasii. Naka karisid̶au: «Dachi Mechiu, Dachi Akõre, chi Joma Poyaabarii, bichiba wau b̶uu ãrea bibuara b̶uu. Bichiba wau b̶uu ʉ̃rʉbena ẽbẽrarãba kuitaa kʉ̃risiad̶akau. Jomaurã Mechiu, bichiba wau b̶uu jipa b̶uu maud̶e bichi bed̶ea ab̶a b̶uu biawãrabʉ.

Apocalipsis 19:10

Ara makʉd̶e mʉ chi ángel jʉ̃rʉ kaita õdarrd̶e kob̶eesii biꞌia berreai baita. Maamina mauba mʉʉmaa jarasii: «Mau waurã́se, Dachi Akõréturu biꞌia kʉ̃riáse. Bari mʉ Dachi Akõre baita bari trajabariibʉ bichi kĩra, maud̶e ãbarã Jesusba jaradead̶a ijãabadaurã kĩra». Jesusba jaradead̶a Dachi Akõre Jauriba chi ichi baita berreabadaurãmaa berreabiabarii.

Apocalipsis 5:9

Chi 24 chõrarã maud̶e chi kimare chokae nureerãba nau kari wid̶i karisid̶au: «Bichíturu biꞌia nii, mau karta adauped̶a, chi wãa kob̶ee oekuai baita, bichi beasid̶aud̶eeba. Bichi oa chesiiba ẽbẽrarã nedokuasii Dachi Akõre baita. Ẽbẽrarã didiwaraacha jomad̶ebena, bed̶ea didiwaraacha jomad̶ebena, puurucha maud̶e drua jomad̶ebena chi nuree nedosii.