2 Corintios 11:3 - Emberá Chamí

³ Maamina mʉʉba wapea b̶uu waabenarãba machi setaa kũruad̶ai damaba kʉ̃risia kuitaad̶eeba Eva setaa kũruad̶a kĩra. Makarã machiba Cristod̶e biawãra sõd̶eeba ijãa panuu ida b̶ud̶ai.

2 Corintios 11:3 ပူးပေါင်းရင်းမြစ်များ

Mateo 24:24

Mau ewarid̶e setaa jarad̶ai ãchi Dachi Akõreba Dachi Karibabarii deai jarad̶a. Maud̶e waabenarãba setad̶eeba jarad̶ai ãchi Dachi Akõre baita berreabadaurã. Maarãba ẽbẽrarãba ne poyaa waud̶akau mechiu waud̶ai ẽbẽrarã setaa kũruad̶ai baita. Dachi Akõreba jʉrʉ adaud̶arã sid̶a poyaa setaa kũruaped̶aad̶a basirã, ãchi sid̶a setaa kũruad̶ai basii.

Juan 8:44

Machi akõre chi jʉbawãe niibʉ. Maud̶eeba ichiba kʉ̃ria b̶uu machiba waud̶ai kʉ̃ria panuu. Mau arab̶aed̶eed̶e mia beabariibʉ. Biawãrad̶eeba b̶uakau, chi biawãra ichid̶e wãꞌãed̶eeba. Setaa jaraaruud̶e, ara ichi kĩra setaa jarabarii, setaa jarabariid̶eeba maud̶e seta akõred̶eeba.

Romanos 12:8

Chi nureerãmaa deasii ãbarã aid̶a panuud̶eeba biꞌia ijãad̶amera. Maka dead̶akasiibʉrã, ãbarã aid̶ad̶ai panuu biꞌia ijãad̶amera. Chi nureerãmaa deasii ne kaebea dea panuud̶eeba waabenarã aid̶ad̶amera. Maka dead̶akasiibʉrã, sõbiad̶eeba dead̶ai panuu. Chi nureerãmaa deasii chi ijãabadaurã jaradea ua b̶uabarii nuread̶amera. Maka dead̶akasiibʉrã, jipa wau nuread̶ai panuu. Maud̶e chi nureerãmaa deasii waabenarã kĩra chuburiad̶amera. Maka dead̶akasiibʉrã, kĩrajʉʉd̶eeba kĩra chuburiad̶ai panuu.

2 Corintios 1:12

Nau kakua kĩrajʉʉ panuu: daiba kuitaa panuu sõ jipa panuud̶eeba, kʉ̃risia biad̶eeba nau iujãad̶ebenarã tãed̶e, maud̶e machi tãed̶e biꞌia nibaped̶aad̶a. Mau sõ jipa b̶uai maud̶e kʉ̃risia bia Dachi Akõred̶ebenabʉ. Dai nau iujãad̶ebena kʉ̃risia kuitaad̶eeba maka nibad̶akau, maumaarã Dachi Akõreba ichi sõbiad̶eeba aid̶a b̶uud̶eeba maka nibabadau.

2 Corintios 11:20

Machi ãchi baita bari trajabadaurã kĩra paneebiaduud̶e, machi kod̶ai bad̶a kooduud̶e, machid̶e juakaa adauduud̶e, maarãba machi aude bibuara nuree kʉ̃risiaduud̶e maebʉrã machi kĩedarr sĩiduud̶e machiba ida kabibadau.

2 Corintios 11:29

Ab̶a ẽpermo b̶eeruubʉrã, mʉ sid̶a ẽpermo b̶eeruu kĩra b̶uabarii. Ab̶auba waabena ãba kachiruad̶e b̶aebiiruubʉrã, mʉ mau ẽbẽra ome kĩrubarii.

2 Corintios 2:17

Daiba chi nejarra adaud̶ai baita Dachi Akõre bed̶ea jaradea nibad̶aabai ãreaba waubadau kĩra. Maumaarã Cristo ome panuud̶eeba Dachi Akõreba dai bʉisii. Maud̶e ichi daad̶e kʉ̃risia sõbiad̶eeba jaradeabadau.

2 Corintios 4:2

Ne joma kachirua ẽbẽrarãba mirubia waubadau maud̶e mia kĩra nejasia waubadau daiba ida b̶usid̶au. Waabenarã setaa kũruad̶akau. Dachi Akõre bed̶ea ãyaa jaradead̶akau, maumaarã chi biawãra bed̶ea arakʉd̶e jaradeabadau. Maka Dachi Akõre daad̶e jomaurãmaa kuitaabiabadau daiba jipa wau panuu.

