8 एत सेलः स्याव्आक्तीको ओउः ङ्हा वाह्सा खाय्मालो मान्ता क्र्योन्योक्त चीङ्ती युहना पत्रुस्नीस्कुस् वाह्ती मन्दीर्ताङ् पोक्आकाय्।
कुस्ब्रक्त ओउः मान्ताइ मीक्इ पेतो च्यवःती झ्यान्ते परमेस्वर्कायः लुङ्ती ताङ्ह्ताक्ती तोधै येसुकायः गुल्ह्आथै। इत योती ओउः अरु हुम्ओ मान्तालम्इमा परमेस्वर्कायः लुङ्तीलेः ताङ्ह्ताक्आथै।
ओउः बेलाहाङः आन चोङाय्तोलेः स्याव्ती स्याह्तेःपै लोनेः लाङ्काहाङः नीङ्कोः जाङ्ह्झ्याङ्कायः आन पेतोतेः दोःतेःनै। उय्ह्लेकोः परमेस्वर्कोः कुरा छ्यानःओमयःकायःमा नीङ्कायः लीह्सीःओ बयःओलम्कोः तोकानःलम्इ ओउःतलेः लीह्सीःओ बयःआथास।
ओहाङःसैको येसु आल्ती लोने ओउः मान्ताकायःपाय् मन्दीर्हाङः क्रुस्आथै “लौ नाङ् सेलः मुतेःनाः द्याह् रेव्ओ काम् ताःताः जाङ्ह्ताःउलु। नाङ्इ रेव्ओ जाङ्ह्तेःचनौ त खेःया न्हाङ्तोलेः क्लोःतो स्याव्तेःचाः” त दाय्ह्ती येसुइ तोआथै।
त्याङ्आक्तीको ओउः लान्इ ङायःओ मान्ताइ ओउः सात् पुःचोङ्कायः ज्युह्र्ती ओउःमयःकायः ओउःच्युक् जोक्तो घान्ती झ्यान्ते ओउः सात् पुःचोङ्पाय् कीम्सै ग्ल्युङ्ह्ती वयःती सोह्लेः क्रव्आकाय्।
ओउःत तोआक्तीको ओउःकोः ङोय् क्रुत्इ ज्योती ओउः क्ल्योय्बाङ्कायः चीङ्ताक्आथै। चीङ्ताक्ती कुस्ब्रक्त ओउःकोः दोम् क्र्योङः सेलः स्याव्आ।