18 ओहाङःसैको येसुकःताङ् नाःतो मान्तालम् हुम्लाङ् वाङ्आकाय्। नाःतो हुम्लाङ् वाङ्ती झ्यान्ते “लौ दुम्हान्कोः तीः उःसै त्यात्लाङ् आल्इ” त दाय्ह्ती येसुइ लयःकुस् वाह्ओमयःकायः तोआकान्।
ओहाङःसैको मान्तालम्इ जेःती खाय्आक्तीको ओउःकोः ङ्हासै येसुइ लयःकुस् वाह्ओमयःकायः दुम्हान्कोः उःसै दोङ्गाहाङः ल्होक्आथास। ओउःमयःखे दोङ्गाहाङः लन्ह्ती आल्तोक्हाङः येसुखेइ हुम्ओ मान्तालम्कायः पाय्ह्लाङ् ल्होक्आथास।
ओहाङःसैको येसु स्यालुङ्सै ग्ल्युङ्ह्आ। ग्ल्युङ्ह्तोक् बेलाहाङः नाःतो मान्तालम् ओउःकुस् वाह्आकाय्।
ओहाङःसैको स्यान्आक्तीको ओउःनम्कोः राम्हसै वाङ्ती “लौ इ दुम्हान्कोः उःसै त्यात्लाङ् आल्इ” त दाय्ह्ती ओउःकुस् वाह्ओमयःकायः तोआथास।
ओहाङःसै एत हायःआक्तीको येसुमा ओउःकुस् वाह्ओमयःमा फेरी दोङ्गाहाङः लन्ह्ती ओउः दुम्हान् त्यात्ती द्यान्ह्आकाय्। द्यान्ह्ती वाङ्आक्तीको येसु तीःकोः चीनःसै मुतोक्हाङः नाःतो मान्तालम् ओउःकःताङ् हुम्लाङ् वाङ्आकाय्।
ओहाङःसैको मान्तालम्इ जेःती खाय्आक्तीको येसुइ लयःकुस् वाह्ओमयःकायः दुम्हान्कोः उःसै दोङ्गाहाङः ओउःकोः ङ्हासै ल्होक्आथास। ओउःमयःखे दोङ्गाहाङः लन्ह्ती आल्तोक्हाङः येसुखेइ हुम्ओ मान्तालम्कायः दाम्ती ल्होक्आथास।
एत दाय्ह्आक्तीको येसु आल्ती फेरी दोङ्गाहाङः लन्ह्ती ताङ्ह्ओ दुम्हान्कोः उःसै आल्आकाय्।
ओहाङःसैको यात् दीन्हाङः येसुमा ओउःकुस् वाह्ओमयःमा गालील त तोओ ताङ्ह्ओ दुम्हान्ताङ् आल्ती दोङ्गाहाङः लन्ह्आकाय्। दोङ्गाहाङः लन्ह्आक्तीको “लौ तीःकोः उःसै त्यात्लाङ् आल्इ” त दाय्ह्ती येसुइ ओउःकुस् वाह्ओमयःकायः तोआथास।
ओउःत नोःकाय्तोक्हाङः “लौ इमयःइ ङाकायः चुम्ती लयःकोः राजा स्याव्ताक्सा बोङःनाःताङः” त येसुइ चीःती फेरीलेः लयःझुङ्आले स्यालुङ्ताङ् ज्याल्आ।