1 Corintios 2:14 - Emberá Chamí

¹⁴ Maamina Dachi Akõre Jauriba kuitaabi b̶uu chi Dachi Akõre Jauriwãe niiba kuitaai kʉ̃riakau, ichimaarã biꞌiwãe b̶uud̶eeba. Maud̶e poyaa kuitaakau, ab̶a Dachi Akõre Jaurid̶éburu kuitaai b̶uud̶eeba.

1 Corintios 2:14 ပူးပေါင်းရင်းမြစ်များ

Mateo 16:23

Maamina Jesusba waya ichiaped̶a Pedromaa jarasii: —¡Satanás, mʉ jãkaabena ãyaa wãse! Mʉʉba waui b̶uu bichiba ida kabiwẽe. Bichiba Dachi Akõre kĩra kʉ̃risiawẽa b̶uu. Maumaarã ẽbẽra kĩra kʉ̃risia b̶uu.

Juan 10:20

Ãreaba jarasid̶au: «Jãu ẽbẽraba jai kachirua uru b̶uu. Jãu kĩrawãe b̶uu. ¿Sakãe jãu bed̶ea ũrid̶aima?»

Juan 12:37

Jesusba ẽbẽrarãba ne poyaa waud̶akau ẽbẽrarã ãrea daad̶e wausmina ãchiba wabid̶a ijãad̶aabasii.

Juan 14:17

Ichi Dachi Akõre Jauribʉ. Ichiba Dachi Akõre biawãra kuitaabiabarii. Nau iujãad̶ebenarãba ichi poyaa adaud̶aabai, unud̶akaud̶eeba maud̶e adua panuud̶eeba. Maud̶e machiaburu ichi kuitaa panuu, machi baara b̶uud̶eeba maud̶e machi sõd̶e b̶uud̶eeba.

Juan 14:26

Maamina mʉ Chacha mʉ trʉ̃d̶eeba ichi Jauri bʉi machi Aid̶abarii b̶uamera. Dachi Akõre Jauriba ne joma machimaa jaradeai. Ichiba mʉʉba jarad̶a machimaa joma kĩrababiai.

Juan 15:26

»Dachi Akõre Jauri, chi machi Aid̶abarii neei. Mauba biawãra bed̶ea jarabarii. Mʉʉba mau mʉ Chacha b̶uabariimarebena bʉisiid̶e mauba mʉ ʉ̃rʉbena machimaa berreai.

Juan 5:44

¿Saka mʉʉd̶e ijãad̶aima? Ab̶aburu kʉ̃ria panuu waabenarãba machi biꞌia unud̶ai. Maamina machiba jʉrʉd̶awẽe Dachi Akõre ab̶a niiba machi biꞌia unui.

Juan 8:43

Mʉʉba jara b̶uu ¿sakãe machiba kauwa ʉ̃rid̶awẽa panuma? Machiba kauwa ʉ̃rid̶awẽa panuu, mʉ bed̶ea ũrid̶ai kʉ̃riad̶akaud̶eeba.

Hechos 16:14

Mau wẽrarãd̶ebena ab̶a Lidia abachid̶au. Mau Tiatira puurud̶ebena basii. Paru pupuchia b̶ee nedobʉibachii. Mau judiowãe wẽraba Dachi Akõre wapeadee b̶uasii. Dachi Mechiuba ichi sõ wausiid̶eeba Pabloba berrea b̶uu Lidiaba kauwa ũriped̶a ijãasii.

Hechos 17:18

Aria chi nuree kuitaa nuree Epicureod̶ebenarã maud̶e Estoicod̶ebenarã berrea paneesid̶au Pablo ome. Maarã chi nureeba jarabachid̶au: «¿Kãare jara kʉ̃ria b̶uma, nau chi bed̶ea ãrea niiba?» Waabenarãba jarabachid̶au: «Daimaarã, ãibena druad̶ebena akõre mechiu ʉ̃rʉbena jaradea b̶uu». Maka jarabachid̶au Pabloba jaradeamaa b̶uad̶ad̶eeba chi bed̶ea bia Jesús ʉ̃rʉbena maud̶e jaradeabachid̶eeba dachi biud̶a maad̶akare waya chokae jiradud̶ai.

Hechos 17:32

Mau biu b̶uad̶a chokae jiradubid̶a ʉ̃rʉbena ũrisid̶aud̶e chi nureerãba ʉisid̶au. Maamina waabenarãba jarasid̶au: —Jãad̶akare bichiba mau ʉ̃rʉbena berrea b̶uu waya ũrid̶ai.

Hechos 18:15

Maamina machiba ab̶aburu bed̶ea ʉ̃rʉbena, machi Dachi Akõre trʉ̃ ʉ̃rʉbena maud̶e machi Moisesba b̶ʉd̶a ʉ̃rʉbena berrea panuu. Maud̶eeba ara machi du ab̶a ichiásturu. Mʉʉba mau ʉ̃rʉbena nebʉra kastikai baita b̶uwãema.

