1 Pedro 3:9 - Emberá Chamí

⁹ Ab̶auba machi kachirua wauruubʉrã ara mau kĩra waurã́sturu. Kachirua jaraaruubʉrã ara mau kĩra kachirua jararã́sturu. Maumaarã ʉtaa id̶ísturu Dachi Akõreba mau aid̶amera. Kuitaa panuu Dachi Akõreba machi adausii maka nuread̶amera. Maka nureebʉrã, Dachi Akõreba machi sid̶a aid̶ai.

1 Pedro 3:9 ပူးပေါင်းရင်းမြစ်များ

Mateo 19:29

Mʉ kakua ab̶auba ichi de, ãbarã, neekaurã, akõre, nawe, kima, warrarã maud̶e chi drua b̶ʉiruubʉrã, ichiba b̶ʉid̶a audeara 100 adaui maud̶e Dachi Akõre ome ewaricha chokae b̶uai.

Mateo 25:34

Maabae mʉ, chi Reyba jua biare panuurãmaa naka jaraaruu: “Machi, mʉ Chachaba biꞌia duanud̶a, nésturu. Ichi puurud̶e biꞌia panásturu. Nau iujãa wausiid̶eed̶ebena mau puuru machi baita waud̶a b̶uu.

Mateo 5:39

Maamina mʉʉba jaraaruu: bichi kachirua wauruud̶e chũpea dauchia jãadua b̶uase. Barikiuba bichi kĩedarr jua biarebena sĩiruubʉrã, chi osob̶arebena sid̶a ʉmʉase sĩmera.

Mateo 5:44

Maamina mʉʉba jaraaruu: machi kĩramaabadaurã kʉ̃riásturu. Chi machimaa kachirua jaraaduumaa biꞌia jarásturu; machi kĩramaa panuu biꞌia wáusturu. Dachi Akõremaa ʉtaa id̶ísturu ãchi aid̶amera.

Marcos 10:17

Maad̶akare Jesús wãaruud̶e ẽbẽra ichimaa pira neesii. Mau ẽbẽra Jesús daad̶e õdarrd̶e kob̶eeped̶a id̶isii: —Jaradeabarii bia nii, Dachi Akõre ome ewaricha chokae b̶uai baita ¿mʉʉba kãare waui b̶uma?

Lucas 10:25

Earab̶a Jesús biawãra ne kuitaa b̶uu kuitaai baita Moisesba b̶ʉd̶a jaradeabarii jiraduped̶a naka id̶isii: —Jaradeabarii, ¿mʉʉba kãare waui b̶uma Dachi Akõre ome ewaricha chokae b̶uai baita?

Lucas 18:18

Ẽbẽrarã chi karrba Jesusmaa id̶isii: —Jaradeabarii bia nii, Dachi Akõre ome ewaricha chokae b̶uai baita ¿mʉ kãare sãaima?

Romanos 12:14

Chi machi kachirua waud̶ai baita wãraabadaurãmaa biꞌia berreásturu. Dachi Akõremaa ʉtaa id̶ísturu, ichiba waabenarã biꞌia panabiamera; ʉtaa id̶irã́sturu ichiba ãchi kachirua panabiamera.

Romanos 12:17

Ab̶auba machi kachirua wauruubʉrã, ara mau kĩra waurã́sturu. Jomaurã daad̶e biꞌia wáusturu.

Romanos 8:28

Mau awara Dachi Akõreba kʉ̃risia b̶uad̶a kĩra chi ichi kʉ̃riabadau ichiba iukuasii. Dachiba kuitaa panuu maarã baita Dachi Akõreba ne jomad̶e biꞌia waubarii.

Romanos 8:30

Dachi Akõreba chi ichiba naed̶e duanud̶arã iukuasii, ichi Warr Jesús kĩra nuread̶amera. Chi ichiba iukuad̶a chi ichid̶irã jipa nuree baara b̶usii. Chi ichiba chi ichid̶irã jipa nuree baara duanud̶arãmaa ichi biꞌia niid̶ebena deai.

Gálatas 3:14

Makasii Dachi Akõreba Jesucristod̶eeba judiowãerã sid̶a karibamera ichiba naed̶e Abrahammaa karibai ad̶a kĩra. Dachiba Jesucristo ijãa panuud̶eeba Dachi Akõreba ichi Jauri deai jarad̶a irsibisid̶au.

Efesios 4:32

Sõbiad̶eeba nureásturu. Kĩra chuburia baraa nureásturu. Chi machiba kachirua wauped̶aad̶a kʉde uru b̶ee ida b̶ústuru, Dachi Akõreba machi kachirua Cristod̶eeba ida b̶ud̶a kĩra.

1 Tesalonicenses 5:15

¡Ũrísturu! Ab̶auba machi kachirua wauruubʉrã mau arab̶au kachirua waurã́sturu. Mau kãyabãra ewaricha machi chiya biꞌia wáusturu. Jomaurã ome biꞌia wáusturu.

Hebreos 12:17

Machiba kuitaa panuu nau maad̶akare Esauba kʉ̃ria b̶uasii chi akõreba ichi ʉ̃rʉbena biꞌia jarai Dachi Akõreba karibamera. Maamina chi akõreba ichi ida b̶usii. Esaú jẽasmina ichiba naed̶e waud̶a poyaa biꞌia b̶uubasii.

Hebreos 6:14

Naka jarasii: «Biawãra mʉʉba bichi karibai maud̶e bichid̶ebena ãrea imibiai».

1 Pedro 5:10

Machi ewari b̶aꞌãra biꞌiwãe panaped̶aad̶akare Dachi Akõreba ne jomad̶e biꞌia b̶ui. Ichiba machi aid̶ai biꞌia ijãad̶amera, joma jãaduad̶amera maud̶e chaarea nuread̶amera. Dachi Akõreba ichi sõbiad̶eeba ne jomad̶e aid̶abarii. Ichiba machi Jesucristod̶eeba iusii ichi ome ewaricha chi mechiu nuread̶amera.