1 Corintios 6:15 - Emberá Chamí

¹⁵ ¿Machiba adua panuka machi kakua Cristod̶e? Makarã ¿mʉʉba ãbua b̶uika chi Cristod̶e, wẽra aud̶ua nii ome? ¡Makawãema!

1 Corintios 6:15 ပူးပေါင်းရင်းမြစ်များ

Lucas 20:16

Araa wãped̶a maarã joma kenaped̶a ichi uva uu nub̶uu waabenarãmaa deai nud̶amera». Chi aria panuurãba mau ũrisid̶aud̶e jarasid̶au: —¡Mau makaabasirã ara b̶uas!

Romanos 12:5

Ara mau kĩra dachi ãrea panumina, Cristo ome panuud̶eeba kakua ab̶aburu nii kĩra panuu. Maka dachi joma kakua ab̶ad̶e ãbua panuu.

Romanos 3:31

Jesusd̶e ijãa panuud̶eeba ¿Moisesba b̶ʉd̶a ida b̶u panuka? Makawãema, maumaarã mau Moisesba b̶ʉd̶a biꞌia b̶uu unubadau.

Romanos 3:6

¡Biawãra makawãema! Dachi Akõre maka jipa niiwãe basirã, ¿saka nau iujãad̶ebenarã nebʉra jipa ichiai basma?

Romanos 6:15

¿Mau ʉ̃rʉbena saka kʉ̃risia panuma? Dachi Akõreba ichi sõbiad̶eeba dachi karibasiid̶eeba maud̶e Moisesba b̶ʉd̶ad̶e dachi duanuuwãed̶eeba ¿kachirua waud̶ai panuka? ¡Makawãema!

Romanos 6:2

¡Biawãra maka waud̶aabai panuu! Dachi kachiruad̶eeba biusid̶au. Maud̶eeba ¿saka kachiruad̶e nibad̶aima?

Romanos 7:13

Makarã ¿Moisesba b̶ʉd̶a biꞌia b̶uuba mʉ biubiska? ¡Makawãema! Maumaarã kachirua wau b̶uu kakua mʉ maka biui b̶uasii. Mʉʉba kachirua wau b̶uu kakua mau Moisesba b̶ʉd̶a biꞌia b̶uuba jara b̶uu mʉ biui b̶uu. Maka arakʉd̶e unubi b̶uu chi kachirua saka b̶uu. Mʉʉba kachirua wau b̶uu biawãra ãrea kachirua b̶uu.

Romanos 7:7

¿Mau ʉ̃rʉbena saka kʉ̃risia panuma? ¿Moisesba b̶ʉd̶a kachirua b̶uka? ¡Makawãema! Mau Moisesba b̶ʉd̶a wãꞌãe basirã mʉʉba adua b̶uai basii kãare kachirua b̶uu. Moisesba b̶ʉd̶aba «ab̶auba uru b̶uu kʉ̃riarã́bad̶e» ad̶awãe basirã, mʉʉba ãibenaba uru b̶uu kʉ̃riai kachirua b̶uu adua b̶uai basii.

1 Corintios 11:3

Maamina mʉʉba kʉ̃ria b̶uu machiba kuitaad̶ai Cristo, joma mukĩra chibaribʉ; mukĩra, wẽra chibaribʉ; maud̶e Dachi Akõre, Cristo chibaribʉ.

1 Corintios 12:27

Ara mau kĩra machi joma ara chi Cristo kakua kĩra nuree. Machi ichi kakuad̶ebenarãbʉ.

1 Corintios 6:13

Maud̶e waabenarãba jarabadau: «Chiko dachi b̶i baita b̶uu, maud̶e dachi b̶i ãnimara kiuru baita b̶uu». (Maka b̶umina Dachi Akõreba mau omea wãꞌãebii). Maamina dachi kakuaba barikia kachirua waui b̶uai baita b̶uuwãe, maumaarã Dachi Mechiu baita b̶uu.

1 Corintios 6:17

Maamina Dachi Mechiu ome ãbua b̶uu ichi ome jauri ab̶a b̶uu kĩra nuree.

1 Corintios 6:19

¿Machiba adua panuka machi kakua Dachi Akõre Jauri de kĩra nii? Dachi Akõreba ichi Jauri machimaa deasii. Ichi machi sõd̶e b̶uu. Machi ara machid̶iwãema maumaarã Dachi Akõred̶ebʉ.

1 Corintios 6:3

¿Adua panuka dachiba angelerã nebʉra ichiad̶ai? Maka b̶uud̶eeba ¿chi id̶ibaebena nebʉra machi tãed̶e nuree poyaa ichiad̶aabaska?

Gálatas 2:17

Dachiba jʉrʉsid̶au Cristod̶eeba Dachi Akõreba dachi chi jipa nuree baara duanumera. Maud̶eeba waabenarãmaarã dachi kachirua waubadaurãbʉ, chi Moisesba b̶ʉd̶a ida b̶usid̶aud̶eeba. Makarã ¿Cristoba dachimaa kachirua waubia b̶uka? ¡Makawãema!

Gálatas 3:21

Maka b̶uubʉrã Dachi Akõreba Moisesmaa ichi bed̶ea b̶ʉbisiid̶e ¿ichiba Abraham ome bed̶ea dead̶a ida b̶uska? ¡Makawãema! Moisesba b̶ʉd̶aba dachi poyaa chokae panad̶ai basirã, mau b̶ʉd̶a wau panuud̶eeburu Dachi Akõreba dachi chi jipa nuree baara duanui basii.

Gálatas 6:14

Maamina mʉ maka niiwãema. Ara mʉ ʉ̃rʉbena ab̶a bid̶a biꞌia berreawẽma. Maumaarã ab̶aburu Dachi Mechiu Jesucristo cruzd̶e biud̶a ʉ̃rʉbena biꞌia berreai. Cristo cruzd̶e biusiid̶eeba chi nau iujãad̶ebenarãba biꞌia unubadau, mʉʉmaarã mau joma biusii. Maud̶e chi nau iujãad̶e nureemaarã, mʉ biusii.

Efesios 4:12

Ichiba maka b̶usii ẽbẽrarã Dachi Akõred̶erã aid̶ad̶amera, ãchia bid̶a Dachi Akõre baita poyaa biꞌia waud̶amera. Maka joma Cristo ẽbẽrarã ichi kakua abadau chaarea warimaa panuu,

Efesios 5:23

Mukĩra ichi wẽra chibaribʉ. Ara mau kĩra Cristo ichi ẽbẽrarã Chibaribʉ maud̶e ichi ẽbẽrarã ichi kakua kĩra nuree. Ichi ãchi Karibabariibʉ.

Efesios 5:30

ichi kakua kĩra panuud̶eeba.

Colosenses 2:19

Ãchi Dachi Mechiu Cristo ome panuuwãe. Maamina ẽbẽrarã Cristod̶eeba ichid̶eeba ne joma uru panuu ichi ome ãbua biꞌia panad̶ai baita. Ichid̶eeba dachi waribadau Dachi Akõreba waribi b̶uu kĩra.