50 ओहाङःसैको सबै येसुकुस् वाह्ओमयः ओउःकायः फेती क्रव्आकाय्।
ओहाङःसैको आल्ती “लौ तेन्पाय् नीङ् सबै ङाकायः फेती क्रव्तेःनै। दोह् हायःती दाय्ह्सा इतलेः आखरःहाङः रय्ह्ती मुनाः ‘लौ ओउःमयःकोः ह्रामःओ मान्ताकायः परमेस्वर्इ सीताक्आक्तीको भेदालम्पाय् इःताङ् उःताङ् क्रव्नै’ त दाय्ह्ती लेखती मुनाः।
दीन्का दीन्पाय् नीङ्कुस् मुती मन्दीर्हाङः स्यान्झुङ्ङोतो ओउःतोक्हाङः ङाकायः चुम्तेःनाङ्सल। बुरु ओउः उय्ह्लेकोः आखरःहाङः रय्ह्ती लेखओ कुरापाय् ताप्तो स्याव्सा खेःतो लेःआः” त दाय्ह्ती येसुइ तोआथास।
ओउः वाह्ओमयःकःहाङः यात्चाक् क्रमःनाय् लावओ लाव्मयः मान्ता खेःतो। ओउःइपाय् येसुकायः गुल्ह्खेःआथै। गुल्ह्तोक्हाङः ओउःकायःमा येसुकायः पानःओलम्इ चुम्सा बोङःथातो
देङी नीङ् रुनःधती क्रव्सा बेलाहाङः दाह्खेःआ माः रैस दाह्ओआः बा। ओउः बेलाहाङः नीङ् सबै ङाकायः फेती लःलयःकोः कीम्ताङ् पाय्ह्तेःनै। ङाकायःपाय् नीङ्खेइ फेतेःनेःनाङ्स फेआक्तीको ङा लयःझुङ्आले मुङल ङाकुस् ङाकोः परमेस्वर् आपाखे मुनाङःच।
“ओउःपाय् ‘ङा लेःआः खेःनाङः’ त ङ्हा तोनेःनाङ्सतो। नीङ्इ ङाखेकायःतेः बोङःतेःनानानाङ्स त खेःया इ ङाकुस् वाह्ओमयःखेकायः चुम्माःत आल्पै” त दाय्ह्ती येसुइ तोआथास।
ङाकोः मुत्ध स्याव्तोक्हाङः सुइमा ङाकायः लव्ह्ताङःल सबै ङाकायः फेती क्रव्आकाय्। एत हायःसा थेङा ओउःमयःकायः प्रभुइ गाल्तुम्ती नोःलाम्।
