युहना 17:23 - चेपाङ

²³ ङा ओउःमयःकुस् ब्राङ्‌तीमा मुनाङी नाङ् ङाकुस् ब्राङ्‌तीमा मुनाःतय्‍ह्‌च ओउःत झ्‍यान्‍ते ओउःमयः जुगाङ् यातै ल्‍हुङ् स्‍याव्‌पै। ओहाङःसैको एत च्‍यवःती ङाकायःपाय् ‘परमेस्‍वर्‌इ ल्‍होक्ओआः’ त ल्‍हाव्‍ह्‌दैबाङ्‌कोः मान्‍तालम्इ चीःनानी। फेरी नाङ्इ ङाकायः राप्ओलो लेखालेः ‘ओउःमयःकायः परमेस्‍वर्‌इ राप्‌नाःथास’ तमा चीःनानी।

युहना 17:23 ပူးပေါင်းရင်းမြစ်များ

युहना 10:38

खेःल ङाइ ओउःकोः काम् पेतो जाङ्‌ह्‌नाङः त खेःया ङाकोः नोःराय्‌खेकायः खेःल ङाइ जाङ्‌ह्ओ काम्‌खे च्‍यवःओकायः ङ्‌हाम्‌नु दा। ओहाङःसैको ङा ङाकोः आपाकुस् ब्राङ्‌नाङः ओउःमा ङाकुस्‌लेः ब्राङ्‌नाः। ओउःत नीङ्इ चीःआक्‌तीको ङ्‌हाम्‌तेःनानी” त दाय्‍ह्‌ती येसुइ तोआथास।

युहना 13:35

नीङ् लःलयःकायः राप्‌काय्‌तेःनाःइसी त खेःया अरुइ ‘लौ इमयः येसुकुस् वाह्ओमयःलेः’ त चीःनानी” त दाय्‍ह्‌ती येसुइ तोआथास।

युहना 14:10

ङा आपाकुस् ब्राङ्‌तोलेः मुनाङः ओउः ङाकुस्‌मा ब्राङ्‌तोलेः मुनाः। ओउःत ङ्‌हाम्‌तेःउलुया। लौ ङाइ तोओ कुरा लयःकोः ल्‍हुङ्‌सै खेःल ङाकुस् ब्राङ्‌ती मुओ आपाइ इ कुरा जाङ्‌ह्‌नौ बा।

युहना 14:23

“लौ सुसुइ ङाकायः राप्‌नाःताङः ओउःइलेः ङाइ तोआ कुरा ग्‍याती जाङ्‌ह्‌नानी। ओउःकायः ङाकोः आपाइ राप्‌ती नीची नीस् आपाचाः ओउःकःताङ् मुलाङ् वाङ्‌नाङःच।

युहना 15:9

लौ गतलो ङाकोः आपाइ ङाकायः राप्‌नाःताङः ओउःतलेः नीङ्‌कायः राप्‌नेःनाङ्‌स।

युहना 16:27

दोह् हायःती दाय्‍ह्‌सा ङाकोः आपाइमा नीङ्‌कायः राप्‌तेःनै। ङाकायः राप्‌ती ‘लौ ओउःपाय् परमेस्‍वर्‌कःसै वाङ्ओआः’ ततेः ङ्‌हाम्‌तेःनेःनाङ्‌स ओउःत झ्‍यान्‍ते ङाकोः परमेस्‍वर्‌ आपाइ राप्‌तेःनै।

युहना 17:11

द्याह् ङाखे नाङ्‌कःताङ् वाङ्‌ती ल्‍हाव्‍ह्‌दैबाङ्‌हाङः ज्‍याङःतो मुङल ओउःमयःखे ल्‍हाव्‍ह्‌दैबाङ्‌हाङः मुधाङ्‌नै। लौ छय्‍ङ्‌तो आपाय ओउःमयःकायः नाङ्‌कोः ग्‍वम्इ पेतो ओम्‌पायःती गम्उसु दा। ओहाङःसै नीचीलो लेखा ओउःमयः ल्‍हुङ् ब्राङ्‌तो मुनै।

युहना 17:21

इतलेः तेनाङः बा आपाय नीची ल्‍हुङ् ब्राङ्‌नाःतय्‍ह्‌च ओउःतलेः ओउःमयः सबै यातैज्‍योः ल्‍हुङ्‌तुक् स्‍याव्‌ती नीचीकुस् ब्राङ्‌पै। ओहाङःसै एत च्‍यवःती अरु ल्‍हाव्‍ह्‌दैबाङ्‌कोः मान्‍तालम्इ ङाकायःपाय् ‘परमेस्‍वर्‌कःसै ल्‍होक्ओआः’ त ङ्‌हाम्‌नाःताङः।