Hechos 25:19

Maumaarã ichi jidea panasid̶au ãchiba ijãa panuu awara jaradea b̶uu kakua maud̶e ẽbẽra Jesús abadau kakua. Mau biusmina Pabloba jara b̶uu chokae b̶uu.

1 Corintios 1:18

Chi tʉbʉchia kiikaud̶aa wãd̶ai ẽbẽrarãmaarã, Cristo cruzd̶e biud̶a ʉ̃rʉbena bed̶ea kĩranema berrea b̶uu. Maamina dachi, chi Dachi Akõreba karibabadaurã, dachiba kuitaa panuu mau bed̶eaba Dachi Akõre poyaabarii kuitaabia b̶uu.

1 Corintios 1:21

Dachi Akõreba ichi kʉ̃risia kuitaad̶eeba waud̶aba, ara ichi unubia b̶uu. Maamina nau iujãad̶ebenarãba ara ãchi kʉ̃risia kuitaad̶eeba ichi unud̶akau. Chi daiba jaradea panuu kĩra kawawẽa b̶uu kĩra b̶umina Dachi Akõremaarã bibuara b̶uu maud̶eeba joma chi ichid̶e ijãaduu karibai.

1 Corintios 1:23

Maamina daiba Cristo cruzd̶e biud̶a jaradea panuu. Mau bed̶ea judiorãba biꞌia ũrid̶akau. Judiowãerãba mau biꞌiwãe b̶uu kʉ̃risiabadau.

1 Corintios 1:25

Ẽbẽrarãmaarã Cristo cruzd̶e biusiid̶eeba Dachi Akõre kuitaawãe nii maud̶e meserãaswãe nii. Maamina ne adua nii kĩra b̶umina Dachi Akõre joma nau iujãad̶ebenarã audeara ne kuitaa nii. Maud̶e meserãaswãe nii kĩra b̶umina joma nau iujãad̶ebenarã audeara meserãa nii.

1 Corintios 15:44

Nau iujãad̶ebena kakua jau b̶ubadau maamina bajãad̶ebena kakua chokae jiradui. Nau iujãad̶ebena kakua baraubʉrã bajãad̶ebena kakua sid̶a barau.

1 Corintios 15:46

Bajãad̶ebena kakua nabena kakuawãema, maumaarã nau iujãad̶ebena kakua chi nabenabʉ. Chi nabena kakua wãꞌãekare bajãad̶ebena kakua adaui.

1 Corintios 2:12

Dachiba nau iujãad̶ebena kʉ̃risia adaud̶aabasii, maumaarã Dachi Akõre Jauri adausid̶au joma Dachi Akõreba ichi sõbiad̶eeba dead̶a kuitaad̶amera.

1 Corintios 3:1

Ãbarã, mʉ machimaa wãsiid̶e, chi Dachi Akõre Jaurid̶eeba nibabadaurãmaa jaradea b̶uu kĩra poyaa makaabasii. Maumaarã chi nau kakuaba wau kʉ̃ria b̶uu kĩra waubadaurãmaa maud̶e chi ea Cristod̶e ijãaped̶aad̶arãmaa jaradea b̶uu kĩra jaradeasii.

Santiago 3:15

Machi kʉ̃risia kuitaad̶eeba maka kʉ̃risia panuubʉrã, mau kʉ̃risia kuitaa Dachi Akõred̶ebena neekau, maumaarã nau iujãad̶ebena, ẽbẽrarãd̶ebena maud̶e jʉbawãe niid̶ebena neebarii.

1 Juan 2:20

Maumaarã machiba Dachi Akõre Jauri Cristoba dead̶a uru panuu. Ichid̶eeba joma chi biawãra bed̶ea kuitaa panuu.

1 Juan 2:27

Maamina machiba Dachi Akõre Jauri Cristoba dead̶a uru panuu. Maud̶eeba jʉrʉd̶aabai panuu waabenarãmaa machi jaradeabiayua. Dachi Akõre Jauriba machimaa ne joma jaradea b̶uu. Ichiba jaradea b̶uu setawãe, maumaarã biawãrabʉ. Maud̶eeba Cristo ome ãbua panásturu Dachi Akõre Jauriba machimaa jaradead̶a kĩra.

1 Juan 5:20

Kuitaa panuu Dachi Akõre Warr neesii maud̶e kʉ̃risia kuitaa dachimaa deasii Dachi Akõre biawãra unud̶amera. Ichi Warr Jesucristo ome panuud̶eeba dachi biawãra Dachi Akõre ome panuu. Mau biawãra Dachi Akõrebʉ. Mauba ẽbẽrarãmaa ichi ome ewaricha chokae nuread̶ai deabarii.

Judas 1:19

Maarãba ãbarãmaa ãchi kakawaa kʉ̃risia panabiabadau, ãchiba kʉ̃riaduu ne barikia waubadau, maud̶e Dachi Akõre Jauri wãꞌãe nuree.