1 Pedro 4:11 - Emberá Chamí

¹¹ Ab̶auba jaradearuubʉrã, Dachi Akõre bed̶ea jaradea b̶uud̶eeba kauwa jaradeai b̶uu. Ab̶auba waabena aid̶aaruubʉrã, Dachi Akõreba dea b̶uu poyaabariid̶eeba aid̶ai b̶uu. Ne joma wáusturu jomaurãba Jesucristod̶eeba Dachi Akõremaa biꞌia berread̶amera. Ichíturu ewaricha biꞌia berread̶ai panuu. Biꞌia b̶uu ne joma ichi juad̶e uru b̶uai. Ãrea biꞌia b̶uu maka b̶uai.

1 Pedro 4:11 ပူးပေါင်းရင်းမြစ်များ

Mateo 6:13

Dai kachiruad̶e b̶aebiarã́se, maumaarã kachiruad̶ebena karibase”. [Bichiaburu joma bichi juad̶e ua b̶uu, joma poyaabarii maud̶e ewaricha chi mechiu nii.]

Juan 13:31

Judas wãd̶akare Jesusba jarasii: —Jãabáeburu Dachi Akõreba unubiai mʉ, chi Ẽbẽra Ba B̶uad̶a chi mechiu nii. Mau awara mʉʉd̶eeba Dachi Akõreba unubii ichi chi mechiu nii.

Hechos 7:38

Maud̶e Moisés drua sirua wãꞌãe b̶uud̶e joma israeld̶ebenarã ome b̶uasii. Aria Sinaí ead̶e ichi ángel ome berreasii. Bed̶ea dachi saka nuread̶ai panuu ʉ̃rʉbena adauped̶a dachi nabẽraed̶ebenarãmaa jarasii.

Romanos 11:36

Dachi Akõréburu ne joma wausii. Ne joma ichid̶eeba b̶uu maud̶e ichi baita b̶uu. Dachiba ewaricha ichimaa biꞌia berread̶ai panuu. Biꞌia b̶uu maka b̶uai.

Romanos 12:3

Dachi Akõreba ichi sõbiad̶eeba mʉ b̶usii ichi baita ne wau b̶uamera. Maud̶eeba mʉʉba machimaa nau jaraaruu: ab̶au bid̶a kʉ̃risiabai b̶uu ara ichi chi mechiu nii. Machiba Cristod̶e ijãaped̶aad̶ad̶eeba Dachi Akõreba machicha aꞌawaraa deasii ne waud̶amera. Maud̶eeba ichiba dead̶a kĩra machiba wau panuu biꞌia kʉ̃risiásturu.

Romanos 16:27

Ichi ab̶aburu nii. Ne joma kuitaa nii. Jesucristod̶eeba dachiba ewaricha ichimaa biꞌia berread̶ai panuu. Biꞌia b̶uu maka b̶uai.

Romanos 3:2

Makawãema. Ãread̶e judiorã bai ãrea biꞌia b̶uu. Naa mʉʉba jaraaruu maka panuu Dachi Akõreba ichi bed̶ea maarãmaa deasiid̶eeba.

1 Corintios 10:31

Maamina mʉʉba jaraaruu: machi komaa panuud̶e maud̶e waumaa panuud̶e joma wáusturu ẽbẽrarãba Dachi Akõre ʉ̃rʉbena biꞌia jarad̶amera.

1 Corintios 12:4

Dachi Akõre Jauri ab̶a niiba dachimaa dea b̶uu ne diwaraa waud̶amera.

1 Corintios 3:10

Mʉ chi de waubarii bia kĩra nii. Dachi Akõreba ichi sõbiad̶eeba mʉʉmaa dead̶aba, de jʉ̃rʉ ãrea id̶u ʉyaasii. Waabenarãba mau ʉ̃rʉ de waubadau. Maamina dachicha kauwa panad̶ai b̶uu saka mau ʉ̃rʉ waui b̶uu.

1 Corintios 6:20

Dachi Akõreba machi nedosii. Dachi Akõred̶ed̶eeba machi kakuad̶e maud̶e jaurid̶e kĩra jipa panásturu.

