1 Corintios 14:29 - Emberá Chamí

²⁹ Ara mau kĩra Dachi Akõre baita berreabadau ome maebʉrã õbea berread̶ai panuu. Maud̶e jomaurãba ãchiba berrea panuu kauwa ũrid̶ai panuu biawãra kuitaad̶ai baita.

1 Corintios 14:29 ပူးပေါင်းရင်းမြစ်များ

Hechos 13:1

Ãbarã Antioquía puurud̶ebena tãed̶e Dachi Akõre baita berreabadaurã, maud̶e Cristo ʉ̃rʉbena jaradeabadaurã nureasii. Bernabé, Saulo, Lucio Cirened̶ebena maud̶e Simón b̶uasii. Simón trʉ̃ «Chi Parr» abachid̶au. Manaén sid̶a b̶uasii. Ichi Galilea druad̶ebena jaradea ua b̶uabarii Herodes ome ãbua warisii.

1 Corintios 12:10

Maud̶e Dachi Akõre Jauriba chi nureemaa dea b̶uu ẽbẽrarãba ne poyaa waud̶akau poyaa waud̶amera. Chi nureemaa dea b̶uu poyaa Dachi Akõre baita berread̶amera. Chi nureemaa dea b̶uu poyaa kuitaad̶amera ab̶auba Dachi Akõre Jaurid̶eeba berrea b̶uu maebʉrã jai kachiruad̶eeba berrea b̶uu. Maud̶e chi nureemaa dea b̶uu dachiba ũrid̶akau chi bed̶ea didiwaraa berread̶amera. Maud̶e chi nureemaa dea b̶uu dachiba kauwa ũrid̶akau bed̶ead̶e jarad̶a kuitaa jarad̶amera.

1 Corintios 13:2

Mʉ Dachi Akõre baita berrearuubʉrã, Dachi Akõreba kʉ̃risia kuitaabiwẽa b̶uad̶a joma kuitaa b̶uubʉrã, Dachi Akõre kʉ̃risia kuitaa joma kuitaa b̶uubʉrã, maud̶e sõd̶eeba biawãra ijãa b̶uud̶eeba ea poyaa ãyaa b̶uuruubʉrã, maud̶e waabenarã kʉ̃riawẽa b̶uubʉrã, mʉ baleswãe nii kĩra nii.

1 Corintios 14:28

Maamina ãbarã araa ãbua imiiduud̶e mau berread̶a kuitaa jarabarii wãꞌãebʉrã, dachiba ũrid̶akau bed̶ead̶e berrea kʉ̃ria b̶uu chũpea b̶uai b̶uu. Ichi kʉ̃risiad̶e Dachi Akõremaa chũpea berreai b̶uu.

1 Corintios 14:30

Ãba ab̶a berrea b̶uud̶e Dachi Akõreba chi ũri panuud̶ebena ab̶aumaa ne unubiiruubʉrã, chi berrea b̶uuba mau ãba ida berreabi b̶uu.

1 Corintios 14:32

Dachi Akõre baita berreabarii barikia berreakau, maumaarã esed̶aubarii berreai baita.

1 Corintios 14:37

Ab̶auba Dachi Akõre baita berreabarii kʉ̃risia b̶uubʉrã, maebʉrã Dachi Akõre Jaurid̶eeba ne wau b̶uu kʉ̃risia b̶uubʉrã, ichiba kuitaai b̶uu mʉʉba nau kartad̶e b̶ʉmaa b̶uu Dachi Mechiuba waubi b̶uu.

1 Corintios 14:39

Maka ãbarã, biꞌia jʉrʉ́sturu Dachi Akõre baita berread̶ayu. Maud̶e dachiba ũrid̶akau bed̶ead̶e berreabadaurã ida berreabiásturu.