Gálatas 1:6

Mʉ saka kʉ̃risiai adua b̶uu machiba kãꞌãabariwãed̶e Dachi Akõre ida b̶uped̶aad̶a. Ichiba machi iusii Cristo sõbiad̶eeba karibai baita, maamina machiba ãrea ũri panuu waabenarãba bed̶ea bia kĩra jara panuu.

Gálatas 2:4

Mau ʉ̃rʉbena berreasid̶au chi nuree biawãra ãbarãwãeba jarabachid̶aud̶eeba. Maarã ãbarã kĩra need̶aped̶a, unud̶ai kʉ̃riabachid̶au dachi Moisesba b̶ʉd̶ad̶ebena ãyaa wãsid̶au kuitaa. Jesucristod̶e ijãad̶ai bad̶amaarã, chi Moisesba b̶ʉd̶a waya waubi kʉ̃ria panasid̶au, chi mau b̶ʉd̶a baita bari trajabadaurã kĩra.

Gálatas 3:1

Ãbarã Galacia druad̶ebenarã, ¡machi kʉ̃risiaswãe nureerã! ¿Kaiba machi setaa kũruasii chi biawãra bed̶ea ida b̶ud̶amera? Daiba machimaa joma chi Jesucristo cruzd̶e biu b̶uad̶a ʉ̃rʉbena jaradeabachid̶au.

Gálatas 4:11

Maud̶eeba mʉʉba kʉ̃risia b̶uu mʉ bari machimaa jaradeasii.

Efesios 4:14

Makarã waa wãwa kĩra nuread̶aabai. Wãwaba barikia bed̶ea ijãabarii. Mau awara ẽbẽrarã setaa kũruad̶ai kuitaa nureeba jaradea panuud̶eeba, setaa ijãabiabadau pũatuba jãba ãyaa adoeruu kĩra. Maamina dachi mau jãba kĩra nuread̶aabai.

Efesios 4:22

Ãchimaa jaradeaped̶aad̶a naubʉ: naed̶e machiba wau panad̶a kĩra waa maka nibarã́sturu. Chi kakua kachirua wau kʉ̃ria b̶uuba setad̶eeba biꞌiwãe paneebiabarii. Mau ida b̶ústuru, paru sore ẽebadau kĩra.

Efesios 6:24

Mʉʉba kʉ̃ria b̶uu Dachi Akõreba ichi sõbiad̶eeba joma Dachi Mechiu Jesucristo biawãra ãrea kʉ̃ria nuree aid̶a b̶uai. Biꞌia b̶uu maka b̶uai.

Colosenses 2:18

Mau baita ab̶auba machiba ne bia bajãad̶e adaud̶aabai aaduubʉrã, ijãarã́sturu. Maarã berreabadaurã setaa maka nibabadau waabenarã chi aude kaebeu nibabadau kĩra. Maarãba angelerã ãrea kʉ̃riabadau. Chi maarã daumaa unubiaped̶aad̶a ãrea jaradeabadau. Dachi juaba biꞌiwãe waui kʉ̃ria b̶uud̶eeba ẽbẽra jaradea ua b̶uabadaurã mechiurã kĩra ãyaa kʉ̃risiabadau.

Colosenses 2:4

Joma mau mʉʉba jara b̶uu ab̶auba machimaa setaa jararãamera, setaa mipitaa berrearuuba.

Colosenses 2:8

Kauwa panásturu ab̶auba machimaa setaa jararãamera, chi dachi aid̶akau biawãrawãe b̶uu kʉ̃risiabadaud̶eeba. Mau joma nabẽraed̶ebena kʉ̃risiabadau nau iujãad̶ebena jauri meserãa nureed̶ebenabʉ. Mau bed̶ea Cristod̶ebenawãebʉ.

1 Tesalonicenses 3:5

Maud̶eeba mʉʉba waa poyaa dauchia jãadua b̶uawẽed̶eeba Timoteo machimaa bʉisii, wabid̶a Cristod̶e ijãa panuu kuitaai baita. Mʉʉba kʉ̃risia b̶uasii jʉbawãe niiba machimaa Cristo ida b̶ubia b̶uasii. Makad̶a basirã daiba machimaa Cristo ʉ̃rʉbena jaradeaped̶aad̶a bari ara jãka b̶uai basii.

