1 Timoteo 5:22 - Emberá Chamí

²² Bichi jua ab̶au ʉ̃rʉ bid̶a isa kub̶urã́se, ijãabadaurã nubarii b̶uamera. Bichiba maka wauruubʉrã, mauba kachirua waud̶abʉrã bichi sid̶a nebʉrad̶e b̶uai mau kachirua baita. Joma kachiruad̶ebena awara b̶uase.

1 Timoteo 5:22 ပူးပေါင်းရင်းမြစ်များ

Hechos 13:3

Maarãba chiko kod̶akau ewari waud̶aped̶a, Dachi Akõremaa ʉtaa id̶id̶aped̶a ãchi jua Bernabé maud̶e Saulo ʉ̃rʉ kub̶usid̶au. Maabae bʉisid̶au.

Hechos 18:6

Maamina ichiba jara b̶uu ãchiba ida b̶usid̶au. Maud̶e ichi ʉ̃rʉbena kachirua berreabachid̶au. Maud̶eeba Pabloba chi paru jʉ̃ b̶uu neapesii, chi ãchiba wauped̶aad̶a ichiba mau kʉ̃riawẽa b̶uu unubiai baita. Naka jarasii: —Machiba mau bed̶ea ijãad̶awẽebʉrã, mʉ kakuawãe. Chi mʉʉba machi baita waui b̶uad̶a, mau joma wausii. Jãabae nau tõpe mʉ judiowãerãmaa wãi.

Hechos 20:26

Mʉʉba wapeaweã Dachi Akõreba machi baita wau kʉ̃ria b̶uu joma arakʉd̶e jara b̶uabachii. Maud̶eeba id̶i mʉʉba jaraaruu: ab̶a karibawẽebʉrã, mʉ nebʉra wãꞌãe nii.

Hechos 6:6

Chi ãbarãba maarã Jesusba bʉid̶arãmaa adoesid̶aud̶e, Dachi Akõremaa ʉtaa id̶iiduud̶e ãchi jua maarã ʉ̃rʉ kub̶usid̶au.

Efesios 5:11

Pãriud̶ebenarãba kachirua waubadaud̶eeba ne bia neekau. Maud̶eeba arab̶au waurã́sturu, maumaarã kuitaabiásturu ãchiba waubadau kachiruabʉ.

1 Timoteo 3:10

Ãbarã aid̶abadaurã b̶ud̶ai naed̶e ãrea kauwa ichiad̶ai panuu. Maabae maarã ʉ̃rʉbena kachirua jarad̶ayuswãe nureebʉrã, ijãabadaurã aid̶abadau panad̶ai panuu.

1 Timoteo 3:2

Maud̶eeba chi ijãabadaurã nubarii nebʉra barau nii ad̶ayuswãe b̶uu, wẽra ab̶aburu uru b̶uai b̶uu, kauwa nibai baita b̶uu, kʉ̃risia biad̶eeba b̶uai b̶uu, kĩra jipa b̶uai b̶uu, ichi ded̶e needuurã biꞌia irsibii b̶uu maud̶e jaradea kuitaa b̶uai b̶uu.

1 Timoteo 3:6

Dachi Akõre bed̶ea ea ijãad̶a nii ijãabadaurã nubarii b̶uabai b̶uu chi mechiu kʉ̃risiarãamera. Maka kʉ̃risiaruubʉrã Dachi Akõreba ichi kastikai jʉbawãe nii kastikad̶a kĩra.

1 Timoteo 4:12

Bichi kũudrãa b̶umina ab̶aumaa bid̶a ida kabirã́se. Maumaarã bichiba berrearuud̶eeba, ne wau b̶uud̶eeba, waabenarã biawãra kʉ̃ria b̶uud̶eeba, kĩra jipa b̶uud̶eeba, maud̶e Cristod̶e ijãa b̶uud̶eeba ãbarãmaa unubiáse saka panad̶ai panuu.

1 Timoteo 4:14

Dachi Akõreba bichimaa waubi b̶uu dead̶a wãꞌãebirã́se. Ãbarã nubadaurãba ãchi jua bichi ʉ̃rʉ kub̶usid̶aud̶e Dachi Akõred̶eeba jarasid̶au ichiba mau dearuu.

2 Timoteo 1:6

Mʉ jua bichi ʉ̃rʉ kub̶usiid̶e Dachi Akõreba bichimaa deasii ichi baita ne waumera. Mau baita mʉʉba jaraaruu: Dachi Akõreba dead̶a biꞌia wau b̶uase, etabarrd̶e tʉbʉchia jãripuabarii kĩra.

2 Timoteo 2:2

Mʉʉba ẽbẽrarã ãrea daad̶e jaradea b̶uad̶a bichiba ũrisii. Ara mau jaradea b̶uad̶a bichia bid̶a waabenarã ãbarãmaa jarabʉise waabenarãmaa mau jaradead̶amera. Waabenarãba ãchi ijãad̶ai panuu maud̶e poyaa bia jaradead̶ai panuu.

2 Juan 1:11

Chi «biꞌia b̶uu bichi neesii» a b̶uuba mau kachirua ichi ome ãbua wau b̶uu.

Apocalipsis 18:4

Maabae mʉʉba ũrisii ab̶auba bajãad̶ebena naka jaraaruu: «Mʉ ẽbẽrarã, Babiloniad̶ebena wãurísturu mau puurud̶ebenarãba kachirua wau panuu waurãad̶amera. Maka Dachi Akõreba maarã kastikakuaruud̶e, machi kastikaabai.