2 Corintios 6:16 - Emberá Chamí

¹⁶ ¿Dachi Akõre kuenda juaba ne kaped̶aad̶a Dachi Akõre de mechiud̶e b̶uai b̶uka? Biawãra dachi, chi Dachi Akõre chokae b̶uu de mechiubʉ. Maud̶eeba Dachi Akõreba ichi bed̶ead̶e naka jarasii: «Mʉ ãchi ome b̶uai. Ãchi tãed̶e nibai. Mʉ Dachi Akõre ãchid̶i bai maud̶e ãchi mʉ puuru nuread̶ai».

2 Corintios 6:16 ပူးပေါင်းရင်းမြစ်များ

Mateo 16:16

Simón Pedroba panausii: —Bichi Dachi Akõreba Dachi Karibabarii deai jarad̶a, Dachi Akõre chokae b̶uu Warrbʉ.

Mateo 6:24

»Ab̶au bid̶a poyaa ichi chibari ome uru b̶uabai. Ome uru b̶uubʉrã ab̶a aude kʉ̃riai. Ab̶a baara wãi, maud̶e chi ab̶au b̶ʉi. Arab̶aud̶e chi nejarra barau nibai kʉ̃ria b̶uu poyaa Dachi Akõre ome b̶uabai.

Lucas 5:36

Mau awara Jesusba ãchimaa nebʉrʉsii jaradeai baita: —Ab̶au bid̶a paru wid̶id̶ebena b̶aꞌãra tõobai paru soremaa wãai baita. Maka wauruubʉrã chi paru wid̶i tõod̶a kõai, maud̶e chi paru wid̶i tõod̶a chi sore ome biꞌia b̶eebai.

Juan 14:23

Jesusba panausii: —Chi mʉ kʉ̃ria b̶uuba mʉ bed̶ea wau b̶uai. Maud̶e mʉ Chachaba mau kʉ̃ria b̶uai. Maabae dai ichimaa need̶ai ichi baara panad̶ai baita.

Juan 6:56

Chi mʉ kooruu maud̶e chi mʉ oa dooruu mʉ ome b̶uu maud̶e mʉ ichi ome b̶uu.

Romanos 8:11

Maamina ichi Jauri machi sõd̶e b̶uud̶eeba, ichid̶eeba machi chi kakua biui b̶uu chokae jiradubii, Cristo Jesús chokae jiradubid̶a kĩra.

Romanos 8:9

Maamina Dachi Akõre Jauri biawãra machi sõd̶e b̶uubʉrã, ichid̶eeba nibabadau. Nau kakuaba wau kʉ̃ria b̶uud̶eeba nibad̶aabai. Biawãra chi Cristo Jauri wãꞌãe nii, Cristod̶ewãema.

Romanos 9:26

Maud̶e naka b̶ʉ kub̶uu: «Mʉʉba jarasii machi mʉ ẽbẽrarãwãe. Maka jarad̶amare, mʉʉba machi mʉ warrarã ai».

1 Corintios 10:21

Jauri kachiruamaa dead̶a basud̶e b̶uu machiba dooduubʉrã, Jesucristo oa kĩrabad̶ai baitabena basud̶e b̶uu dod̶aabai panuu. Jai kachiruamaa ãnimara kiuru dead̶a machiba kooduubʉrã, Dachi Mechiu kĩrabad̶ai baitabena kobadau kod̶aabai panuu.

1 Corintios 6:19

¿Machiba adua panuka machi kakua Dachi Akõre Jauri de kĩra nii? Dachi Akõreba ichi Jauri machimaa deasii. Ichi machi sõd̶e b̶uu. Machi ara machid̶iwãema maumaarã Dachi Akõred̶ebʉ.

Efesios 2:20

Machi de mo waud̶a kĩra panuu. Jesusba bʉid̶arã maud̶e Dachi Akõre baita berreabadaurã mau de ekarebena mo kĩra panuu. Mau ded̶ebena mo chi bibuara b̶uu Jesucristobʉ.

Efesios 2:22

Cristo ome panuud̶eeba machi sid̶a joma ẽbẽrarã Dachi Akõred̶erã baara de arab̶au kĩra nuree. Mau ded̶e Dachi Akõre ichi Jaurid̶eeba b̶uabarii.

