1 Corintios 1:20 - Emberá Chamí

²⁰ Biawãra Dachi Akõreba nau iujãad̶ebena kʉ̃risia kuitaa biꞌiwãe b̶uu kuitaabiasii. Maud̶eeba ¿chi ãrea kuitaa nuree kãare sãasma? ¿Chi Moisesba b̶ʉd̶a jaradeabadaurã kãare sãasma? ¿Chi id̶ibaebena kʉ̃risia kuitaad̶eeba berreabadaurã kãare sãasma?

1 Corintios 1:20 ပူးပေါင်းရင်းမြစ်များ

Mateo 13:22

Netaa ioro ʉri id̶aa b̶uud̶e pod̶a nau jara b̶uu: chi nuree ẽbẽrarãba Dachi Akõre bed̶ea ũribadau, maamina ãchi saka biꞌia paneed̶ai baita, ne joma uru panad̶ai baita maud̶e kĩrajʉʉ panad̶ai baita ãrea kʉ̃risiabadau. Joma mauba Dachi Akõre bed̶ea waa ũribiad̶akau. Maud̶eeba ne bia waubiad̶akau.

Juan 12:31

Jãabae Dachi Akõreba kuitaabiaruu nau iujãad̶ebenarãba kachirua wau panabadau. Jãabae Dachi Akõreba poyaa duabʉiruu chi nau iujãad̶ebenarã rey, chi jʉbawãe nii.

Hechos 17:18

Aria chi nuree kuitaa nuree Epicureod̶ebenarã maud̶e Estoicod̶ebenarã berrea paneesid̶au Pablo ome. Maarã chi nureeba jarabachid̶au: «¿Kãare jara kʉ̃ria b̶uma, nau chi bed̶ea ãrea niiba?» Waabenarãba jarabachid̶au: «Daimaarã, ãibena druad̶ebena akõre mechiu ʉ̃rʉbena jaradea b̶uu». Maka jarabachid̶au Pabloba jaradeamaa b̶uad̶ad̶eeba chi bed̶ea bia Jesús ʉ̃rʉbena maud̶e jaradeabachid̶eeba dachi biud̶a maad̶akare waya chokae jiradud̶ai.

Romanos 1:20

Nau iujãa wausiid̶eed̶ebena, maarãba chi ichiba waud̶a unu panuud̶eeba kuitaa panuu ichi ewaricha ne joma poyaa waubarii maud̶e ichi Dachi Akõre. Mau joma waud̶a unu panuud̶eeba ẽbẽrarã chi Dachi Akõre ʉ̃rʉbena unud̶akau mau biꞌia unubadau. Maud̶eeba kachirua waubadaurãba adua panuu poyaa jarad̶aabai panuu.

Romanos 1:22

Kʉ̃risia kuitaa nuree asid̶amina kʉ̃risiaswãe paneesid̶au.

1 Corintios 1:19

Dachi Akõre bed̶ead̶e naka b̶ʉ kub̶uu: «Chi ãrea kuitaa nuree kʉ̃risia kuitaa, mʉʉba biꞌiwãe b̶uu unubiai. Chi kʉ̃risia kuitaa nureerãba waud̶ai kʉ̃risia panuu ida kabiabai».

1 Corintios 1:26

Ãbarã, kʉ̃risiásturu Dachi Akõreba machi adausiid̶e saka nureasii. Ẽbẽrarãmaarã ãrea machid̶ebena ne kuitaa nuread̶aabasii, chi jaradea ua b̶uabadaurã nuread̶aabasii maud̶e chi nejarra barau nureed̶ebena need̶aabasii.

1 Corintios 1:27

Maud̶eeba chi ne kuitaa nureerãmaarã machi ne adua nuree. Maamina Dachi Akõreba chi ne adua nuree jʉrʉ adausii chi ne kuitaa nuree kĩrakayad̶amera. Dachi Akõreba chi meserãaswãe nuree jʉrʉ adausii chi meserãa nuree kĩrakayad̶amera.

1 Corintios 1:28

Nau iujãad̶ebenarãba chi nejarr barauwãe nuree abadau maud̶e chi maarãba ida b̶ubadau Dachi Akõreba jʉrʉ adausii. Maka chi mechiuwãe nuree jʉrʉ adausii chi mechiu nuree chi nejarr barauwãe nuread̶ai b̶ui baita.

1 Corintios 11:32

Maamina Dachi Mechiuba dachi ichiaruud̶e, dachi kastikabarii nau iujãad̶ebenarã ome nebʉra bara b̶uu arãamera.

1 Corintios 2:6

Maka b̶uud̶e daiba jaradea panuu chi Dachi Akõred̶e ãrea ijãa nureemaa. Ãchi baita mau jaradea panuu chi kʉ̃risia kuitaabʉ. Mau kʉ̃risia kuitaa nau iujãad̶ebenawãema maud̶e nau iujãad̶ebena karrarã kʉ̃risia kuitaawãema. Maarã ãrea panad̶aabai.

1 Corintios 2:8

Chi nau iujãad̶ebena karrarã ab̶au bid̶a mau kʉ̃risia kuitaa kuitaad̶aabasii. Kuitaa panad̶a basirã, Dachi Mechiu biꞌia nii cruzd̶e bead̶aabai basii.

1 Corintios 3:18

Ara machi du ab̶a setaa kũruarã́sturu. Ab̶auba chi nau iujãad̶ebena kʉ̃risia kuitaa kĩra ne kuitaa b̶uu kʉ̃risia b̶uubʉrã, waa maka kʉ̃risiabai b̶uu. Maumaarã chi biawãra kʉ̃risia kuitaa uru b̶uai baita nau iujãad̶ebenarã daad̶e ne adua b̶uu kĩra b̶uai b̶uu.

1 Corintios 3:19

Dachi Akõremaarã, nau iujãad̶ebena kʉ̃risia kuitaa biꞌiwãe b̶uu. Dachi Akõre bed̶ead̶e naka b̶ʉ kub̶uu: «Dachi Akõreba chi nau iujãad̶e ne kuitaa nuree ara ãchi kʉ̃risia kuitaad̶eeba unubibarii ne kuitaa panuuwãe».

1 Corintios 6:2

¿Machiba adua panuka Jesús neeruud̶e Dachi Akõred̶e ẽbẽrarãba chi nau iujãad̶e nuree nebʉra ichiad̶ai? Machiba chi nau iujãad̶e nuree nebʉra ichiad̶aid̶eeba ¿sakãe nebʉra b̶istĩika nuree poyaa ichiad̶akama?

Santiago 4:4

Junebena wẽra ome kãiduu kĩra machiba Dachi Akõre ida b̶uu panuu nau iujãad̶ebenarãba waubadau kĩra waud̶ai baita. ¿Machiba wabid̶a adua panuka chi nau iujãad̶ebena kʉ̃ria b̶uu Dachi Akõre ome chi kĩramaa? Biawãra barikiuba nau iujãad̶ebena kʉ̃ria b̶uubʉrã, Dachi Akõre ome chi kĩramaa b̶eei.