तीतुस 1:15 - चम्बयाली नौआ नियम

¹⁵ जिन्हा लोक्कां रे दिल बिच पाप वाली कोई सोच नी है तिन्हा लोक्कां तांइ हर किच्‍छ सुच्चा ही है। पर जे मणू बुरे हिन ते मसीह यीशु बिच विश्वास नी करदे से मणू कुसकी भी चीज जो सुच्चा नी समजदे किजोकी तिन्हेरी समझ ते विवेक गन्दी गल्लां कने भरे रे हिन।

तीतुस 1:15 ပူးပေါင်းရင်းမြစ်များ

मत्ती 15:18

पर जे किच्‍छ मुँह का निकलदा, से दिल का निकलदा, ते सेह्ई मणू जो भिठ्ठा करदा।

प्रेरितां रे कम्म 10:15

फिरी दूज्जी वरी तिसजो अवाज सुणिती, कि जे किच्‍छ परमेश्वर ने सुच्चा कित्ते रा है, तिसजो तू भिठ्ठा मत बोल।

रोमियों 14:14

मेरे जो पता है, ते प्रभु यीशु रे जरिये मेरे जो ए पक्का होई गे रा है, कि हर इक्क खाणे रे चीज सुच्ची है। पर जे तिसजो भिठ्ठा समजदा, तिस तांइ से भिठ्ठा है।

रोमियों 14:20

रोट्टी री वजह कने परमेश्वर रा कम्म मत बिगाड़ो, सब खाणे रे चीजां ता सुच्ची हिन, पर जे अगर तिस मणू रे विश्वास तांइ रुकावट री वजह बणदा, तां से रोट्टी खाणा सही नी है।

रोमियों 14:23

पर जे अगर तुसा रे मन बिच तिस रोट्टी रे बारे बिच कोई शक हुंदा, कि से तुसा जो खाणा चाएदा या नी, तां तुसा तिसजो खाई करी पाप करेया करदे हिन। जे किच्‍छ भी असी करदे, ते जे अगर से परमेश्वर बिच विश्वास कने नी हुंदा, तां से असा तांइ पाप है।

1 कुरुन्थियों 10:23

जिय्यां कि तुसा बोलदे कि असा जो सब किच्‍छ करणे री अजादी है, हाँ, पर सब किच्‍छ करणा असा तांइ खरा नी है। असा जो सब किच्‍छ करणे री अजादी ता है, पर सब किच्‍छ परमेश्वर बिच असा रे विश्वास जो मजबूत नी करदा।

1 कुरुन्थियों 10:25

हालांकि जां तुसा कसाईयां री दुकान का मांस खरीददे तां अग्गे बधो ते तिसजो खाओ, ते तिन्हा का किच्‍छ ना पूच्छणे कने साफ रख्खो।

1 कुरुन्थियों 10:31

इधेरे तांइ आखिर बिच मैं तुसा कने ए ही बोलणा चाह्‍ंदा कि तुसा चाए खाओ, चाए पीयो, चाए जे किच्‍छ भी करो, सब किच्‍छ परमेश्वर री बड़ाई तांइ करो।

1 कुरुन्थियों 8:7

पर किच्‍छ विश्वासी मणू हल्ले भी इस गल्ल जो नी समजदे कि मूर्तां बिच कोई ताकत नी है, किजोकी पैल्ले से मणू अप्पु भी तिन्हा मूर्तां री पूजा करदे थिये, पर अवे जां से मणू तिस रोट्टी जो खांदे जे मूर्तां जो भेंट चढ़ाए री हुंदी, तां तिन्हा जो इय्यां लगदा कि से मणू मूर्ति पूजा करेया करदे हिन। तां फिरी से मणू अपणे ही ख्यालां बिच परेशान हुंदे रैह्‍न्दे। अपणे दिल बिच तिन्हा जो इय्यां लगदा रैहन्दा कि तिन्हा ने मूर्ति जो चढ़ाए री रोट्टी खाई करी पाप कित्ते रा है।

1 तीमुथियुस 6:5

जिन्हा लोक्कां री समझ बिगड़ी गे री है, तिन्हा लोक्कां बिच बेकार रे झगड़े हुदें ते से मणू नी समजी सकदे कि सच कै है। से मणू सोचदे कि परमेश्वर री शिक्षा सिखाणा पैसा कमाणे रा जरिया है।

इब्रानियों 10:22

इधेरे तांइ, असा जो सच्चे मन ते मसीह बिच पूरे विश्वास रख्खी करी, परमेश्वर का जाणा चाएदा। ए मसीह ही हिन, जिन्हा ने असा जो पाप्पां का बचाया ते असा जो साफ कित्ते रा है, किजोकी असा रे विवेक पर मसीह यीशु रे खून रा छिड़काव कित्तेया, जिय्यां तिन्हा ने असा रे सरीर जो पाणी कने साफ कित्तेया।

इब्रानियों 12:15

ते चुकन्ने रेयो, कुते इय्यां ना हो कि कोई परमेश्वर रे अनुग्रह का अछुता रेई जाओ, ते तुसा तांइ इक्क मुसीबत री वजह बणी जाए। इदेया कोई भी मणू अप्पु ता परमेश्वर रे सच्चे रस्ते का दुर चली जांदा ते मते जणेया तांइ परमेश्वर री सच्चाई का भटकणे री वजह बणी सकदा।

इब्रानियों 9:14

पर मसीह रा बेकसूर खून असा रे विवेक जो असा रे पाप्पां, जे असा री मौत री वजह बणदे, तिन्हा का साफ करदे, ताकि असी जिन्दे परमेश्वर री अराधना करी सकण। किजोकी पवित्रात्मा री ताकत रे जरिये मसीह ने अप्पु जो इक्क सिद्व कुर्बानी रे तौर पर परमेश्वर जो अर्पित करी दित्तेया।