रोमियों 5:8 - चम्बयाली नौआ नियम

⁸ पर जां असी पाप्पी ही थिये तां परमेश्वर ने असा तांइ अपणे पुत्तर री कुर्बानी देई करी ए ज़ाहिर कित्ता कि से असा कने किन्ना प्यार करदे।

रोमियों 5:8 ပူးပေါင်းရင်းမြစ်များ

यूहन्ना 15:13

इसका बड्डा प्यार होर कुसकी रा नी, कि कोई अपणे दोस्तां तांइ अपणी जान देई देयो।

यूहन्ना 3:16

किजोकी परमेश्वर ने दुनिया रे लोक्कां कने इन्ना प्यार कित्ती कि तिन्हा ने अपणा इकलौता पुत्तर देई दिता कि जेड़ा तिस पर विश्वास करे से नास न हो पर हमेसा री जिन्दगी पाओ।

रोमियों 3:5

जे अगर असा रे अधर्मी कम्म परमेश्वर री धार्मिकता जो ज़ाहिर करदे, तां असी कै बोलणा? कै असी ए बोल्ली सकदे कि परमेश्वर असा जो सजा दैणे अंदर गलत हिन? (ए मैं इन्सानी तौर पर बोल्लेया करदा है।)

रोमियों 4:25

मसीह यीशु असा रे पाप्पां तांइ पकड़वाए गे ते मारे गे, ते असा जो धार्मिक ठैहराणे तांइ परमेश्वर ने तिन्हा जो जिन्दा भी कित्ता।

रोमियों 5:20

परमेश्वर ने लोक्कां जो मूसा रे जरिये कानून इधेरे तांइ दित्तेया गेया ताकि से जाणी सके कि से किन्ने पाप कने भरे रे थिये, पर जां मणू जादा का जादा पाप करणा लग्गे, तां परमेश्वर रा अनुग्रह भी जादा बदधी करी होया।

रोमियों 5:6

किजोकी जां असी कमजोर ही थिये, तां मसीह यीशु, परमेश्वर रे ठैहराए रे समय पर दुष्ट लोक्कां तांइ मरे।

रोमियों 5:7

कुसकी धार्मिक मणू तांइ अपणी जान दैणा ता कुसकी तांइ मुस्किल होई सकदा। पर शायद कोई जणा कुसकी भले मणू तांइ अपणी जान दैणे तांइ तैयार होई भी जाए।

रोमियों 8:32

परमेश्वर ने अपणे इकलौत्ते पुत्र जो भी नी छड्डेया, पर तिन्हा जो असा रे खातिर अपणे दुश्मणा रे हत्थां बिच भी सौंप्पि दित्तेया। परमेश्वर ने असा जो से सब किच्‍छ जरुर दैणा जिसेरा तिन्हा असा कने वादा कित्ते रा है।

रोमियों 8:39

ना कोई असा रे उप्पर, ना कोई असा रे थल्ले, ना परमेश्वर री बणाए री कोई होर रचना, असा जो परमेश्वर रे उस प्यार का बखरा करी सकदा जे तिन्हा ने असा पर प्रभु यीशु मसीह रे जरिये ज़ाहिर कित्ता।

गलातियों 2:20

ए इदेया है कि जां यीशु मसीह सुली पर मरे तिय्यां ही मैं भी मरी गेया ते अवे मैं जिंदा नी रेया, पर मसीह यीशु मेरे बिच जिंदे। अते मैं अवे जे जिंदा है तां सिर्फ तिस विश्वास कने जिंदा है, जे मेरे जो परमेश्वर रे पुत्तर पर है, जिन्हा ने मेरे कने प्यार कित्तेया, अते मेरे तांइ अप्पु जो देई दित्तेया।

इफिसियों 2:7

ताकि परमेश्वर ए इधेरे तांइ कित्ता ताकि से आणे वाले समय बिच ए दिखाई सकण कि से किन्ने जादा अनुग्रहकारी हिन। परमेश्वर री ए दया मसीह यीशु कने रिश्ते बिच जुड़े रे असी लोक्कां जो दिसदी।

इफिसियों 5:2

जिय्यां मसीह यीशु ने तुसा कने प्यार कित्तेया, तिय्यां ही तुसा भी सारेयां कने प्यार करो। मसीह ने अप्पु जो तुसा रे पाप मिटाणे तांइ कुर्बान करी दित्ता ते से कुर्बानी परमेश्वर रे सामणे इक्क खुशबूदार भेंट सांई थिया।

1 तीमुथियुस 1:16

पर मेरे पर दया कित्ती गई। मेरे जदेय सबका बड्डे पाप्पी जो माफ करणे रे जरिये मसीह यीशु ए दिखाणा चाह्‍ंदे थिये कि तिन्हा बिच किन्ना जादा सबर है। ए तिन्हा लोक्कां तांइ इक्क उदारण बणी जाणा जिन्हा ने बाद बिच मसीह यीशु बिच विश्वास करी के हमेसा री जिन्दगी हासिल करणी।

इब्रानियों 8:3

किजोकी हर इक्क पुरोत्त जो पाप्पां री माफी तांइ किच्‍छ भेंट ते कुर्बानी दैणा जरुरी है, तिय्यां ही असा रे प्रधान पुरोत्त यीशु जो भी असा रे पाप्पां री माफी तांइ किच्‍छ भेंट ते कुर्बानी दैणा जरुरी थिया।

1 पतरस 3:18

मैं ए इधेरे तांइ बोल्लेया करदा है किजोकी मसीह ने असा रे पाप्पां रे बदले जुल्म सैह्‍ण कित्तेया ते मारे गे। से इक्क ही वरी मरे ते तिय्यां दुबारा करणे री जरुरत नी है। से अप्पु धार्मिक थिये जिन्हा असा जो परमेश्वर रे नेड़े अणने तांइ असी पाप्पी लोक्कां तांइ अपणी जान देई दित्ती। लोक्कां ने तिन्हेरे सरीर जो मारी छड्डेया पर तिन्हेरी आत्‍मा हल्ले भी जिया करदी है।

1 यूहन्ना 3:16

असा ने प्यार मसीह यीशु का सिख्खेया कि तिन्हा ने असा तांइ अपणी जिन्दगी देई दित्ती, इधेरे तांइ असा जो भी अपणे संगी विश्वासियां तांइ अपणी जान दैणी चाएदी।