Efesios 3:17

Maud̶e ʉtaa id̶i b̶uu ijãa panuud̶eeba Cristo machi sõd̶e b̶uamera maud̶e machi ne jomad̶e kʉ̃riad̶eeba panad̶amera. Maka chaarea nuread̶ai ãrea karr jidau panuu kĩra.

1 Timoteo 3:15

Maamina kãꞌãaruubʉrã mʉʉba kʉ̃ria b̶uu Dachi Akõre chokae nii ẽbẽrarã saka ãbua panad̶ai panuu bichiba kuitaamera. Dachiba Dachi Akõre chi biawãra bed̶ea jaradeabadau de wãto kĩra b̶uu maud̶e de jʉ̃rʉ kĩra b̶uu.

2 Timoteo 1:14

Dachi Akõre Jauri dachi sõd̶e b̶uu. Maud̶eeba chi biawãra bed̶ea Dachi Akõreba bichimaa dead̶a ãrea nu b̶uase.

Hebreos 3:6

Maamina Dachi Akõre warr Cristo baerã, mau ẽbẽrarã mechiubʉ. Ãchi ome joma arakʉd̶e wau b̶uu. Dachiba Cristod̶e ijãa panuubʉrã maud̶e ichid̶eeba adaud̶ai kĩrajʉʉ esed̶au panuubʉrã, ẽbẽrarã Dachi Akõred̶erãbʉ.

Hebreos 8:10

Maud̶e Dachi Mechiuba naka jara b̶uu: Kaad̶ebena ewarid̶e mʉʉba nau bed̶ea chiwid̶i israeld̶ebenarãmaa deai: Mʉʉba chi Moisesba b̶ʉd̶a ãchi kʉ̃risiad̶e maud̶e ãchi sõd̶e b̶ui. Mʉ ãchi Akõre bai, maud̶e ãchi mʉ ẽbẽrarã bai.

Santiago 4:5

Dachi Akõreba dachi sõd̶e b̶ud̶a Jauriba kʉ̃ria b̶uu Dachi Akõréturu kʉ̃ria panad̶amera. ¿Machiba kʉ̃risia panuka Dachi Akõre bed̶ead̶e bari ara jãka b̶ʉbisii?

1 Pedro 2:5

Machi ichid̶ebena chokae nureed̶eeba, de waui baitabena mo kĩra nureebʉ. Machid̶ebena Dachi Akõreba ichi de wauruu. Maud̶e ichi baita machi paarerã babiaruu. Machiba Jesucristod̶ebena Dachi Akõre baita ne wau panuud̶e ichimaa ãnimara baa deaduu kĩra wau panuu. Maka wau panuu ichiba biꞌia unu b̶uu.

1 Juan 4:12

Ab̶au bid̶a Dachi Akõre dauba unukau. Maamina dachi chiya kʉ̃ria panuubʉrã, Dachi Akõre dachi ome b̶uu maud̶e ichi kʉ̃riad̶eeba dachiba biawãra joma kʉ̃ria panuu.

1 Juan 4:15

Barikiuba Jesús biawãra Dachi Akõre Warr aaruubʉrã, Dachi Akõre ichi ome b̶uu maud̶e ichi Dachi Akõre ome b̶uu.

Apocalipsis 2:1

»Chi Éfeso puurud̶ebena ijãabadaurã nubarii ángel baita kartad̶e naka b̶ʉse: »Chi jua biare 7 pusterrea uru b̶uuba maud̶e 7 lámpara nee waud̶a tãed̶e niiba naka jara b̶uu:

Apocalipsis 21:3

Maabae mʉʉba ũrisii ab̶a Dachi Akõre rey ãkau b̶uareeba naka jĩwa berrearuu: «¡Ũrísturu! Id̶i Dachi Akõre ẽbẽrarã tãed̶e b̶uu. Ichi ãchi baara b̶uai. Maud̶e ãchi ichi puurud̶ebenarã nuread̶ai. Ichi ãchi Akõre bai maud̶e biawãra ichi ãchi baara b̶uabarii.

Apocalipsis 21:7

Chi kachirua waud̶ai poyaaped̶aad̶arãba joma nau adoed̶ai, warrba chi akõreba uru b̶uud̶ebena adaubarii kĩra. Mʉ ãchi Dachi Akõre bai maud̶e mʉ warrarã nuread̶ai.