2 Corintios 2:17

Daiba chi nejarra adaud̶ai baita Dachi Akõre bed̶ea jaradea nibad̶aabai ãreaba waubadau kĩra. Maumaarã Cristo ome panuud̶eeba Dachi Akõreba dai bʉisii. Maud̶e ichi daad̶e kʉ̃risia sõbiad̶eeba jaradeabadau.

2 Corintios 9:13

Machiba maka aid̶a panuuba, maka unubi panuu chi bed̶ea bia Cristo ʉ̃rʉbena biawãra ijãa panuu. Sõbiad̶eeba chi ãbarãmaa dea panuu maud̶e jomaurã aid̶a panuu. Maud̶eeba Dachi Akõremaa biꞌia berread̶ai.

Efesios 1:19

Maud̶e mʉʉba ʉtaa id̶ibarii machiba kuitaad̶amera ichi poyaa jomaurã audeara poyaa b̶uu. Mau poyaabariid̶eeba ichiba dachi ichid̶e ijãa nuree kariba b̶uu. Ara mau poyaabarii mechia b̶uud̶eeba,

Efesios 4:29

Bed̶ea kachirua berrearã́sturu. Maumaarã bed̶ea biáturu berreásturu waabenarã aid̶ad̶ai baita. Maka machi bed̶ea ũri nuree biꞌia panad̶ai.

Efesios 5:20

Dachi Mechiu Jesucristo trʉ̃d̶eeba ewaricha dachi Bajãad̶ebena Akõremaa ne joma baita ichíturu kid̶ibai ásturu.

Efesios 6:10

Mau awara ãbarã, Dachi Mechiu ãrea poyaabarii b̶uud̶eeba chaarea nureásturu.

Filipenses 1:11

Mʉʉba ʉtaa id̶i b̶uu machi Jesucristod̶eeba ne jomad̶e jipa nuread̶amera. Maka ẽbẽrarãba Dachi Akõre chi mechiu nii ad̶ai maud̶e ichimaa biꞌia berread̶ai.

Filipenses 2:11

Maud̶e jomaurãba Jesucristo jomaurã Mechiu a jarad̶ai maud̶e Dachi Bajãad̶ebena Akõremaa biꞌia berread̶ai.

Colosenses 4:6

Bed̶ea biad̶eeba berreásturu jomaurãba biꞌia ũrid̶amera. Maka Cristo ʉ̃rʉbena id̶iiduud̶e machiba kuitaa panad̶ai saka panaud̶ai panuu.

1 Tesalonicenses 2:4

Maumaarã Dachi Akõreba biꞌia unud̶ad̶eeba dai iusii ichi bed̶ea bia jaradead̶amera. Maud̶eeba daiba jaradeaduud̶e, makad̶akau chi ẽbẽrarãba daimaa ichiad̶aped̶a, kʉ̃riad̶amera. Bari jaradeabadau dai Dachi Akõre baara biꞌia panad̶amera. Ichiba dai sõ kʉ̃risia unubarii.

1 Timoteo 1:17

Dachi Akõre ewaricha jomaurã Reybʉ. Mau chi dachiba unud̶akau biukau. Ichíturu ab̶aburu nii. Ichíturu dachiba ewaricha biꞌia berread̶ai panuu maud̶e wapead̶ai panuu. Maka biꞌia b̶uase.

1 Timoteo 6:16

Ichíturu biukau. Ichi b̶uumaa jẽratĩu b̶uud̶eeba ab̶a bid̶a ara kaita poyaa wãd̶aabai panuu. Ichi ab̶au bid̶a unud̶awẽa panuu maud̶e poyaa unud̶akau. Mʉʉba kʉ̃ria b̶uu ewaricha jomaurãba ichimaa biꞌia berrea panad̶ayu maud̶e ichi poyaabariiba jomaurã poyaa uru b̶uai. Biꞌia b̶uu maka b̶uai.

Tito 2:1

Maamina bichiba chi biawãra bed̶ea jipa jaradea b̶uai b̶uu.