1 Timoteo 1:3

Mʉʉba bichimaa chi chuburia id̶id̶a kĩra Macedonia druad̶aa wãsiid̶e, maucha jaraaruu: Efesod̶e b̶eese, chi ãyaa jaradeabadaurã waa setaa ida jaradeabiarãad̶amera.

1 Timoteo 2:14

Mau awara jʉbawãe niiba Adán setaa kũruabasii, maumaarã wẽráturu setaa kũruasii. Maka setaa kũruasiid̶e wẽraba kachirua wausii.

2 Timoteo 3:13

Maud̶e ẽbẽra kachiruarãba maud̶e waabenarã setaa kũruabadaurãba aude kachirua wau panad̶ai. Waabenarã setaa kũrua panad̶ai maud̶e waabenarãba ãchi setaa kũruad̶ai.

Tito 1:10

Mʉʉba maka jara b̶uu biawãra bed̶ea kʉ̃riad̶akaurã, dachi aid̶ad̶akau bed̶ea jaradeabadaurã maud̶e waabenarã setaa kũruabadaurã baraud̶eeba. Maarãba dachi mukĩra chi kakua tõod̶ai panuu abadaurã.

Hebreos 13:9

Maamina waabenarãba barikiu ne ãyaa jaradeabadau. Maarãmaa ida setaa kũrabiarã́sturu. Machiba kooduuba maebʉrã kod̶awẽa panuuba aid̶akau. Chi maka wau panuuba biꞌia panad̶akau. Dachi Akõreba ichi sõbiad̶eeba aid̶a b̶uu machiba biꞌia sõd̶eeba ijãad̶amera.

2 Pedro 3:17

Ãbarã, machiba mau kuitaa panuud̶eeba kauwa panásturu ẽbẽra kachiruarãba biꞌiwãe jaradea panuuba setaa kũruarãad̶amera. Maka machiba ãrea ijãa panuu ida b̶ud̶aabai.

2 Pedro 3:3

Nau ãrea kuitásturu: kaad̶ebena ewarid̶e Dachi Akõre atua jarabadaurã baraai. Ãchi kakuaba kachirua wau kʉ̃ria b̶uu wau panad̶ai.

1 Juan 2:18

Mʉ warrarã, nau kaad̶ebena ewari wãꞌãeburuu. Machiba ũrisid̶au Cristo kĩramaabarii neei. Cristo kĩramaabadaurã id̶ibae barau. Maud̶eeba dachiba kuitaa panuu nau Dachi Akõre bed̶ea ewari wãꞌãeburuu.

1 Juan 4:1

Ãbarã, barikiurãba Dachi Akõre Jaurid̶eeba berrea panuu abadaurã ijãarã́sturu, maumaarã kauwa ichiásturu ãchiba biawãra Dachi Akõre Jaurid̶eeba maebʉrã waabenarãd̶eeba berrea panuu kuitaad̶ai baita. Mau makásturu ãreaba nau iujãad̶e setad̶eeba ãchiba Dachi Akõre Jaurid̶eeba berrea panuu abadaud̶eeba.

Judas 1:4

Maka b̶ʉ b̶uu june ãbarã kĩra nuree machi tãed̶e duanuud̶eeba. Maarã ẽbẽrarãba setaa jaradeabadau Dachi Akõreba ichi sõbiad̶eeba dachi karibakuasiid̶eeba dachi kakuaba kachirua wau kʉ̃ria b̶uu poyaa waud̶ai panuu. Maarãba Dachi Mechiu ab̶a nii Jesucristo ida b̶ubadau. Eskareed̶eed̶e b̶ʉ kub̶uu Dachi Akõreba ãchi kastikai ʉ̃rʉbena.

Apocalipsis 12:15

Maud̶eeba chi dragonba ichi okarrd̶ebena bania id̶utasii do kĩra chi mau wẽra ũu adoemera.

Apocalipsis 12:9

Ara maud̶e chi dragón mechiu maud̶e joma chi ichi baara duanuu nau iujãad̶aa jirakuasid̶au. Mau dragón chi nabẽraed̶ebena damabʉ. Chi mau trʉ̃ jʉbawãe nii maud̶e Satanás abadau. Mauba joma nau iujãad̶ebenarã setaa kũrua ua b̶uu.

Apocalipsis 20:2

Chi dragón jidadauped̶a 1.000 años jʉ̃ kub̶usii. Mau dragón nabẽraed̶ebena damabʉ. Jʉbawãe nii maud̶e Satanás abadau.