1 Pedro 1:12 - Emberá Chamí

¹² Maamina Dachi Akõreba kuitaabiad̶a ãchiba berreaped̶aad̶a ãchi baitawãe basii, maumaarã machi baita b̶uu. Ãchiba berreaped̶aad̶a jãabae chi bed̶ea bia Cristo ʉ̃rʉbena jaradeabadaurã dachimaa biꞌia kuitaabia panuu Dachi Akõre Jauri bajãad̶ebena bʉisiid̶eeba. Mau angelerã bid̶a kuitaa kʉ̃ria panuu.

1 Pedro 1:12 ပူးပေါင်းရင်းမြစ်များ

Mateo 11:25

Mau ewarid̶e Jesusba jarasii: «Chacha, bichi bajãad̶ebena Mechiu maud̶e nau iujãad̶ebena Mechiu. Bichiba chi ne adua nureerãmaa mʉʉba jaradead̶a kuitaabiasiid̶eeba mʉʉba bichi bia jarai. Ne kuitaa nureerãmaa bichiba kuitaabiabasii.

Mateo 11:27

»Mʉ Chachaba mʉʉmaa ara ichi ʉ̃rʉbena joma kuitaabisii. Ab̶au bid̶a adua panuu mʉ, chi Warr saka nii; ab̶a mʉ Chacháburu kuitaa b̶uu. Ara mau kĩra ab̶au bid̶a adua panuu mʉ Chacha saka nii; ab̶aburu mʉ, chi Wárrburu kuitaa b̶uu. Mʉʉba ab̶aumaa mʉ Chacha kuitaabiiruubʉrã, mau ẽbẽraba kuitaai.

Mateo 16:17

Jesusba jarasii: —Bichi ãrea biꞌia b̶uu, Simón, Jonás warr. Ab̶au ẽbẽra bid̶a bichimaa mau kuitaabiibasii, maumaarã mʉ Chacha bajãad̶e b̶uuba kuitaabisii.

Marcos 16:15

Maabae Jesusba ãchimaa jarasii: «Druacha wãd̶aped̶a chi bed̶ea bia mʉ ʉ̃rʉbena jomaurãmaa jarásturu.

Lucas 15:10

Mʉʉba jaraaruu ara mau kĩra chi kachirua waubarii ab̶a Dachi Akõremaa neeruud̶e Dachi Akõre maud̶e ichi angelerã ãrea kĩrajʉʉbadau».

Lucas 2:26

Naed̶e Dachi Akõre Jauriba ichimaa kuitaabisii ichi biui naed̶e Dachi Mechiuba Dachi Karibabarii deai jarad̶a unui.

Lucas 9:6

Maka wãd̶aped̶a puuru b̶eecha jarabachid̶au chi bed̶ea bia Jesús ʉ̃rʉbena, maud̶e ẽpermo nuree aribiabiabachid̶au.

Juan 15:26

»Dachi Akõre Jauri, chi machi Aid̶abarii neei. Mauba biawãra bed̶ea jarabarii. Mʉʉba mau mʉ Chacha b̶uabariimarebena bʉisiid̶e mauba mʉ ʉ̃rʉbena machimaa berreai.

Hechos 10:44

Pedro wabid̶a berrea b̶uud̶e joma chi ichi ũri panuumaa Dachi Akõre Jauri neesii.

Hechos 16:10

Pabloba mau unusiid̶eeba daiba kuitaasid̶au Dachi Akõreba dai iukua b̶uasii chi bed̶ea bia Jesús ʉ̃rʉbena Macedoniad̶ebenarãmaa jarad̶amera. Ara makʉd̶e wãd̶ai baita paneesid̶au.

Hechos 2:33

Dachi Bajãad̶ebena Akõreba ichi jua biare Jesús chi mechiu b̶usii. Maabae ichi Jauri deai jarad̶a Jesusmaa deasii ichid̶irãmaa deamera. Jesusba mau Jauri biawãra daimaa deasii. Machiba unu panuu maud̶e ũri panuu ichi Jauriba maka waubi b̶uu.