Tito 2:15

Joma mau jaradea b̶uase. Aid̶ase ãbarãba mau bed̶ea waud̶amera. Biꞌiwãe wau nuree iadaase, Dachi Akõreba bichi b̶usiid̶eeba maka waumera. Ãbarãmaa bichi ida makabiarã́se.

Hebreos 13:7

Machi karrarã kĩrabásturu. Maarãba Dachi Akõre bed̶ea machimaa jaradeasid̶au. Kʉ̃risiásturu ãchi saka nibasid̶au maud̶e maka nid̶auba kãare sakasii. Ãchiba Cristod̶e ijãa panad̶a kĩra machia bid̶a ijãa panásturu.

Hebreos 5:12

Machiba Jesusd̶e ijãaped̶aad̶a ãrea baaruu. Maud̶eeba id̶i machi Dachi Akõre bed̶ea jaradeabadau nuread̶ai panasid̶au. Maamina Dachi Akõre bed̶ea biꞌia adua panuud̶eeba poyaa biꞌia jaradead̶akau. Ab̶auba machimaa chi Dachi Akõre bed̶ea ʉ̃rʉbena naa jaradead̶a waya jaradeai b̶uu, ju dobiiruu kĩra. Machi warrarã kĩra nureed̶eeba, kiuru kod̶ai bad̶amaarã ju b̶aa dod̶ai panuu.

Santiago 1:19

Ãbarã mʉa kʉ̃riakuabarii, nau kʉ̃risia panásturu: Jomaurãba biꞌia ũrid̶ai baita nuread̶ai panuu, biꞌia nuread̶ai panuu, maud̶e barikia isa kĩrud̶aabai panuu.

Santiago 1:26

Ab̶auba Dachi Akõred̶e ijãa b̶uu kʉ̃risia b̶uubʉrã, maamina ichi kẽrame biꞌia nuwẽebʉrã, ara ichi du ab̶a setaa kũrua b̶uu. Biawãra bari ijãa b̶uu.

1 Pedro 2:12

Dachi Akõred̶e ijãad̶akaurã tãed̶e jipa nibásturu. Maka ãchiba machi kachirua waubadaurã a panumina, machiba biꞌia wau panuu unu panuu. Maabae Dachi Akõre neeruud̶e machi ʉ̃rʉbena ichimaa biꞌia berread̶ai.

1 Pedro 2:5

Machi ichid̶ebena chokae nureed̶eeba, de waui baitabena mo kĩra nureebʉ. Machid̶ebena Dachi Akõreba ichi de wauruu. Maud̶e ichi baita machi paarerã babiaruu. Machiba Jesucristod̶ebena Dachi Akõre baita ne wau panuud̶e ichimaa ãnimara baa deaduu kĩra wau panuu. Maka wau panuu ichiba biꞌia unu b̶uu.

1 Pedro 4:10

Dachi Akõreba ichi sõbiad̶eeba dachicha ichi Jauriba waubi b̶uu deasii, waabenarã aid̶ad̶amera. Dachi Akõre baita bari trajabadaurã biawãrad̶eeba ichiba machicha deasiid̶eeba waabena aid̶ásturu.

1 Pedro 4:16

Maamina ab̶auba Cristod̶e ijãa b̶uud̶eeba ãrea biꞌiwãe b̶uaruubʉrã, peraiwãe b̶uu. Maumaarã Cristod̶eeba Dachi Akõremaa biꞌia berreai b̶uu.

1 Pedro 5:11

Biꞌia b̶uu ewaricha ne joma ichi juad̶e uru b̶uai. Biꞌia b̶uu maka b̶uai.

Judas 1:25

Dachi Akõre ab̶aburu nii. Ichi dachi karibabariibʉ. Ichi chi aude Mechiu nii, maud̶e joma poyaa waui b̶uu. Jomaurã chibaribʉ. Nabẽraed̶eed̶ebena maka nii. Id̶ibae bid̶a maka nii, maud̶e maka b̶uai. Dachi Akõremaa biꞌia berread̶ai panuu Dachi Mechiu Jesucristod̶eeba. ¡Biꞌia b̶uu maka b̶uai!