युहना 17:24

लौ आपाय ङाकायः बयःओ मान्‍तालम्‌पाय् ‘ङाकुस् मुपै’ त ङा झाक्‌ती तेनाङः ओहाङःसै नाङ्इ ङाकायः ताङ्‌ह्‌ताक्ओहाङः ओउःमयःइ च्‍यवःसा खाय्‌नानी। ल्‍हाव्‍ह्‌दैबाङ्‌कोः जाङ्‌ह्‌धाङ्‌माःखाहाङःसै नाङ्इ राप्‌तेःआची ओउःत हायःतीतेः ङाकायः ताङ्‌ह्‌तेःताक्‌नाःची।

युहना 17:26

ओउःमयःकायः नाङ्‌कोः कुरा ङाइ छ्यानःआलाङःसु लोनेमा छ्यानःलेःनाङःसु। ओहाङःसैको गतलो नाङ्इ ङाकायः राप्‌तेःनाःची ओउःतलेः ओउःमयःकोः राप्ओ ल्‍हुङ् मुपै। ओहाङःसै ङा ओउःमयःकुस् ब्राङ्‌नाङी” त दाय्‍ह्‌ती येसुइ परमेस्‍वर्‌ आपाकः तेती तोआकान्।

युहना 17:3

दोःआक्‌तीको ओउः जीङः दोःओलम्इ नाङ् दोङ् परमेस्‍वर्‌कायःमा नाङ्इ ल्‍होक्ओ येसु ख्रीस्‌कायःमा पेतो तय्‍ह्‌नानी।

युहना 17:8

दोह् हायःती दाय्‍ह्‌सा नाङ्इ बयःओ कुरा ङाइ सबै तोआलाङःसु तोआक्‌तीको ओउःमयःइ ङ्‌हाम्‌ती सायःती झ्‍यान्‍ते ङाकायःपाय् ‘आपाकःसै ल्‍होक्ओआः’ तमा ‘ओउःकोः कुरा आपाकोः लेःआः’ तमा द्याह् पेतोलेः चीःनानी।

युहना 3:17

ल्‍हाव्‍ह्‌दैबाङ्‌कोः मान्‍तालम्‌कायः गाल्‌तुम्‌ती नोःसाखेकायः परमेस्‍वर्‌इ लयःकोः चोः ल्‍होक्ओ खेःबाय्‌ल मान्‍ता दल्‌ताक्‌साखेकायः परमेस्‍वर्‌इ चोः ल्‍होक्आथै।

युहना 6:56

सुसु ङाकोः मायः जेःमानानी ङाकोः वयः तुङ्‌मानानी ओउःकुस् ङा ब्राङ्‌नाङःच। ङा ओउःकुस्‌लेः ओउः ङाकुस्‌लेः ब्राङ्‌नाङःच।

१ कोरीन्‍थी 1:30

ओउःइलेः ङीकायः येसु ख्रीस्‌कुस् ब्राङ्‌ती यातैज्‍याङ् जाङ्‌ह्आतय्‍ही फेरी येसु ख्रीस्इलेः ङीकायः व्‍हाय्‌माताक्आतय्‍ही। ओउःइलेः छय्‍ङ्‌ताक्‌तीमा पेतो जाङ्‌ह्‌तीमा ङीकायः रेव्ओ काम्‌मा फेमाताक्आतय्‍ही

२ कोरीन्‍थी 5:21

ख्रीस्इपाय् दोह्‌मा रेव्‌तो जाङ्‌ह्उलु ओउःकोः मीक्‌हाङः ङीकायः ख्रीस्‌कुस् पेतो स्‍याव्‌ताक्‌साकायः परमेस्‍वर्‌इ ख्रीस्‌कायः रेव्‌तो मान्‍ताकोः रेव्‌झ्‍याङ्‌कोः बयःआथै।

गालाती 3:28

ओउःत ख्रीस्‌कुस् ब्राङ्‌तो स्‍याव्आक्‌तीको नीङ्‌पाय् यहुदीया यहुदी खेःमालो मान्‍ताया परमेस्‍वर्‌इ दोक्‌ती तोउलु। नोकरीया नोकरी खेःमालोया गोय्‌चोःया मोमःचोःया ओउःइ सु खेःयाकायःमा दोक्‌ती तोउलु सबै ख्रीस्‌कुस् यातैज्‍याङ् स्‍याव्‌तेःनै।

फीलीपी 3:15

ङीकःहाङः सुलो परमेस्‍वर्‌कोः कुराहाङः चोक्ओ ल्‍हुङ् नाःओलेः मुनाःतय्‍ही ओउःइलेः “दाह्‌धाङ्‌ङल” त दाय्‍ह्‌ती ङालो लेखालेः ओउःत हायःसा बोङःपानी। सुखेलो थे थे ल्‍हुङ् स्‍याव्‌तेःनै ओउःकायःपाय् परमेस्‍वर्‌इ पेतोलेः चीःताक्‌तेःनै।