Hechos 4:31

Dachi Akõremaa ʉtaa id̶id̶ai ida b̶usid̶aud̶e chi panad̶amare de uri kob̶eesii. Maud̶e joma Dachi Akõre Jaurid̶eeba duaneesid̶au. Mauba Dachi Akõre bed̶ea wapead̶awẽa jara kopaneesid̶au.

Hechos 4:8

Maud̶e Pedroba Dachi Akõre Jaurid̶eeba naka panausii: —Dachi puurud̶ebena karrarã maud̶e Israeld̶ebena chõrarã:

Hechos 8:25

Pedroba maud̶e Juanba chi bed̶ea Dachi Mechiu Jesús ʉ̃rʉbena jarad̶aped̶a Jerusalend̶aa waya wãsid̶au. Wãaduud̶e Samaria druad̶e ãrea puuru b̶eecha mau bed̶ea bia jara wãsid̶au.

Romanos 1:17

Mau bed̶ea biad̶eeba Dachi Akõreba kuitaabia b̶uu dachi karibai, ichiba jara b̶uu kĩra. Jesucristod̶e ijãaruubʉrã maka b̶uai. Dachi Akõre bed̶ead̶e naka b̶ʉ kub̶uu: «Chi jipa nii, Dachi Akõred̶e ijãa niid̶eeba chokae nibai».

Romanos 10:15

Dachi Akõreba ab̶a bid̶a bʉiwẽebʉrã, ¿saka jaradead̶e wãd̶aima? Dachi Akõre bed̶ead̶e naka b̶ʉ kub̶uu: «Chi bed̶ea bia jarad̶e needuu ãrea biꞌia nuree».

Romanos 15:19

maud̶e ẽbẽrarãba ne poyaa waud̶akau wau b̶uud̶eeba maka aid̶asii. Mʉʉba Dachi Akõre Jauri poyaad̶eeba joma mau wausii. Jerusalend̶ebena Ilírico druad̶aa bed̶ea bia Cristo ʉ̃rʉbena mʉʉba joma jaradeai b̶uad̶amaa jaradeasii.

1 Corintios 2:10

Joma mau Dachi Akõreba ichi Jaurid̶eeba dachimaa kuitaabiasii. Ichi Jauriba ne joma kuitaa b̶uu. Chi Dachi Akõre kʉ̃risia sid̶a ne joma kuitaa b̶uu.

2 Corintios 1:22

Ichi Jauriba dachicha dauchaa b̶usii dachiba ichid̶irã kuitaad̶amera. Maud̶e dachi sõd̶e b̶usii kuitaad̶amera joma ichiba deai jarad̶a biawãra adaud̶ai.

2 Corintios 6:6

Dai jipa nibaped̶aad̶ad̶eeba, biawãra kʉ̃risia kuitaad̶eeba, joma dauchia jãadua panuud̶eeba, sõbiad̶eeba, Dachi Akõre Jauri dai sõd̶e b̶uud̶eeba, biawãra kʉ̃riad̶eeba, chi biawãra bed̶ea jaradea panuud̶eeba, maud̶e Dachi Akõre poyaaba maka unubi panuu. Dai jipa panuud̶eeba kachirua poyaabadau maud̶e ara mau jipa panuud̶eeba daiba chi kachiruamaa ida poyaabid̶akau.

Gálatas 1:12

Mau bed̶ea mʉʉba ab̶a ẽbẽrad̶ebena kuitaabasii. Ab̶a ẽbẽraba mʉʉmaa jaradeabasii. Maumaarã Jesucristoba mʉʉmaa kuitaabisii.

Gálatas 1:16

ichi Warr mʉʉmaa kuitaabisii judiowãerãmaa mau ʉ̃rʉbena jaramera. Maud̶e mʉʉba ab̶aumaa bid̶a id̶iibasii saka waui b̶uu kuitaai baita.

Efesios 3:10

Jãabae ẽbẽrarã, Dachi Akõred̶eeba Ichiba ichi ne jomad̶e ãrea kuitaa b̶uu kuitaabiasii chi meserãa nureerãmaa maud̶e bajãad̶ebena chi mechiu nureerãmaa.

