Apokalipsis 4:11 - Anang Ambal Ang Dios – Bago Nga Katipan

¹¹ “Ikaw amun Ginoo kag Dios, dapat ka ra gid nga magbaton ang pagdayaw, pagpadungug kag awtoridad. Ay ikaw maman ang nagimo ang tanan nga mga butang, Kag sono sa imong gosto ginimo mo sanda kag gintawan kaboi.”

Apokalipsis 4:11 ပူးပေါင်းရင်းမြစ်များ

Mga Binoatan 14:15

“Mga amigo, basi maalad kamo kanamun? Kami mga tao ra lang nga pario kanindo. Ginawali namun kanindo ang Mayad nga Barita agud bayaan nindo ron ang mga ara polos nga dia nga mga butang kag magparapit sa Dios nga boi. Tana maman ang nagimo ang langit, ang logta, ang dagat, kag ang tanan nga mga butang sa mga logar nga dia.

Mga Binoatan 17:24

Maman dia ang Dios nga nagimo ang kalibotan kag ang tanan nga digi sa kalibotan. Tana ang Ginoo nga tagya ang langit kag logta, gani ara tana nagaoli sa mga timplo nga ginimo ang mga tao.

Roma 11:36

Ay ang tanan nga butang nagalin sa Dios, kag ginimo paagi kanana kag para kanana. Dayawon ta tana asta sa ara kataposan! Amin.

Efeso 3:9

Ang Dios nga nagimo ang tanan nga butang ara gid nagsogid sa bisan kino kon ano anang sikrito nga plano. Piro dadi ginsogo na ako nga ipasanag sa tanan kon paiwan na ginapatoman anang plano nga dato,

Hebreo 1:10

Kag makon na pa sa anang Bata, “Ikaw, Ginoo, maman ang nagimo ang kalibotan ang ona pa gid, Kag ang langit anang inimoan ra imong mga alima.

Hebreo 1:2

Piro ang ori nga dia nga mga adlaw, nagambal tana kanatun paagi sa anang Bata mismo. Paagi kanana ginimo ang Dios ang bilog nga kalibotan kag tana ra anang ginpili nga maging tagya ang tanan nga mga butang.

Apokalipsis 1:6

Ginimo na kita nga mga ari kag mga pari sa pagsirbi sa Dios nga anang Tatay. Kanana ang kadungganan kag ang gaum asta kon sano. Amin.

Apokalipsis 10:6

kag nagsompa tana sa Dios nga ara kamatayun, nga nagimo ang langit, logta, kag dagat, kag ang tanan nga mga butang sa nasambit nga mga logar. Makon ang angil, “Indi run lang boay,

Apokalipsis 14:7

Nagambal tana mabaskug, makon na, “Magkaadluk kamo sa Dios kag dayawa nindo tana tungud nga gamanan tana, kag tungud nga nagabot ron ang oras nga ukuman na run ang tanan nga mga tao. Simbaa nindo ang Dios nga nagimo ang langit, ang logta, ang dagat, kag ang mga toboran.”

Apokalipsis 19:1

Pagkatapos dato, nabatian ko nga daw dorong tao sa langit ang nagaambal mabaskug, makon nanda, “Dayawon ang Ginoo! Dayawon ta atun Dios nga makagagaum, ay tana ang naglowas kanatun!

Apokalipsis 5:12

Kag nagakaranta sanda mabaskug. Makon andang kanta, “Ang Karniro nga ginpatay maman ang bagay nga magbaton gaum, manggad, kaaram, kag kabaskug. Dapat taodon, padungugan tana, kag dayawon!”

Apokalipsis 5:2

Kag may nakita ako dayon nga gamanan nga angil nga nagpanawag, makon na, “Sino kabay ang bagay nga makaukas anang mga pintal ang kasolatan nga binaroron agud mabokasan kag maumlad?”

Apokalipsis 5:9

kag nagakanta sanda ang bago nga kanta. Makon andang kanta, “Ikaw ang bagay makabuul ang binaroron nga kasolatan kag pamulun anang mga pintal, Tungud nga ginpatay kaw kag paagi sa imong dogo gintobos mo ang mga tao agud maging ana ang Dios. Ginpili mo sanda sa tanan nga tribo, bisan ano andang ambal, kag bisan ano sanda nga klasi tao kag nasyon.