1 Corintios 14:4 - Emberá Chamí

⁴ Chi dachiba ũrid̶akau bed̶ead̶e berrea b̶uuba ara ichi du ab̶a aid̶a b̶uu biꞌia ijãai baita. Maamina chi Dachi Akõre baita berrea b̶uuba ãbarã aid̶a b̶uu biꞌia ijãad̶amera.

1 Corintios 14:4 ပူးပေါင်းရင်းမြစ်များ

Marcos 16:17

Chi mʉʉd̶e ijãa nureeba nau ẽbẽrarãba ne poyaa waud̶akau waud̶ai: mʉ trʉ̃d̶eeba jai kachiruarã duabʉid̶ai maud̶e bed̶ea wid̶id̶e berread̶ai.

Romanos 14:19

Maud̶eeba jʉrʉd̶ai panuu ãbarã ome jirukaraayuwãe nuread̶ai baita. Maka chiya aid̶a panad̶ai biꞌia ijãad̶ai baita.

1 Corintios 12:10

Maud̶e Dachi Akõre Jauriba chi nureemaa dea b̶uu ẽbẽrarãba ne poyaa waud̶akau poyaa waud̶amera. Chi nureemaa dea b̶uu poyaa Dachi Akõre baita berread̶amera. Chi nureemaa dea b̶uu poyaa kuitaad̶amera ab̶auba Dachi Akõre Jaurid̶eeba berrea b̶uu maebʉrã jai kachiruad̶eeba berrea b̶uu. Maud̶e chi nureemaa dea b̶uu dachiba ũrid̶akau chi bed̶ea didiwaraa berread̶amera. Maud̶e chi nureemaa dea b̶uu dachiba kauwa ũrid̶akau bed̶ead̶e jarad̶a kuitaa jarad̶amera.

1 Corintios 12:28

Dachi Akõreba ãbarã tãed̶e chi Jesucristoba bʉid̶arã naa b̶usii. Mawãare ichi baita berreabadaurã b̶usii. Mawãare ichi bed̶ea jaradeabadaurã b̶usii. Mawãare waabenarã b̶usii ẽbẽrarãba ne poyaa waud̶akau poyaa waud̶amera, chi nuree b̶usii ẽpermo nuree poyaa aribiabiad̶amera, chi nuree b̶usii ãbarã aid̶ad̶amera, chi nuree b̶usii chi ãbarã tãed̶e saka waud̶ai kuitaa panad̶amera, maud̶e chi nuree b̶usii barikiu dachiba ũrid̶akau bed̶ead̶e berread̶amera.

1 Corintios 13:1

Mʉ nau iujãad̶ebenarã bed̶ead̶e berrearuubʉrã maud̶e ángel bed̶ead̶e berrearuubʉrã maud̶e waabenarã ẽbẽrarã kʉ̃riawẽa b̶uubʉrã, mʉ jiorr waud̶a jĩwabarii kĩra maebʉrã campana jĩwabarii kĩra nii.

1 Corintios 13:2

Mʉ Dachi Akõre baita berrearuubʉrã, Dachi Akõreba kʉ̃risia kuitaabiwẽa b̶uad̶a joma kuitaa b̶uubʉrã, Dachi Akõre kʉ̃risia kuitaa joma kuitaa b̶uubʉrã, maud̶e sõd̶eeba biawãra ijãa b̶uud̶eeba ea poyaa ãyaa b̶uuruubʉrã, maud̶e waabenarã kʉ̃riawẽa b̶uubʉrã, mʉ baleswãe nii kĩra nii.

1 Corintios 14:12

Machi ara mau kĩra nuree. Dachi Akõre Jauriba waubi b̶uu machiba ãrea wau kʉ̃ria panuud̶eeba ãbarã aid̶ai baita biꞌia wau kʉ̃riásturu ãchiba biꞌia Dachi Akõred̶e ijãad̶amera.

1 Corintios 14:22

Maka kuitaa panuu chi dachiba ũrid̶akau bed̶ead̶e berreabarii chi Jesusd̶e ijãad̶akaurã baita b̶uu, maumaarã Jesusd̶e ijãabadaurã baita b̶uuwãe. Maud̶e chi Dachi Akõre baita berreai Jesusd̶e ijãabadaurã baita b̶uu, maumaarã Jesusd̶e ijãad̶akaurã baita b̶uuwãe.

1 Corintios 14:26

Maud̶eeba ãbarã, ¿saka arakʉd̶e waud̶aima? Machi araa ãbua imiiduud̶e ab̶auba Dachi Akõre bed̶ead̶ebena kari karii b̶uu, ab̶auba Dachi Akõre bed̶ea jaradeai b̶uu, ab̶auba Dachi Akõreba unubid̶a jarai b̶uu, ab̶auba dachiba ũrid̶akau bed̶ead̶e berreai b̶uu maud̶e ab̶auba mau berread̶a kuitaa jarai b̶uu. Maamina joma mau waud̶ai panuu ãbarãba biꞌia ijãad̶amera.

1 Corintios 14:3

Maamina chi Dachi Akõre baita berrea b̶uuba ẽbẽrarãmaa berrea b̶uu biꞌia ijãad̶amera, chaarea nuread̶amera maud̶e sõbia panad̶amera.

1 Corintios 14:5

Mʉʉmaarã joma machi dachiba ũrid̶akau bed̶ead̶e poyaa berreabadau basirã biꞌia b̶uai basii. Maamina jomaurã Dachi Akõre baita poyaa berreabadau basirã biꞌia b̶uai basii. Biawãra dachiba ũrid̶akau bed̶ead̶e berreai audeara Dachi Akõre baita berreai biꞌia b̶uu. Maamina ab̶auba dachiba ũrid̶akau bed̶ead̶e berreaped̶a kuitaa jaraaruubʉrã, mau sid̶a biꞌia b̶uu. Maka ãbarãba kauwa ũrid̶aped̶a Dachi Akõred̶e biꞌia ijãad̶ai.