1 Tesalonicenses 2:9

Ãbarã, machiba kuitaa panuu ãyadaa maud̶e ẽsabud̶e kʉrrjĩrud̶aabasii. Mau awara traju sid̶a waubachid̶au chi nejarra adaud̶ai baita. Daiba chi Dachi Akõre ʉ̃rʉbena bed̶ea bia machimaa jaradea panasid̶aud̶e, kʉ̃riad̶aabasii machiba daimaa ne kaebea dea panad̶ayu, machi chiko b̶aꞌãra b̶eerãamera.

1 Timoteo 3:16

Biawãra Dachi Akõreba mau bed̶ea kuitaabiad̶a ãrea biꞌia b̶uu: Cristo nau kakuad̶e neesii. Dachi Akõre Jauriba kuitaabiasii ichi jipa nii. Angelerãba ichi unusid̶au. Ãbarãba ichi ʉ̃rʉbena drua awarabenarãmaa jaradeasid̶au. Ãreaba nau iujãad̶e ichid̶e ijãasid̶au. Dachi Akõreba ichi bajãa bia b̶uud̶aa waya adoesii.

Hebreos 11:13

Joma maarã ẽbẽrarã Dachi Akõred̶e ijãa badaped̶aad̶a biusid̶au. Maamina Dachi Akõreba deai jarad̶a ãchiba nau iujãad̶e adaud̶aabasii. Maamina kuitaasid̶au kaad̶ebena ewarid̶e ichiba joma deai. Maud̶eeba kĩrajʉʉsid̶au maud̶e arakʉd̶e jarasid̶au nau iujãad̶e ãchi ãyarebena druad̶ebena kĩra duanuu maud̶e ãibena druacha duanuu.

Hebreos 2:4

Mau awara Dachi Akõreba ẽbẽrarãba ne poyaa waud̶akau mechiu aꞌawaraa waubiasii. Ichiba kʉ̃ria b̶uad̶a kĩra ichi Jauriba waubi b̶uu ichid̶irãcha dead̶akasii. Joma maud̶eeba kuitaabiasii mau bed̶ea biawãrabʉ.

Hebreos 4:2

Chi bed̶ea bia Dachi Akõreba kʉrrjĩrubiai ʉ̃rʉbena dachiba ũrisid̶au nabẽraed̶ebenarãba ũriped̶aad̶a kĩra. Dachiba sõd̶eeba ijãa panuud̶eeba Dachi Akõreba kʉrrjĩrubiaimaa wãd̶ai. Maamina nabẽraed̶ebenarãba ũrid̶aped̶a ijãad̶aabasiid̶eeba mau bed̶eaba karibaabasii. Ãchi ʉ̃rʉbena Dachi Akõreba naka jarasii: «Kĩru b̶uud̶e mʉʉba biawãrad̶eeba naka jarasii: “Mʉʉba kʉrrjĩrubiaimaa jãarã wãd̶aabai”». Maka jarasii nau iujãa waud̶ad̶eed̶ebena ichiba waui b̶uad̶a joma uru b̶umina.

1 Pedro 1:25

Maamina Dachi Mechiu bed̶ea wãꞌãekau». Mau wãꞌãekau bed̶ea bia Cristod̶ebenabʉ. Mau ãbarãba machimaa jarasid̶au.

1 Pedro 4:6

Maud̶eeba biud̶arãba chi bed̶ea bia Cristo ʉ̃rʉbena ũrisid̶au ãchi jauri chokae nuread̶amera, Dachi Akõre chokae b̶uu kĩra. Maamina ãchi chi kakua biusid̶au, Dachi Akõreba joma biud̶ai panuu asiid̶eeba.

Apocalipsis 5:11

Maka b̶uud̶e mʉʉba angelerã karimaa panuu unusii. Maarã ãrea basiid̶eeba mʉʉba poyaa juasiibasii. Maarãba Dachi Akõre chi rey ãkau, chi chokae duanuurã maud̶e chi 24 chõrarã ad̶u jũra duanasid̶au.