28 लौ उया ङी साङ्ह्तीमा वाय्सा खाय्मालो राजीताङ् पोक्ती मुसा दोःनाःतय्ही त झ्यान्ते परमेस्वर्कायः “च्युता” त दाय्ह्ती तोमानी ओउःकायः एङःतोमा म्रोताक्तीमा मानमानी
ओउः ङोय्दोहाङः मुओलम्कायः ‘लौ नीङ्कः ङाकोः परमेस्वर् आपा आन म्रोलेःनाः। ओउःकोः राजी याक्ती मुलाङ् वाङ्न दा। ओउः राजीपाय् ल्हाव्ह्दैबाङ्कोः जाङ्ह्तोक्हाङःसै नीङ्कायः गम्ओ लेःआः
ओउः दोङ् कुरालेः खेःसापाय् खेःनाः ओउःमयःखेइ ङ्हाम्नीली त खेःओ वाय्तोलेः स्याव्आकाय् नीङ्खेइ ङ्हाम्तेःआकानी त खेःओकायः च्योतोती गम्तेःनै। ओउःत स्याव्सापाय् स्याव्तो लयःकोः नेह्रो ओर्ताक्माःत एङःती मुन
ङीकायःपाय् ओउःतलेः आन पेतो योनःती योती झ्यान्ते लयःकोः ल्हुङ् गोरे चोःपाय् ल्होक्आतय्ही ओउःत हायःओकायः परमेस्वर्कायः जुगाङ् ताङ्ह्ताक्पाःथै।
ओहाङःसैको परमेस्वर्कायः म्रोताक्सा कुराकायः बोङःनु दा।
द्याह् ङा दप्तोलेः दोःआलाङः। नीङ्इ एपाफ्रोदाय्तस्कुस् ल्होक्ओ थोक्लम् दोःती ङा प्ल्याय्ती वाय्तोलेः स्याव्आलाङः। ओउः थोक्लम्पाय् पेतो सय्ङ्ओ उलःसा ल्हाओ धुप्लो लेखा परमेस्वर्कायः म्रोताक्नौ बा।
ओउःत झ्यान्ते पुःचोङ् हौचोङ्य येसु ख्रीस् सीती वयः बयःधार्नालेः ङीपाय् ओउः जुगाङ् नीङ्ओ थाव्हाङः सोकार्तोलेः पोक्सा दोःनाःतय्ही।
लौ उया परमेस्वर्कायः दोह् ल्हाती बयःसा दाय्ह्सा येसुकोः मय्ङ् पेह्ती ओउःकायः लुङ्ती तोओपाय् ज्युङ्ह्तीलेः तोती ल्हाती बयःनी। ङीकोः नोःराय्इ ओउःकोः मय्ङ् ताङ्ह्ताक्ओ कुरापाय् परमेस्वर्कायः ल्हाओ थोक्लो लेखा स्याव्नाः।
येसु ख्रीस्खेपाय् परमेस्वर्कोः चोःलेः खेःती झ्यान्ते परमेस्वर्कोः मान्तालम्सै पुःती ओउःकोः काम् पेतो जाङ्ह्नौ। फेरी ङीइपाय् ग्रमःत मुती लोनेः वाङ्सा कुराकायः पेतो चोङाय्तोलेः ङ्हाम्पाःतय्ह्नी ओउःत खेःया परमेस्वर्कोः मान्तापाय् ङीलेः खेःनाःतय्ही।
ओउःत खेःओ परमेस्वर्कोः राजालो खेःओ मुओ थाव्ताङ् ल्हुङ् फवःतोलेः आल्इ। ओहाङः ओउःइ ङीकायः योनःती योती ङी दोह् दोह् राह्ओ बेलाहाङः आय्ह्तो ल्हुङ्इ बयःनाःतय्ही।
ल्हाव्ह्दैबाङ्हाङः मान्ता मुतोक्हाङः येसुइ आन र्याःतीमा गोःतीमा ओउःकायः सीओसै दल्ताक्सा खाय्ओ परमेस्वर्कायः तेती तोआकान्। येसुइपाय् मीओमा ग्याओ ल्हुङ्इमा तेआ त खेःओ ओउःकोः कुरा परमेस्वर्इ सायःआकान्।
ओउः सुकायःमा छमाःत घार्तीलेः तय्छनःती योओ परमेस्वर्कायः तेती तोओ बेलाहाङः ओउःकायः नीङ् “आपाय” त गोत्ती तोतेःनानी ओउःत झ्यान्ते ल्हाव्ह्दैबाङ्हाङः वाह्ती मुतोक्हाङः परमेस्वर्कः एङःती मुनाः।
पेमालो काम् जाङ्ह्तोक्हाङःखेपाय् अरुइ घान्ओमा लीह्सीःओ बयःओमा यात्चाक्इ गोरःनौ त खेःया ओउःपाय् लुङ्सीःओ खेःबाय्ल। पेओ काम् जाङ्ह्तोक्हाङःखेपाय् बुरु अरुइ बयःओ लीह्सीःओ गोरःतेःनौ त खेःया ओउःपाय् परमेस्वर्कोः मीक्हाङः आन लुङ्सीःओ लेःआः।
फेरी ओउः परमेस्वर्कोः कीम्हाङः देती गम्सा बाङ्लो लेखालेः नीङ् जीङः नाःओलम्पाय् छ्युङ्ह्ओलेःतेः इ। परमेस्वर्कायः म्रोताक्सा पेओ कुरा ल्हासाकायः नीङ् येसु ख्रीस्इ छ्युङ्ह्ओ पुरोहीत्लो लेखा स्याव्तेःनै।
ङीकायः ओउःकोः राजीकोः मान्तालम् स्याव्ताक्ती “लौ ङाकोः परमेस्वर् आपाकायः मानपानी” त दाय्ह्ती ङीकायः पुरोहीत् जाङ्ह्आतय्ही। ओउः येसु ख्रीस्कायःपाय् गलकायःमा ग्वम् नाःती ताङ्ह्तोलेः मुपाः। माः क्याने ओउःतलेः स्याव्पाः।
नाङ्कःहाङः सबै एङःतीलेः मुनै। नाङ्कोः मय्ङ्पाय् सबै ताङ्ह्ताक्लेःनानी दोह् हायःती दाय्ह्सा नाङ् ह जुगाङ् छय्ङ्ओलेः खेःतेःनाः। ‘नाङ्इ तय्छनःती योओ काम्लम् जुगाङ् पेओ लेःआः’ त सबैकायः छ्यानःओ लेःआः ओउःत झ्यान्ते सबै जात्लम् नाङ्कायः मानलाङ् वाङ्लेःनै” त दाय्ह्ती ओउःमयः मेआकाय्।
परमेस्वर्कोः काम् जाङ्ह्साकायः ओउः मान्तालम्कायःपाय् राजीकोः मान्तालम्मा पुरोहीत्लम्मा स्याव्ताक्तेःआकान्। ओउःमयः ल्हाव्ह्दैबाङ्कोः हुकुम् बयःओमयः स्याव्लेःनै” त दाय्ह्ती ओउः थालवःपा दाय्ह्नै।