कोलसी 1:28

ओउः ख्रीस्‌कोः कुरा ङीइ थोल्‍ह्‌ती तोनाङःसु सबैकायः गानाक्‌ती व्‍हाय्‌तोलेः स्‍यान्‌नाङःसु। ओहाङःसैको सबै मान्‍ताकायः ख्रीस्इ छय्‍ङ्‌ताक्आक्‌तीको ङीइ ओउःमयःकायः परमेस्‍वर्‌कःताङ् दाक्‌सा खाय्‌नाङःसु।

कोलसी 2:2

दोह् हायःती जाङ्‌ह्आलाङःसु दाय्‍ह्‌सा “ओउःमयः ल्‍हुङ् धोमाय्‌तो स्‍याव्‌ती लयःमयःकायः राप्‌ती ब्राङ्‌पनै” त दाय्‍ह्‌ती जाङ्‌ह्आलाङः। ओहाङःसै ओउःमयः पेतो व्‍हाय्‌तोलेः चीःती झ्‍यान्‍ते परमेस्‍वर्‌कोः छ्यान्‍ह्आक्‌मालो कुरामा चीःसा खाय्‌नानी ओउः कुरापाय् ख्रीस्‌कोः कुरा लेःआः।

कोलसी 3:14

इ पेओ कुरालम्‌पाय् गाव्‌खे सबैसै पेनाः दाय्‍ह्‌सा। राप्ओ ल्‍हुङ् दोःओखेलेः ओउःपाय् सबैसै पेनाः ओहाङःसै नीङ् सबै जुगाङ् ब्राङ्‌तो खात्‌तोलेः मुतेःनै।

१ पत्रुस् 5:10

ओहाङःसैको नीङ्इ बल लीह्‌सीःओ गोरःआक्‌तीको लोने परमेस्‍वर्‌इ नीङ्‌कायः योनःती योती पेतो ल्‍हुङ् क्रोङ्‌तोलेः ङ्‌हाम्‌तेःताक्‌तेःनै दोह् हायःती दाय्‍ह्‌सा परमेस्‍वर्‌इ नीङ्‌कायः प्रभु येसु ख्रीस्‌कुस् गलकायःमा तोङ्‌ह्‌तोलेः स्‍याव्‌साकायः गोत्‌तेःआकाय्।

१ युहना 1:3

ओउःत खेःओ ङीइ च्‍यवःओमा सायःओमा नीङ्‌कायः ल्‍हाक्‌ती तोनेःनाङ्‌स ओहाङःसै ङीकुस् ब्राङ्‌तो मुसा खाय्‌तेःनै। दोङ्‌सीलेः ङी परमेस्‍वर्‌ आपाकुस्‌मा ओउःकोः चोः येसु ख्रीस्‌कुस्‌मा ब्राङ्‌नाःतय्‍ही।

१ युहना 3:1

परमेस्‍वर्‌इ इच्‍युक् पेतोलेः राप्‌नाःतय्‍ही ङीकायःपाय् ओउःइ “लौ ङाकोः चोः लेःआः” त दाय्‍ह्‌ती तोनाःतय्‍ही। माः रैस दोङ्‌सीलेः ओउःकोः चोः लेःआः तय्‍ही अरु ल्‍हाव्‍ह्‌दैबाङ्‌कोः मान्‍तालम्इ परमेस्‍वर्‌कायः तय्‍ह्‌माःत झ्‍यान्‍ते ङीकायःमा तय्‍ह्‌तय्‍हीली।

१ युहना 4:19

ङीकायःपाय् परमेस्‍वर्‌इ ङ्‌हासै राप्आतय्‍ही ओउःत झ्‍यान्‍ते ङीइमा द्याह् ओउःकायःमा अरुकायःमा राप्‌नाःतय्‍ह्‌नी।

प्रकाश 3:9

यात्‌नीस् मान्‍तालम्इ “ङीपाय् यहुदीलम् खेःनाङी” त लयःकायः माःती तोनाःइसी। ओउःत तोओलम्‌पाय् सैतान्इ थनःताक्आथास। ओउःमयःकायः नाङ्‌कःताङ् घोती स्‍यवलाङ् वाङ्‌ताक्‌लेःनाङःसु। नाङ्‌कायःपाय् “ओउः छय्‍ङ्ओचाक्इ राप्ओ मान्‍ता लेःतेःआः बा” त ओउःमयः लोनेः चीःती घोलेःनै।