2 Pedro 3:15 - Emberá Chamí

¹⁵ Kĩrabásturu Dachi Mechiuba ẽbẽrarã karibai baita joma jãadua b̶uu. Ara mau kĩra dachiba kʉ̃ria panuu ãba Pablo bid̶a kartad̶e machi baita b̶ʉsii, Dachi Akõreba ichimaa dead̶a kʉ̃risia kuitaad̶eeba.

2 Pedro 3:15 ပူးပေါင်းရင်းမြစ်များ

Lucas 21:15

Mʉaburu machimaa kʉ̃risia kuitaa deai berread̶ai kuitaad̶amera. Maud̶eeba machiba jaraaduu machi kĩramaa panuuba poyaa kachirua jarad̶aabai.

Hechos 15:25

Maud̶eeba daiba bed̶ea arab̶aud̶e deasid̶au chi daid̶ebenarã machimaa bʉid̶ai baita. Maarã wãd̶ai chi dachiba kʉ̃ria panuu ãba Bernabé maud̶e Pablo baara.

Hechos 7:10

Maud̶eeba joma ichi ãrea biꞌiwãe b̶uud̶ebena Dachi Akõreba karibasii. Ichimaa kʉ̃risia kuitaa deasii faraón chi Egiptod̶ebena reyba biꞌia unumera. Maud̶eeba chi mau druad̶ebena karr b̶usii, maud̶e chi rey ded̶ebena karr b̶usii.

Hechos 9:17

Ara makʉd̶e Ananias Saulo b̶uumaa wãsii. Chi ded̶e ed̶a wãped̶a ichi jua Saulo ʉ̃rʉ kub̶uped̶a jarasii: «Ãba Saulo, Dachi Mechiu Jesús, chi bichiba od̶e unubid̶aba, mʉ neebisii waya bichi dauba unumera maud̶e Dachi Akõre Jaurid̶eeba b̶eemera».

Romanos 2:4

Bichiba ida b̶u b̶uu Dachi Akõre dachi ome ãrea sõbia b̶uu, joma dauchia jãadua b̶uu maud̶e kachirua waud̶a isa kastikakau. ¿Bichiba adua b̶uka Dachi Akõre bichi ome sõbia b̶uabariid̶eeba maud̶e chi ichiba kʉ̃ria b̶uud̶eeba bichi kachirua waubarii ida b̶ubarii ichimaa neemera?

1 Corintios 12:8

Dachi Akõre Jauriba waabenarã chi nureerãmaa dea b̶uu ichi kʉ̃risia kuitaad̶eeba poyaa berread̶amera. Dachi Akõre Jauri ara ab̶a niiba chi nureemaa dea b̶uu ichid̶eeba kuitaaped̶aad̶a poyaa jaradead̶amera.

1 Corintios 2:13

Ara mau ʉ̃rʉbena daiba berrea panuu. Maamina nau iujãad̶ebena kʉ̃risia kuitaad̶eeba berrea panuuwãema, maumaarã Dachi Akõre Jauriba daimaa jaradea b̶uu kĩra berrea panuu. Maka Dachi Akõre Jauriba kuitaabi b̶uu daiba jaradea panuu ichiba berreabi b̶uu kĩra.

1 Corintios 3:10

Mʉ chi de waubarii bia kĩra nii. Dachi Akõreba ichi sõbiad̶eeba mʉʉmaa dead̶aba, de jʉ̃rʉ ãrea id̶u ʉyaasii. Waabenarãba mau ʉ̃rʉ de waubadau. Maamina dachicha kauwa panad̶ai b̶uu saka mau ʉ̃rʉ waui b̶uu.

Efesios 3:3

Ichiba naed̶e kuitaabiwẽa b̶uad̶a mʉʉmaa kuitaabisii. Mau ʉ̃rʉbena mʉʉba nau kartad̶e b̶aꞌãra b̶ʉsii.

1 Timoteo 1:16

Maamina maud̶eeba Dachi Akõreba mʉ kĩra chuburiasii. Maka Jesucristoba mʉ, chi aude kachirua wau b̶uad̶ad̶eeba unubisii ichi joma dauchia jãadua esed̶au b̶uai b̶uu. Mʉʉd̶eeba chi wabid̶a ijãad̶akaurãmaa kuitaabiasii saka ẽbẽra kachirua kĩra chuburiabarii ewaricha chokae b̶uamera.

Santiago 1:5

Machid̶ebena ab̶aba kʉ̃risia kuitaawẽa niibʉrã, Dachi Akõremaa ʉtaa id̶ii b̶uu. Maabae Dachi Akõreba deai. Ichimaa ʉtaa id̶iiduubʉrã iadaawẽa sõbiad̶eeba jomaurãmaa deabarii.

Santiago 3:17

Maamina chi Dachi Akõreba dea b̶uu kʉ̃risia kuitaa uru nureerãba ne jomad̶e jipa waubadau, jomaurã ome jirukaraayuwãe nuread̶ai baita jʉrʉbadau, jomaurã ome biꞌia panabadau, ab̶auba jara b̶uu ũrid̶ai baita panabadau, waabenarã kĩra chuburiabadau maud̶e ne joma biꞌia waubadau. Ab̶a waabenarã audeara biꞌia waud̶akau. Ichiba jara b̶uu kĩra biawãra waubarii.

1 Pedro 3:20

Maarã jaurirãba nabẽraed̶e Noé ewarid̶e Dachi Akõre bed̶ea ijãad̶aabasii. Noeba jãba mechiu wau b̶uumisa Dachi Akõreba joma dauchia jãadua b̶uud̶eeba esed̶au b̶uasii ãchiba ijãad̶amera. Maamina ẽbẽra b̶aꞌãra bania birud̶ad̶ebena paneesid̶au. Biawãra jaraaruubʉrã, 8buru karibasii.

2 Pedro 3:2

Mʉʉba kʉ̃ria b̶uu Dachi Akõre baita berreabadaurãba naa jaraped̶aad̶a machiba kĩrabad̶ayu. Maud̶e kʉ̃ria b̶uu Jesucristo Dachi Mechiu, Dachi Karibabariiba jarad̶a kĩrabad̶ayu. Mau ichiba bʉid̶arãba machimaa jaradeasid̶au.

2 Pedro 3:9

Dachi Mechiu neei ad̶a bad̶a kãꞌãa b̶uud̶eeba waabenarãba kʉ̃risia panuu neebai. Maamina makawãema. Maumaarã machi kakua joma jãadua b̶uud̶eeba kãꞌãa b̶uu. Ichiba kʉ̃riawẽa b̶uu ẽbẽra ab̶a bid̶a ichid̶ebena ãi b̶uai. Kʉ̃ria b̶uu jomaurãba kachirua ida b̶ud̶aped̶a ichimaa need̶ai.